താറുമാറായി വ്യോമഗതാഗതം; കണ്ണൂരില് നിന്നുള്ള ദുബായ്, ഷാര്ജ വിമാനങ്ങള് റദ്ദാക്കി
കണ്ണൂര്: ഇറാന് - ഇസ്രായേല് സംഘര്ഷം മൂര്ധന്യത്തില് എത്തിയതോടെ വിമാനസര്വീസുകളും താറുമാറായി. കണ്ണൂര് വിമാനത്താവളത്തില് നിന്ന് ദുബായ്, ഷാര്ജ എന്നിവിടങ്ങളിലേക്ക് പോകാനിരുന്ന വിമാന സര്വീസുകള് റദ്ദാക്കി. ദുബായ്, ഷാര്ജ എന്നിവിടങ്ങളിലേക്കുള്ള രണ്ട് വിമാന സര്വീസുകളാണ് റദ്ദാക്കിയിരിക്കുന്നത്. ഇന്ന് വൈകീട്ട് 7.50 ന് പുറപ്പെടേണ്ടിയിരുന്ന ഷാര്ജ വിമാനം, 11.05 ന് പുറപ്പെടേണ്ടിയിരുന്ന ദുബായ് വിമാനം എന്നിവയാണ് റദ്ദാക്കിയിരിക്കുന്നത്. കരിപ്പൂരില് നിന്നുള്ള ഷാര്ജ വിമാനവും റദ്ദാക്കിയിട്ടുണ്ട്
നാളെ ഷാര്ജയില് നിന്നും ദുബായില് നിന്നും കണ്ണൂരിലേക്കുള്ള വിമാനങ്ങളും റദ്ദാക്കിയിട്ടുണ്ട്. ഇറാനും ഇസ്രായേലിനുമിടയിലുള്ള വ്യോമപാതയില് സിറിയ, ഇറാഖ്, ജോര്ദാന് എന്നീ രാജ്യങ്ങളാണ് ഉള്ളത്. സംഘര്ഷം മൂര്ച്ഛിച്ചതോടെ പശ്ചിമേഷ്യയുടെ വ്യോമപാതയാകെ താറുമാറാകുകയാണ് എന്നാണ് പുറത്തുവരുന്ന വിവരം. പല രാജ്യങ്ങളും താല്ക്കാലികമായി വിമാനങ്ങള് വഴിതിരിച്ചുവിടുകയും വ്യോമപാത അടച്ചിടുകയും ചെയ്തിട്ടുണ്ട്.
അതേസമയം ടെഹ്റാനിലെ ഇന്ത്യന് എംബസി സുരക്ഷാ സാഹചര്യം നിരന്തരം നിരീക്ഷിക്കുകയും ഇറാനിലെ ഇന്ത്യന് വിദ്യാര്ത്ഥികളുടെ സുരക്ഷ ഉറപ്പാക്കാന് ഇടപെടുകയും ചെയ്യുന്നുണ്ട് എന്ന് വിദേശകാര്യ മന്ത്രാലയ പ്രസ്താവനയില് പറഞ്ഞു. എംബസിയുടെ സഹായത്തോടെ വിദ്യാര്ത്ഥികളെ ഇറാനിലെ സുരക്ഷിത സ്ഥലങ്ങളിലേക്ക് മാറ്റുന്നുണ്ട് എന്നും മന്ത്രാലയം കൂട്ടിച്ചേര്ത്തു.
അഭിലാഷ് മോഹനന് റിപ്പോര്ട്ടറിലേക്കില്ല; ഉണ്ണി ബാലകൃഷ്ണന് പകരം ഇനി ജിമ്മി ജെയിംസ്
ഇറാനുമായുള്ള എല്ലാ അതിര്ത്തി ക്രോസിംഗുകളും പാകിസ്ഥാന് അനിശ്ചിതകാലത്തേക്ക് അടച്ചു. ഇരു ദിശകളിലേക്കും അയല് രാജ്യങ്ങളിലൂടെ പറക്കുന്ന മിസൈലുകള് മേഖലയിലെ വ്യോമാതിര്ത്തിയെയും ബാധിച്ചിട്ടുണ്ട്. 900 കിലോമീറ്ററിലധികം (560 മൈല്) അതിര്ത്തിയിലെ വ്യോമസൗകര്യങ്ങള് അടച്ചിട്ടിരിക്കുകയാണെന്ന് ബലൂചിസ്ഥാന് പ്രവിശ്യയിലെ മുതിര്ന്ന ഉദ്യോഗസ്ഥനായ ഖാദിര് ബക്ഷ് പിര്കാനി എഎഫ്പി വാര്ത്താ ഏജന്സിയോട് പറഞ്ഞു.
