ശക്തമായ മഴ വരും; ജാഗ്രത പാലിക്കണമെന്ന് മുഖ്യമന്ത്രി, ഉച്ചഭാഷിണിയില് വിളിച്ചുപറയണം
തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ശക്തമായ മഴയ്ക്ക് സാധ്യത. ചില ജില്ലകളില് ഓറഞ്ച്, മഞ്ഞ അലേര്ട്ടുകള് പ്രഖ്യാപിച്ചു. മലയോര മേഖലകളില് കൂടുതല് ജാഗ്രത വേണം. മുന്കരുതലിന്റെ ഭാഗമായി ഈ പ്രദേശങ്ങളിലുള്ളവര് ക്യാമ്പിലേക്ക് മാറണം. ദുരിതാശ്വാസ ക്യാമ്പുകള് സജ്ജമാക്കാനും നിര്ദേശമുണ്ട്. കോവിഡ് പ്രോട്ടോകോള് പാലിച്ചുവേണം എല്ലാ കാര്യങ്ങളും ചെയ്യാന്.
മലയോല മേഖലകളില് രാത്രി യാത്ര നിരോധിക്കാന് നിര്ദേശം നല്കിയിട്ടുണ്ട്. കണ്ട്രോള് റൂം പ്രവര്ത്തനം സജീവമാക്കണം. മരങ്ങള് കടപുഴുകാനുള്ള സാധ്യതകള് മുന്കൂട്ടി കാണണം. കടലാക്രണം രൂക്ഷമാകാനാണ് സാധ്യത. കടലില് പോകരുതെന്നാണ് നിര്ദേശം. ഇതുമായി ബന്ധപ്പെട്ട കാര്യങ്ങള് തീരദേശങ്ങളില് ഉച്ചഭാഷിണിയില് വിളിച്ചു പറയണമെന്നും മുഖ്യമന്ത്രി പിണറായി വിജയന് അറിയിച്ചു. മുഖ്യമന്ത്രിയുടെ അറിയിപ്പിന്റെ പൂര്ണ വിവരം ഇങ്ങനെ...
സംസ്ഥാനത്ത് അടുത്ത 5 ദിവസങ്ങളില് ശക്തമായ മഴക്ക് സാധ്യതയെന്ന് കേന്ദ്ര കാലാവസ്ഥാവകുപ്പ് അറിയിച്ചു. ഇതോടനുബന്ധിച്ച് വിവിധ ജില്ലകളില് ഓറഞ്ച്, മഞ്ഞ അലേര്ട്ടുകള് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില് നാളെ ഓറഞ്ച് അലെര്ട്ടാണ് പ്രഖ്യാപിച്ചിരിക്കുന്നത്. തൃശ്ശൂര്, പാലക്കാട്, മലപ്പുറം, കോഴിക്കോട്, കണ്ണൂര് ജില്ലകളില് നാളെ മഞ്ഞ അലെര്ട്ടാണ് പ്രഖ്യാപിച്ചിരിക്കുന്നത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്, പാലക്കാട്, മലപ്പുറം, കണ്ണൂര്, കാസര്ഗോഡ് ജില്ലകളില് ഇന്ന് മഞ്ഞ അലെര്ട്ടാണ് പ്രഖ്യാപിച്ചിരിക്കുന്നത്.
മലയോരപ്രദേശങ്ങളില് ഓറഞ്ച് അലെര്ട്ടിന് സമാനമായ ജാഗ്രത പാലിക്കണം. മലയോര മേഖലകളിലുള്ളവരെ ഉടനെ തന്നെ മുന്കരുതലിന്റെ ഭാഗമായി ക്യാമ്പുകളിലേക്ക് മാറ്റേണ്ടതാണ്. ഉരുള്പൊട്ടല്/മണ്ണിടിച്ചില്, വെള്ളപ്പൊക്ക ദുരന്ത സാധ്യത മേഖലകളില് അടിയന്തരമായി ദുരിതാശ്വാസ ക്യാമ്പുകള് സജ്ജമാക്കി വെക്കണം. മഴ തുടങ്ങുന്ന ഉടനെ തന്നെ ആളുകളെ ക്യാമ്പുകളിലേക്ക് മാറ്റിത്താമസിപ്പിക്കുകയും ചെയ്യേണ്ടതാണ്. ക്യാമ്പുകള് സജ്ജമാക്കേണ്ടത് കോവിഡ് പ്രോട്ടോക്കോള് പാലിച്ചു കൊണ്ടായിരിക്കണം.
