ഇന്നും മഴ തന്നെ..! നാല് ജില്ലകളില് യെല്ലോ അലര്ട്ട്, ശക്തമായ കാറ്റിനും സാധ്യത
തിരുവനന്തപുരം: സംസ്ഥാനത്ത് ഇന്നും കനത്ത മഴ പ്രതീക്ഷിക്കാം എന്ന് കേന്ദ്ര കാലാവസ്ഥാ വകുപ്പിന്റെ നിര്ദേശം. കോഴിക്കോട്, വയനാട്, കണ്ണൂര്, കാസര്കോട് ജില്ലകളില് ഇന്ന് അതിശക്തമായ മഴയ്ക്ക് സാധ്യതയുണ്ട്. ഈ സാഹചര്യത്തില് ഈ നാല് ജില്ലകളിലും ശനിയാഴ്ച യെല്ലോ അലര്ട്ടായിരിക്കും എന്ന് കേന്ദ്ര കാലാവസ്ഥാ വകുപ്പ് അറിയിച്ചു. നാളെയും ഈ ജില്ലകളില് യെല്ലോ അലര്ട്ടായിരിക്കും.
തീവ്ര, അതിതീവ്ര മഴ മുന്നറിയിപ്പുകളായ ഓറഞ്ച്, റെഡ് അലര്ട്ടുകള് നിലവില് ഇല്ലെങ്കിലും ജാഗ്രതയില് വിട്ടുവീഴ്ച പാടില്ല എന്നാണ് നിര്ദേശം. ഒറ്റപ്പെട്ടയിടങ്ങളില്, പ്രത്യേകിച്ച് വടക്കന് ജില്ലകളില് ശക്തമായ മഴ തുടരാന് സാധ്യതയുണ്ട് എന്നാണ് മുന്നറിയിപ്പ്. അടുത്ത മൂന്ന് മണിക്കൂറില് കൊല്ലം, ആലപ്പുഴ ജില്ലകളില് ഇടത്തരം മഴയ്ക്കും മണിക്കൂറില് 50 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ട് എന്ന് കേന്ദ്ര കാലാവസ്ഥ വകുപ്പ് അറിയിച്ചു.
മറ്റ് ജില്ലകളില് നേരിയ മഴയ്ക്കും മണിക്കൂറില് 40 കിലോ മീറ്റര് വരെ വേഗതയില് വീശിയേക്കാവുന്ന ശക്തമായ കാറ്റിനും സാധ്യത. കേരള തീരം മുതല് തെക്കന് ഗുജറാത്ത് തീരം വരെ ന്യൂനമര്ദ പാത്തി തുടരുകയാണ്. ഇതിനൊപ്പം പശ്ചിമ ബംഗാളിനും ജാര്ഖണ്ഡിനും മുകളിലായി കഴിഞ്ഞദിവസം ന്യൂനമര്ദ്ദം രൂപപ്പെട്ടിരുന്നു. ഈ ന്യൂനമര്ദ്ദം ഇന്നത്തോടെ ജാര്ഖണ്ഡിന് മുകളിലായി തന്നെ തീവ്ര ന്യൂനമര്ദ്ദമായി ശക്തി പ്രാപിക്കാന് സാധ്യതയുണ്ട്.
കഴിഞ്ഞ ദിവസങ്ങളില് കനത്ത മഴ പെയ്ത പ്രദേശങ്ങളില് അതീവ ജാഗ്രത വേണം എന്ന് അധികൃതര് മുന്നറിയിപ്പ് നല്കി. കേരള തീരത്ത് ഞായറാഴ്ച രാത്രി ഉയര്ന്ന തിരമാലക്കും 'കള്ളക്കടല്' പ്രതിഭാസത്തിനും സാധ്യതയുള്ളതിനാല് ജാഗ്രത പാലിക്കണം എന്നും കാലാവസ്ഥാ നിരീക്ഷണ കേന്ദ്രം അറിയിച്ചു. ഉരുള്പൊട്ടല്, മണ്ണിടിച്ചില്, മലവെള്ളപ്പാച്ചില് സാധ്യതാ പ്രദേശങ്ങളില് നിന്ന് ആളുകള് മാറി താമസിക്കണം.
കേരള തീരത്ത് നാളെ രാത്രി 11.30 വരെ 2.0 മുതല് 2.5 മീറ്റര് വരെ ഉയര്ന്ന തിരമാലയ്ക്കും കള്ളക്കടല് പ്രതിഭാസത്തിനും സാധ്യതയുണ്ട് എന്നാണ് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചിരിക്കുന്നത്. തമിഴ്നാട് തീരത്ത് നാളെ രാത്രി 11.30 വരെ 1.9 മുതല് 2.3 മീറ്റര് വരെ ഉയര്ന്ന തിരമാലയ്ക്കും കള്ളക്കടല് പ്രതിഭാസത്തിനും സാധ്യതയുണ്ട്. ഈ പ്രദേശങ്ങളിലെ മത്സ്യത്തൊഴിലാളികളും തീരദേശവാസികളും പ്രത്യേക ജാഗ്രത പാലിയ്ക്കുക.
കടല്ക്ഷോഭം രൂക്ഷമാകാന് സാധ്യതയുള്ളതിനാല് അപകട മേഖലകളില് നിന്ന് അധികൃതരുടെ നിര്ദേശാനുസരണം മാറി താമസിക്കണം എന്നും മത്സ്യബന്ധന യാനങ്ങള് (ബോട്ട്, വള്ളം മുതലായവ) ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കണം എന്നും അധികൃതര് നിര്ദേശിച്ചു. വള്ളങ്ങള് തമ്മില് സുരക്ഷിത അകലം പാലിക്കണം. ഇതുവഴി കൂട്ടിയിടിച്ചുള്ള അപകട സാധ്യത ഒഴിവാക്കാം.
മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും പൂര്ണമായും ഒഴിവാക്കണം എന്നും അധികൃതര് നിര്ദേശിച്ചു
Click it and Unblock the Notifications
Sign in with Google