പ്രധാനമന്ത്രി ഇന്ന് വയനാട്ടില്: ശനിയാഴ്ച തിരച്ചിലുണ്ടാകില്ല, ചുരത്തിലും നിയന്ത്രണം
കല്പ്പറ്റ: പ്രധാനമന്ത്രി നരേന്ദ്ര മോദി ഇന്ന് വയനാട്ടിലെ ഉരുള്പൊട്ടല് ദുരന്ത മേഖല സന്ദർശിക്കും. രാവിലെ പ്രത്യേക വിമാനത്തില് കണ്ണൂർ വിമാനത്താവളത്തിലെത്തുന്ന പ്രധാനമന്ത്രി ഹെലികോപ്ടറില് ചൂരല്മല, മുണ്ടക്കൈ മേഖലകളില് ആകാശ നിരീക്ഷണം നടത്തും. 12.15 നായിരിക്കും അദ്ദേഹം ദുരന്ത മേഖലയില് എത്തുകയെന്നാണ് വിവരം.
പ്രദേശത്തെ പുനരധിവാസ പ്രവർത്തനങ്ങൾ വിലയിരുത്തുന്ന അദ്ദേഹം ദുരിതാശ്വാസ ക്യാമ്പുകള് സന്ദർശിച്ച് ദുരിതബാധിതരുമായി സംസാരിച്ചേക്കും. പ്രധാനമന്ത്രിയുടെ വരവിനോട് അനുബന്ധിച്ച് മേഖലയില് വലയി സുരക്ഷയാണ് ഏർപ്പെടുത്തിയിരിക്കുന്നത്.
അതേസമയം, ഉരുൾപൊട്ടൽ ദേശീയ ദുരന്തമായി പ്രഖ്യാപിക്കുമെന്നാണ് കരുതുന്നതെന്ന് മന്ത്രി പിഎ മുഹമ്മദ് റിയാസ് പറഞ്ഞു. നാളത്തെ സന്ദർശനത്തിന്റെ ഭാഗമായി പ്രധാനമന്ത്രി മോദി മുഖ്യമന്ത്രിയുമായി സംസാരിക്കും. വയനാട്ടിലെ ദുരന്ത മേഖല സന്ദർശിക്കുന്ന പ്രധാനമന്ത്രി നരേന്ദ്രമോദി പ്രത്യേക സാമ്പത്തിക പാക്കേജ് പ്രഖ്യാപിക്കണമെന്ന് പ്രതിപക്ഷ നേതാവ് വി ഡി സതീശനും ആവശ്യപ്പെട്ടിട്ടുണ്ട്.
ദുരന്തത്തിന്റെ ആഴം മനസിലാക്കി മറ്റു സംസ്ഥാനങ്ങളില് ചെയ്യുന്നതു പോലുള്ള സഹായമാണ് വേണ്ടത്.ഇരകളെ പുനരധിവസിപ്പിക്കല് മാത്രമല്ല ദുരന്തമേഖലയില് താമസിക്കുന്നവരെ കൂടി മാറ്റിപ്പാര്പ്പിക്കേണ്ടി വരുമെന്നും വിഡി സതീശന് പറഞ്ഞു.
ഇന്ന് തിരച്ചിലില്ല
പ്രധാനമന്ത്രിയുടെ സന്ദര്ശനത്തോടനുബന്ധിച്ച് ജില്ലയില് കര്ശന നിയന്ത്രണങ്ങളുള്ളതിനാല് മുണ്ടക്കൈ, ചൂരല്മല തുടങ്ങി ദുരന്തബാധിത പ്രദേശങ്ങളില് ശനിയാഴ്ച തിരച്ചില് ഉണ്ടായിരിക്കുന്നതല്ലെന്ന് ജില്ലാ കളക്ടര് ഡി.ആര്. മേഘശ്രീ അറിയിച്ചു. സന്നദ്ധ പ്രവര്ത്തകര്, തെരച്ചിലുമായി ബന്ധപ്പെട്ട മറ്റുള്ളവര് തുടങ്ങിയവര്ക്ക് ദുരന്തബാധിത പ്രദേശങ്ങളില് പ്രവേശനം ഉണ്ടായിരിക്കുന്നതല്ല. ഞായറാഴ്ച ജനകീയ തെരച്ചില് പുനരാരംഭിക്കുമെന്നും ജില്ലാ കളക്ടര്അറിയിച്ചു.
ചുരത്തിലും നിയന്ത്രണം
പ്രധാനമന്ത്രിയുടെ വയനാട് സന്ദർശനത്തെ തുടർന്ന് താമരശ്ശേരി ചുരത്തിലും നിയന്ത്രണം ഏർപ്പെടുത്തിയിട്ടുണ്ട്. രാവിലെ 7 മണി മുതൽ വൈകിട്ട് 3 മണി വരെ താമരശ്ശേരി ചുരം വഴി സഞ്ചരിക്കുന്ന വാഹനങ്ങൾക്കാണ് നിയന്ത്രണം. ഹെവി വെഹിക്കിൾസ്, മൾട്ടി ആക്സിൽ ലോഡഡ് വെഹിക്കിൾസ് തുടങ്ങി മറ്റു ചരക്കു വാഹനങ്ങൾ എന്നിവ കടത്തിവിടില്ല. താമരശ്ശേരിക്കും അടിവാരത്തിനും ഇടക്ക് സൗകര്യപ്രദമായ സ്ഥലങ്ങളിൽ ഇത്തരത്തിലുള്ള വാഹനങ്ങൾ തടഞ്ഞു നിർത്തും.
പുനരധിവാസം മൂന്ന് ഘട്ടങ്ങളിലായി നടപ്പിലാക്കും
മുണ്ടക്കൈ - ചൂരല്മല ദുരന്തബാധിതരുടെ പുനരധിവാസം മൂന്ന് ഘട്ടങ്ങളിലായി നടപ്പാക്കുമെന്ന് മന്ത്രിസഭാ ഉപസമിതി. നിലവില് ക്യാമ്പുകളില് കഴിയുന്നവരെ താത്ക്കാലികമായി പുനരധിവസിപ്പിക്കുന്നതാണ് ഒന്നാം ഘട്ടം. ഇതിനായി ബന്ധുവീടുകളില് പോവാന് താല്പര്യമുള്ളവര്ക്ക് അതിനുള്ള സൗകര്യമൊരുക്കും. മറ്റുള്ളവരെ താമസിപ്പിക്കുന്നതിനായി വാടക വീടുകളോ മറ്റ് സൗകര്യങ്ങളോ സര്ക്കാര് ചെലവില് കണ്ടെത്തി നല്കും. ഇതിനായി തദ്ദേശ സ്ഥാപനങ്ങളുടെ സഹകരണത്തോടെ വിപുലമായ പദ്ധതിക്ക് രൂപം നല്കിയതായി റവന്യൂ മന്ത്രി കെ രാജന് വാര്ത്താസമ്മേളനത്തില് അറിയിച്ചു.
Click it and Unblock the Notifications
Sign in with Google