പശ്ചിമഘട്ട മലയോര മേഖലയിലേക്കുള്ള ഗതാഗതം വൈകീട്ട് 7 മണി മുതല് രാവിലെ 7 മണി വരെ നിരോധിച്ചു കൊണ്ടുള്ള ഉത്തരവ് പുറപ്പെടുവിക്കേണ്ടതാണ്.
ജില്ലാ, താലൂക്ക് കണ്ട്രോള് റൂമുകള് 24*7 മണിക്കൂറും ജാഗരൂകരായി പ്രവര്ത്തിക്കേണ്ടതാണ്. പോലീസും അഗ്നിരക്ഷാ സേനയും അതീവ ജാഗ്രതയോടെ ആക്ഷനുകള്ക്ക് തയ്യാറായി ഇരിക്കണം. ശക്തമായ കാറ്റ് വീശുന്നതിനാല് അപകടാവസ്ഥയിലുള്ള മരങ്ങള്, പോസ്റ്റുകള്, പരസ്യ ബോര്ഡുകള് തുടങ്ങിയവ മൂലമുണ്ടാകാന് സാധ്യതയുള്ള അപകടങ്ങള് പ്രതിരോധിക്കുന്നതിനായി അടിയന്തര നടപടി സ്വീകരിക്കേണ്ടതാണ്.
കടലാക്രമണം രൂക്ഷമായ മേഖലയിലും ക്യാമ്പുകള് സജ്ജീകരിച്ച് ആളുകളെ മാറ്റണം. മല്സ്യ തൊഴിലാളികള് യാതൊരു കാരണവശാലും കടലില് പോകാന് പാടുള്ളതല്ല. ഇത് സംബന്ധിച്ചുള്ള മുന്നറിയിപ്പ് മല്സ്യ തൊഴിലാളി ഗ്രാമങ്ങളില് ഉച്ചഭാഷിണികള് ഉപയോഗിച്ച് വിളിച്ചു പറയേണ്ടതാണ്. ശക്തമായ കാറ്റില് മരങ്ങള് കടപുഴകി വീണും, ചില്ലകള് ഒടിഞ്ഞു വീണും, പോസ്റ്റുകള് തകര്ന്നും വൈദ്യുത കമ്പികള് പൊട്ടാനും ഷോക്കേറ്റ് ആളുകള്ക്ക് അപകടം സംഭവിക്കാനുമുള്ള സാധ്യതയുണ്ട്. ഇത്തരം അപകടങ്ങള് ലഘൂകരിക്കാന് വേണ്ട മുന്കരുതലുകള് അടിയന്തരമായി സ്വീകരിക്കണം.
ലൈനുകളുടേയും ട്രാന്സ്ഫോമറുകളുടെയും അപകട സാധ്യതകള് പരിശോധിച്ച് മുന്കൂര് നടപടികള് ആവശ്യമുള്ളയിടത്ത് അത് പൂര്ത്തീകരിക്കേണ്ടതാണ്.
താഴ്ന്ന പ്രദേശങ്ങളില് സ്ഥിതി ചെയ്യുന്ന വൈദ്യുത പവര് ഹൌസുകളിലും മറ്റ് പ്രധാന സ്ഥാപനങ്ങളും വെള്ളം കയറാനുള്ള സാധ്യത മുന്നില് കണ്ടുള്ള മുന്കരുതല് നടപടി സ്വീകരിക്കണം. അണക്കെട്ടുകളില് ജലനിരപ്പ് സൂക്ഷ്മമായി നിരീക്ഷിക്കുകയും സ്ഥിതിഗതികള് ജില്ലാ-സംസ്ഥാന ദുരന്ത നിവാരണ അതോറിറ്റികളെ യഥാസമയം അറിയിക്കണം. വരും ദിവസങ്ങളില് മഴ ശകതമാകാനുള്ള സാധ്യതയുള്ളതിനാല് ജനങ്ങള് അതീവജാഗ്രത പാലിക്കേണ്ടതാണ്.
Click it and Unblock the Notifications
Sign in with Google