ബിഷപ്പ് മാര് ആന്ഡ്രൂസ് താഴത്തുമായി ചര്ച്ച നടത്തി അമിത് ഷാ; കൂടിക്കാഴ്ച അടച്ചിട്ട മുറിയില്
കൊച്ചി: കേന്ദ്ര ആഭ്യന്തര മന്ത്രി അമിത് ഷാ ആര്ച്ച് ബിഷപ്പ് മാര് ആന്ഡ്രൂസ് താഴത്തുമായി ചര്ച്ച നടത്തി. നെടുമ്പാശേരിയില് വച്ചായിരുന്നു ചര്ച്ച. അമൃത ഹോസ്പിറ്റലിന്റെ രജതജൂബിലി ആഘോഷത്തില് പങ്കെടുക്കാന് വേണ്ടിയാണ് അമിത് ഷാ കേരളത്തില് എത്തിയത്. മടക്ക യാത്രക്കിടെ വിമാനത്താവളത്തിന് സമീപമുള്ള മാരിയറ്റ് ഹോട്ടലിലായിരുന്നു കൂടിക്കാഴ്ച്ച.
മണിപ്പൂരിലെ സംഘര്ഷത്തിന്റെയും മറ്റും പശ്ചാത്തലത്തില് അമിത് ഷാ ആവശ്യപ്പെട്ടതനുസരിച്ചാണ് സി ബി സി ഐ പ്രസിഡന്റ് കൂടിയായ മാര് ആന്ഡ്രൂസ് താഴത്തുമായി കൂടിക്കാഴ്ചക്ക് വേദിയൊരുക്കിയതെന്നാണ് സൂചന. ചര്ച്ച അരമണിക്കൂര് നീണ്ടെന്നാണ് വിവരം. ചര്ച്ചയുടെ കൂടുതല് വിവരങ്ങള് പുറത്തുവന്നിട്ടില്ല. ചര്ച്ചയ്ക്ക് ശേഷം അമിത് ഷാ ചിത്രം ട്വിറ്ററില് പങ്കുവച്ചിട്ടുണ്ട്.
അതേസമയം, സില്വര് ജൂബിലി ആഘോഷങ്ങളുടെ ഭാഗമായി 25 കോടി രൂപയുടെ സൗജന്യ ചികിത്സ സഹായ പദ്ധതി നടപ്പാക്കും എന്ന് അമൃത ആശുപത്രി അറിയിച്ചു. സംസ്ഥാന ആരോഗ്യ മന്ത്രി വീണ ജോര്ജ്, കൃഷി മന്ത്രി പി പ്രസാദ് എന്നിവരും പരിപാടിയില് പങ്കെടുത്തിരുന്നു. കഴിഞ്ഞ ഒമ്പത് വര്ഷമായി ആരോഗ്യരംഗത്ത് വലിയ മാറ്റങ്ങള് കൊണ്ട് വരാന് നരേന്ദ്ര മോദി സര്ക്കാരിനായി എന്ന് പരിപാടിയില് അമിത് ഷാ പറഞ്ഞു.
പല പദ്ധതികള് വഴി ചികിത്സാ സഹായങ്ങള് വര്ധിപ്പിച്ചെന്നും മെഡിക്കല് കോളേജുകളുടെ എണ്ണം 648 ആയതോടെ രാജ്യത്ത് മെഡിക്കല് സീറ്റുകളുടെ എണ്ണവും കൂട്ടാനായി. കൊവിഡ് കാലത്ത് രാജ്യം നടത്തിയ വാക്സിനേഷന് യജ്ഞം ലോകത്തിന് മാതൃക ആയെന്നും അമിത് ഷാ പരിപാടിയില് പങ്കെടുത്ത് പറഞ്ഞു.
Click it and Unblock the Notifications
Sign in with Google