കൊവിഡ് വ്യാപനം കുറയുന്നില്ലെന്ന് മുഖ്യമന്ത്രി, 'അനന്തമായി ലോക്ക് ഡൌണ് കൊണ്ട് പോകാനാവില്ല'
തിരുവനന്തപുരം: കോവിഡ് വ്യാപനം ഗണ്യമായി കുറയാത്ത സ്ഥിതിയാണ് സംസ്ഥാനത്തുള്ളതെന്ന് മുഖ്യമന്ത്രി പിണറായി വിജയൻ. കഴിഞ്ഞ 3 ദിവസത്തെ ശരാശരി ടിപിആര് 10.5 ശതമാനം ആണ്. 10.2 ല് നിന്നാണ് ഉയര്ന്നത്.
മുഖ്യമന്ത്രിയുടെ വാക്കുകൾ: അനന്തമായി ലോക്ക് ഡൌണ് അടക്കമുള്ള നിയന്ത്രണങ്ങള് കൊണ്ട് പോകാനാവില്ല. എത്രയും വേഗം സാധാരണ നിലയിലേക്ക് എത്തേണ്ടതുണ്ട്. അതിനുള്ള സാഹചര്യമൊരുക്കുകയാണ് പ്രധാനം. അതുകൊണ്ടാണ് നിയന്ത്രണങ്ങളില് ഘട്ടം ഘട്ടമായി ഇളവുകള് വരുത്തുന്നത്. ആ ഇളവുകള് ദുരുപയോഗം ചെയ്യപ്പെടുന്ന പ്രവണത അനുവദിക്കില്ല. കോവിഡ് രണ്ടാംതരംഗം മറ്റ് സംസ്ഥാനങ്ങളില് കെട്ടടങ്ങി തുടങ്ങിയെങ്കിലും കേരളത്തിലെന്തുകൊണ്ടാണ് രോഗികളുടെ എണ്ണത്തില് കുറവ് വരാത്തതെന്ന് പലരും ആശങ്കപ്പെടുന്നുണ്ട്. പൊതുജനാരോഗ്യ തത്വങ്ങളനുസരിച്ച് പരിശോധിച്ചാല് ഇതില് അത്ഭുതപ്പെടേണ്ടതില്ല. അമിതമായി ഭയപ്പെടേണ്ടതില്ലെന്നും കാര്യങ്ങള് നിയന്ത്രണത്തിലാണെന്നും ആത്മവിശ്വാസത്തോടെ നമുക്ക് പറയാന് കഴിയും
മാര്ച്ച് മധ്യത്തില് മറ്റ് സംസ്ഥാനങ്ങളില് ആരംഭിച്ച കോവിഡ് രണ്ടാംതരംഗം കേരളത്തില് അല്പം വൈകി മെയ് മാസത്തോടെയാണ് പ്രത്യക്ഷപ്പെട്ടത്. ഒരു ഘട്ടത്തില് ടെസ്റ്റ് പോസിറ്റിവിറ്റി നിരക്ക് 29 ശതമാനം വരെ ഉയര്ന്നു. പ്രതിദിന രോഗികളുടെ എണ്ണം നാല്പതിനായിരത്തിന് മുകളിലായിരുന്നു. പിന്നീട് ടെസ്റ്റ് പോസ്റ്റിറ്റിവിറ്റി നിരക്ക് കുറഞ്ഞ് ഇപ്പോള് 10 നടുത്ത് ഏതാനും ദിവസങ്ങളിലായി വലിയ മാറ്റമില്ലാതെ നില്ക്കുന്നു.