ഇസ്രായേലിന്റെ ബെന് ഗുരിയോണ് അന്താരാഷ്ട്ര വിമാനത്താവളം ഇനിയൊരു അറിയിപ്പ് ഉണ്ടാകുന്നതുവരെ അടച്ചിട്ടിരിക്കുകയാണ്. ജൂണ് 23 വരെ പല യൂറോപ്യന് നഗരങ്ങളിലേക്കുമുള്ള അധിക വിമാനങ്ങള് റദ്ദാക്കിയതായും കുറഞ്ഞത് വ്യാഴാഴ്ച വരെ എല്ലാ വിമാനങ്ങളും നിര്ത്തിവച്ചതായും ഇസ്രായേലി ഫ്ലാഗ് കാരിയര് എല് അല് എയര്ലൈന്സ് അറിയിച്ചു. അതേസമയം ഇസ്രായേലിനും ജോര്ദാനും ഇടയിലുള്ള ജോര്ദാന് നദി, കിംഗ് ഹുസൈന് (അലന്ബി) പാലം, യിത്സാക്ക് റാബിന് ക്രോസിംഗുകള് പ്രവര്ത്തനക്ഷമമാണ്.
സുരക്ഷാ അപകടസാധ്യതകള് കാരണം ജോര്ദാന്, ഈജിപ്ത് എന്നിവയിലൂടെയുള്ള യാത്ര ഒഴിവാക്കാന് ഇസ്രായേലി ദേശീയ സുരക്ഷാ കൗണ്സില് തങ്ങളുടെ പൗരന്മാരെ ഉപദേശിച്ചു. ഒരു മടക്ക വിമാനം സാധ്യമാകുന്നതുവരെ യാത്രക്കാര്ക്ക് ദിവസങ്ങളോളം കാത്തിരിക്കേണ്ടിവരുമെന്ന് പ്രതീക്ഷിക്കാം എന്നതിനാല് ഇസ്രായേലികള് ഗ്രീസിലേക്കോ സൈപ്രസിലേക്കോ യാത്ര ചെയ്യരുത് എന്നും ഇസ്രായേല് വിമാനത്താവള അതോറിറ്റി പറഞ്ഞു.
ഇസ്രായേല് സന്ദര്ശിക്കുന്ന തങ്ങളുടെ 200 ഓളം പൗരന്മാരെ ജോര്ദാന് തലസ്ഥാനം വഴി തിരിച്ചുവിടാന് പദ്ധതിയിട്ടിട്ടുണ്ടെന്ന് പോളണ്ടിന്റെ ഡെപ്യൂട്ടി വിദേശകാര്യ മന്ത്രി പറഞ്ഞു. നിരവധി വിമാനക്കമ്പനികള് വിമാന സര്വീസുകള് നിര്ത്തിവച്ചതായി പ്രഖ്യാപിച്ചു. റഷ്യയുടെ എയറോഫ്ലോട്ട് മോസ്കോയ്ക്കും ടെഹ്റാനും ഇടയിലുള്ള വിമാന സര്വീസുകള് റദ്ദാക്കുകയും മിഡില് ഈസ്റ്റിലെ മറ്റ് റൂട്ടുകളില് മാറ്റങ്ങള് വരുത്തുകയും ചെയ്തു.
ഇറാന്, ഇറാഖ്, സിറിയ എന്നിവിടങ്ങളിലേക്കും തിരിച്ചുമുള്ള വിമാന സര്വീസുകള് താല്ക്കാലികമായി റദ്ദാക്കിയതായി ഖത്തര് എയര്വേയ്സ് അറിയിച്ചു. ഗ്രീസിലെ ഏജിയന് എയര്ലൈന്സ് ജൂലൈ 12 വരെ ടെല് അവീവിലേക്കും തിരിച്ചുമുള്ള എല്ലാ വിമാന സര്വീസുകളും ജൂണ് 28 വരെ ബെയ്റൂട്ട്, അമ്മാന്, എര്ബില് എന്നിവിടങ്ങളിലേക്കും തിരിച്ചുമുള്ള എല്ലാ വിമാന സര്വീസുകളും റദ്ദാക്കി.
Click it and Unblock the Notifications
Sign in with Google