കെകെ രമയെ അധിക്ഷേപിച്ചത് അറുവഷളനായ മൂന്നാംകിട രാഷ്ട്രീയക്കാരന്; തുറന്നടിച്ച് കെ സുധാകരന്
തിരുവനന്തപുരം: മുഖ്യമന്ത്രി പിണറായി വിജയനെതിരെയും എം എം മണിക്കെതിരെയും വിമര്ശനവുമായി കെ പി സി സി അധ്യക്ഷന് കെ സുധാകരന്. കമ്മ്യൂണിസമെന്ന പ്രത്യയശാസ്ത്രത്തിന് ഒരാളെ എത്രത്തോളം പൈശാചികമാക്കി മാറ്റാന് പറ്റും എന്നതിന്റെ ഉത്തമ ഉദാഹരണമാണ് നിയമസഭയില് കെ കെ രമയെ അധിക്ഷേപിച്ച അറുവഷളനായ മൂന്നാംകിട രാഷ്ട്രീയക്കാരനെന്ന് കെ സുധാകരന് പറഞ്ഞു. പേ പിടിച്ചൊരു അടിമക്കൂട്ടത്തെ ചുറ്റിനും നിര്ത്തി രാഷ്ട്രീയ പ്രവര്ത്തനം നടത്തുന്ന കേരളത്തിലെ ഏക രാഷ്ട്രീയക്കാരനാണ് പിണറായി വിജയനെന്നും അദ്ദേഹം കൂട്ടിച്ചേര്ത്തു.
തന്റെ യഥാര്ത്ഥ മുഖം ഓരോ തവണ പൊതുസമൂഹത്തിന് മുന്നില് അനാവരണം ചെയ്യപ്പെടുമ്പോഴും, കൂട്ടിലിട്ട് വളര്ത്തുന്ന ഭ്രാന്തന് നായ്ക്കളെ അദ്ദേഹം തുറന്നുവിടും. നിരായുധരും നിര്ദ്ദോഷികളുമായ മനുഷ്യരെ അവ ചെന്ന് ആക്രമിക്കും. ഈ പ്രവൃത്തിയെ ധീരതയായി കണ്ട് കൈയ്യടിക്കാനും സിപിഎമ്മില് ആളുകളുണ്ട്. ഒരുപക്ഷെ സിപിഎം എന്നൊരു പാര്ട്ടിയില് മാത്രമേ അത്തരക്കാര് ഉണ്ടാവുകയുള്ളൂ.
കമ്മ്യൂണിസമെന്ന പ്രത്യയശാസ്ത്രത്തിന് ഒരാളെ എത്രത്തോളം പൈശാചികമാക്കി മാറ്റാന് പറ്റും എന്നതിന്റെ ഉത്തമ ഉദാഹരണമാണ് നിയമസഭയില് കെ കെ രമയെ അധിക്ഷേപിച്ച അറുവഷളനായ മൂന്നാംകിട രാഷ്ട്രീയക്കാരന്. ആ 'നീച ജന്മവും' കേരളത്തിന്റെ മണ്ണിലാണ് ജീവിക്കുന്നത് എന്നതില് ഓരോ മലയാളിയും തലകുനിക്കുന്നു.
സിപിഎമ്മിന്റെ കൊടി ഒരു തവണയെങ്കിലും പിടിച്ച പെണ്കുട്ടികളെ സ്നേഹത്തോടെ ഓര്മിപ്പിക്കുകയാണ്, ശാക്തീകരണത്തിന്റെ ആട്ടിന്തോലണിഞ്ഞ ഇവരുടെ യഥാര്ത്ഥ മുഖം കാണുന്ന ദിവസമായിരിക്കും കഥകളില് കേട്ടറിഞ്ഞ രാക്ഷസന്മാരേക്കാള് ക്രൂരരായ മനുഷ്യര് ഉണ്ടെന്ന് നിങ്ങള് മനസ്സിലാക്കുക!
കെ കെ രമ കേരളത്തിന്റെ സ്ത്രീമുന്നേറ്റത്തിന്റെ പ്രതീകമാണ്. ഈ നാട് കണ്ട ഏറ്റവും നീചരായ മനുഷ്യരെ മുഴുവനും വെല്ലുവിളിച്ചുകൊണ്ടാണവര് ഇവിടെ വരെയെത്തിയത്. അതിനവര്ക്ക് പിന്തുണ കൊടുത്തത് ഇന്ത്യന് നാഷണല് കോണ്ഗ്രസാണ്. അതിനിയും തുടരും.ഏത് പ്രതിസന്ധിയിലും രമയ്ക്ക് താങ്ങായി കോണ്ഗ്രസ് ഉണ്ടാകുമെന്നും സുധാകരന് പറഞ്ഞു.
അതേസമയം, കെ കെ രമയ്ക്കെതിരെ എം എം മണി നടത്തിയ പ്രസ്താവനയെ തുടര്ന്ന് നിയമസഭയില് നിന്ന് പ്രതിഷേധം ഉയര്ന്നിരുന്നു. പ്രതിപക്ഷം സഭ ബഹിഷ്കരിച്ച് പ്രതിഷേധിച്ചു. എം എം മണി പ്രസ്താവന പിന്വലിച്ച് മാപ്പ് പറയണമെന്നാണ് പ്രതിപക്ഷത്തിന്റെ ആവശ്യം. കെ.കെ രമയ്ക്ക് എതിരെ എം.എം മണി നടത്തിയ ക്രൂരവും നിന്ദ്യവുമായ പരാമര്ശം പിന്വലിച്ച് മാപ്പ് പറയണമെന്നാണ് പ്രതിപക്ഷം ഇന്ന് നിയമസഭയില് ആവശ്യപ്പെട്ടത്.
ടി.പി ചന്ദ്രശേഖരനെ 51 വെട്ട് വെട്ടി കൊന്നിട്ടും അദ്ദേഹത്തിന്റെ വിധവയായ കെ.കെ രമയെ പിന്നാലെ നടന്ന് വേട്ടയാടുകയാണ്. അവര് വിധവയായത് അവരുടെ വിധി കൊണ്ടെന്നാണ് മണി പറഞ്ഞത്. പാര്ട്ടി കോടതി നടപ്പാക്കിയ വിധിയാണത്. പാര്ട്ടി കോടതിയുടെ വിധി നടപ്പാക്കിയ ജഡ്ജി ഇന്ന് കേരളത്തിന്റെ മുഖ്യമന്ത്രിയും അന്ന് പാര്ട്ടി സെക്രട്ടറിയുമായിരുന്ന പിണറായി വിജയനാണ്.
പിണറായി വിജയന്റെ പാര്ട്ടി കോടതിയിലാണ് ചന്ദ്രശേഖരനെ ക്രൂരമായി കൊലപ്പെടുത്താനുള്ള വിധിയുണ്ടായത്. അതിന് നേതൃത്വം കൊടുത്ത ഒരാള്, ചോരയുടെ കറ ഇപ്പോഴും കൈകളിലുള്ള മുഖ്യമന്ത്രി, ആ കസേരയില് ഇരുന്നു കൊണ്ട് കൊന്നിട്ടും പകതീരാതെ സംസാരിക്കുമ്പോഴും ന്യായീകരിക്കുകയാണ്.
Click it and Unblock the Notifications
Sign in with Google