പുതുതായി രോഗബാധിതരാകുന്നവരുടെ എണ്ണം ഇപ്പോള് 10-14 ആയിരമായി കുറഞ്ഞിട്ടുണ്ടെങ്കിലും ടി പി ആര് താഴാതെ നില്ക്കുന്നു. രോഗികളുടെ എണ്ണത്തിലുണ്ടായ വര്ധനയ്ക്കനുപാതമായി മരണമടയുന്നവരുടെ എണ്ണത്തിലും വര്ധനവുണ്ടായിട്ടുണ്ട്. രോഗികളുടെ എണ്ണം ഏറ്റവും കൂടിയിരുന്ന അവസരത്തില് പോലും കോവിഡ് ആശുപത്രികളിലും ഐ സി യു കളിലും രോഗികള്ക്ക് ഉചിതമായ ചികിത്സ നല്കാനായിട്ടുണ്ട്. കോവിഡ് ആശുപത്രികിടക്കളുടെ 60 -70 ശതമാനത്തില് കൂടുതല് ഒരിക്കലും ഉപയോഗിക്കേണ്ടി വന്നിട്ടില്ല. മൊത്തം രോഗികളില് 90 ശതമാനത്തോളം പേര്ക്ക് സര്ക്കാര് ആശുപത്രികളില് സൗജന്യ ചികിത്സ നല്കിവരുന്നു. മറ്റൊരു സംസ്ഥാനത്തിനും കൈവരിക്കാന് കഴിയാത്ത നേട്ടമാണിത്.
നടി മമതയുടെ പുത്തൻ ലുക്ക്... വൈറലായി പുതിയ ഫോട്ടോകൾ
കാസ്പില് (കാരുണ്യ ആരോഗ്യ സുരക്ഷപദ്ധതി) ചേര്ന്നിട്ടുള്ള 252 ഓളം സ്വകാര്യ ആശുപത്രികളില് ചികിത്സ നല്കുന്നുണ്ട്. . മറ്റ് സ്വകാര്യ ആശുപത്രികളിലെ ചികിത്സാ ചെലവ് സര്ക്കാര് നിയന്ത്രിച്ചിട്ടുമുണ്ട്. സര്ക്കാര് സ്വകാര്യ മേഖലകള് തികഞ്ഞ സഹകരണത്തോടെയാണ് കോവിഡിനെ നേരിടാന് ശ്രമിച്ച് വരുന്നത്.
ഗുരുതരമായ രോഗലക്ഷണമില്ലാതെ സമ്പര്ക്കവിലക്കില് കഴിയേണ്ടിവരുന്നവര്ക്ക് അതിനുള്ള സൗകര്യം വീടുകളിലില്ലെങ്കില് അവര്ക്ക് മാറി താമസിക്കാനാണ് ഗാര്ഹിക പരിചരണ കേന്ദ്രങ്ങള് (ഡൊമിസിലിയറി കെയര് സെന്റര് ) സംഘടിപ്പിച്ചത്. ഒന്നാം തരംഗത്തിന്റെ അവസാനത്തോടെ ഐ സി എം ആര് നടത്തിയ സീറോ പ്രിവലന്സ് പഠനമനുസരിച്ച് രോഗവ്യാപനനിരക്ക് മറ്റ് സംസ്ഥാനങ്ങളുടേതിന്റെ (21.6) ഏതാണ്ട് പകുതിമാത്രം (11.4) മാത്രമായിരുന്നു കേരളത്തില് രേഖപ്പെടുത്തിയത്. അത് കൊണ്ട് തന്നെ രണ്ടാം തരംഗത്തില് രോഗസാധ്യതയുള്ളവര് സംസ്ഥാനത്ത് കൂടുതലായിരുന്നു. അതുകൊണ്ടാണ് രണ്ടാം തരംഗത്തില് രോഗികളുടെ എണ്ണം വര്ധിച്ചത്. ആ സാഹചര്യത്തില് ടെസ്റ്റിംഗിന്റെ എണ്ണം ഗണ്യമായി വര്ധിപ്പിച്ചിട്ടുമുണ്ട്.
ഐസിഎംആറിന്റെ സെറോ പ്രിവലന്സ് പഠനം ഇന്ത്യയിലെ പല നഗരങ്ങളിലും 70 മുതല് 80 ശതമാനം പേര്ക്ക് രോഗം വന്നു പോയി എന്ന് കണ്ടെത്തിയിട്ടുണ്ട്. കോവിഡ് പോലൊരു മഹാമാരിയെ നേരിടുന്ന ഘട്ടത്തില് മരണങ്ങളുടെ റിപ്പോര്ട്ടിംഗ് അത്ര അനായാസമായി ചെയ്യാവുന്ന ഒന്നല്ല. എങ്കിലും മിക്ക സംസ്ഥാനങ്ങളേക്കാള് മെച്ചപ്പെട്ട രീതിയില് റിപ്പോര്ടിംഗ് ചെയ്ത സംസ്ഥാനമാണ് കേരളം എന്ന് ഐസിഎംആര്ന്റെ പഠനങ്ങള് തെളിയിക്കുന്നു. ഒരുദാഹരണം മധ്യപ്രദേശാണ്. അധിക മരണങ്ങള് കണ്ടെത്താന് ഈ മെയ് മാസത്തില് നടത്തിയ എക്സസ് ഡെത്ത് അനാലിസിസ് പ്രകാരം 2019 മെയ് മാസത്തേക്കാള് 1,33,000 അധിക മരണങ്ങളാണ് മധ്യപ്രദേശില് ഉണ്ടായതായി കണക്കാക്കപ്പെട്ടത്. എന്നാല് 2461 മരണങ്ങള് മാത്രമാണ് റിപ്പോര്ട്ട് ചെയ്യപ്പെട്ടത്. റിപ്പോര്ട്ട് ചെയ്തതിന്റെ 54 ഇരട്ടിയാണ് അവിടെ സംഭവിച്ച മരണങ്ങളുടെ കണക്ക് എന്ന് കാണാം. അത്തരം പ്രശ്നങ്ങള് നമ്മുടെ സംസ്ഥാനത്തില്ല.
കോവിഡിന്റെ ആദ്യ തരംഗ സമയത്തു ഇന്ത്യയില് ഒന്നാകെ 21 പേരില് രോഗബാധ ഉണ്ടാകുമ്പോള് ആയിരുന്നു ഒരു കേസ് റിപ്പോര്ട്ട് ചെയ്യപ്പെട്ടത്. നമ്മുടെ തൊട്ടടുത്ത സംസ്ഥാനങ്ങളില് ഏകദേശം 30 കേസുകള് ഉണ്ടാകുമ്പോള് ആയിരുന്നു ഒരു കേസ് റിപ്പോര്ട്ട് ചെയ്തിരുന്നത്. എന്നാല് കേരളത്തില് 3 കേസുകള് ഉണ്ടാകുമ്പോള് തന്നെ ഒരു കേസ് റിപ്പോര്ട്ട് ചെയ്യാന് നമുക്കു സാധിച്ചു. ആ ജാഗ്രതയാണ് നാം ഇപ്പോഴും തുടരുന്നത്.
Recommended Video
രണ്ടാംതരംഗത്തില് രോഗവ്യാപന സാധ്യത വളരെയെറെയുള്ള ഡെല്റ്റ വൈറസ് വകഭേദമാണ് കേരളത്തില് എത്തിയത്. ജനസാന്ദ്രത കൂടുതലായതുകൊണ്ട് ഡെല്റ്റ വൈറസ് വ്യാപനം കേരളത്തില് കൂടുതലായി സംഭവിച്ചു. മാത്രമല്ല ഗ്രാമനഗരങ്ങള് പരസ്പരം ബന്ധപ്പെട്ട് തുടര്ച്ചയായി നിലനില്ക്കുന്നത് കൊണ്ട് രോഗം അതിവേഗം സംസ്ഥാനമൊട്ടാകെ പടര്ന്ന്പിടിക്കുന്ന സാഹചര്യമുണ്ടായി. ഡെല്റ്റ വൈറസ്, രോഗം വന്ന് ഭേദമായവരിലും വാക്സിനേഷന് എടുത്തവരിലുമുള്ള രോഗപ്രതിരോധത്തെ പരിമിതമായി മറികടക്കുന്നതിനാല് രോഗം ഭേദമായവര്ക്ക് റീ ഇന്ഫക്ഷനും വാക്സിന് എടുത്തവര്ക്ക് ബ്രേക്ക് ത്രൂ ഇന്ഫക്ഷനും വരാനിടയായി. ഇപ്പോള് പോസിറ്റീവാകുന്നവരില് പലരും ഈ വിഭാഗത്തില് പെട്ടവരാണ്. ഇവര്ക്ക് ഗുരുതരമായ രോഗലക്ഷണമുണ്ടാവില്ലെന്നതും മരണ സാധ്യത ഇല്ലെന്നതും ആശ്വാസകരമാണ്.
Click it and Unblock the Notifications
Sign in with Google