തന്നെ കേള്ക്കാതെ തീരുമാനമെടുക്കരുത്; ദിലീപിന്റെ ഹര്ജി തള്ളണമെന്ന് നടി ഹൈക്കോടതിയില്
കൊച്ചി: നടിയെ ആക്രമിച്ച കേസിന്റെ തുടരന്വേഷണം റദ്ദാക്കണമെന്ന പ്രതി ദിലീപിന്റെ ഹര്ജി തള്ളണമെന്ന ആവശ്യവുമായി അതിജീവിത ഹൈക്കോടതിയില്. തുടരന്വേഷണം റദ്ദാക്കണമെന്ന പ്രതിയുടെ ഹര്ജി നിയമപരമായി നിലനില്ക്കില്ലെന്ന് നടി ഹര്ജിയില് പറഞ്ഞു. തുടരന്വേഷണം റദ്ദാക്കണമെന്ന ഹര്ജിയെ എതിര്ത്ത് കേസില് കക്ഷി ചേരാന് നടി അപേക്ഷ നല്കി. അന്വേഷണവും തുടരന്വേഷണവും സംബന്ധിച്ച കാര്യങ്ങളില് പ്രതിയുടെ ഭാഗം കേള്ക്കേണ്ടതില്ലെന്നും ഇക്കാര്യം സുപ്രീം കോടതിയുടെ വിവിധ ഉത്തരവുകളില് വ്യക്തമാക്കിയിട്ടുണ്ടെന്നും ഹര്ജിയില് പറയുന്നു. തന്നെ കേള്ക്കാതെ തീരുമാനമെടുക്കുന്നത് പരിഹരിക്കാനാകാത്ത നഷ്ടം ഉണ്ടാക്കുമെന്നും നടി ഹര്ജിയില് പറയുന്നു.
Recommended Video
നടിയെ ആക്രമിച്ച കേസിലെ തുടരന്വേഷണം തടയണമെന്നാവശ്യപ്പെട്ട് ദിലീപ് കഴിഞ്ഞ ദിവസമാണ് ഹൈക്കോടതിയില് സമര്പ്പിച്ചത്. കേസിന്റെ വിചാരണ നീട്ടികൊണ്ടു പോകാനാണ് തുടരന്വേഷണം നടത്തുന്നതെന്നാണ് ദിലീപിന്റെ ആക്ഷേപം. തുടരന്വേഷണത്തിനു മുതിര്ന്ന ഉദ്യോഗസ്ഥരുടെ അനുമതി ഉണ്ടായിരുന്നില്ലെന്നും വധ ഗൂഢാലോചനക്കേസിലെ ഇരകളാണ് അന്വേഷണം നടത്തുന്നതെന്നും ദിലീപ് കോടതിയെ അറിയിച്ചിട്ടുണ്ട്. നടിയെ ആക്രമിച്ച കേസിന്റെ വിചാരണ വേഗത്തില് പൂര്ത്തിയാക്കാന് വിചാരണ കോാടതിക്കു നിര്ദേശം നല്കണമെന്നും ദിലീപ് ഹര്ജിയില് ആവശ്യപ്പെട്ടിട്ടുണ്ട്.
ദിലീപ് നല്കിയ ഹര്ജി ഹൈക്കോടതി ഇന്ന് പരിഗണിക്കാനിരിക്കേയാണ് നടി ഹര്ജിയില് കക്ഷി ചേരാന് അനുവദിക്കണമെന്ന് ആവശ്യപ്പെട്ട് അപേക്ഷ സമര്പ്പിച്ചിരിക്കുന്നത്. അന്വേഷണ ഉദ്യോഗസ്ഥരെ വധിക്കാന് ഗൂഢാലോചന നടത്തിയെന്ന കേസില് ദിലീപിനും പ്രതികള്ക്കും ഹൈക്കോടതി നേരത്തെ മുന്കൂര് ജാമ്യം അനുവദിച്ചിരുന്നു. ഇതിന് പിന്നാലെ വധഗൂഢാലോചനാ കേസില് എഫ് ഐ ആര് റദ്ദാക്കണമെന്നാവശ്യപ്പെട്ട് ദിലീപ് ഹൈക്കോടതിയെ സമീപിച്ചിട്ടുമുണ്ട്. ആരോപണങ്ങള് തെളിയിക്കാനുള്ള തെളിവുകളില്ലെന്നാണ് ദിലീപ് പറയുന്നത്. കേസ് ക്രൈംബ്രാഞ്ച് കെട്ടിച്ചമച്ചതാണെന്നും എഫ് ഐ ആര് നിലനില്ക്കില്ലെന്നും പ്രതികളുടെ ഹര്ജിയില് പറയുന്നു.
ഡി വൈ എസ് പി ബൈജു പൗലോസും ബാലചന്ദ്രകുമാറും തനിക്കെതിരെ ഗൂഢാലോചന നടത്തി എന്നാണ് ദിലീപിന്റെ വാദം. കേസ് റദ്ദാക്കിയില്ലെങ്കില് അന്വേഷണം സി ബി ഐക്ക് കൈമാറണമെന്നും ദിലീപ് ആവശ്യപ്പെട്ടു. അതേസമയം അന്വേഷണ ഉദ്യോഗസ്ഥരെ അപായപ്പെടുത്താന് ശ്രമിച്ചെന്ന കേസില് ദിലീപിന്റെ സഹോദരി ഭര്ത്താവ് ടി എന് സുരാജ് ചോദ്യം ചെയ്യലിന് ഹാജരായി. കളമശ്ശേരി ക്രൈം ബ്രാഞ്ച് ഓഫീസിലാണ് സൂരാജ് ഹാജരായത്. ദിലീപിന്റെ സഹോദരന് അനൂപ് നാളെ ഹാജരാകും. ക്രൈംബ്രാഞ്ച് നേരിട്ട് പിടിച്ചെടുത്ത ഫോണുകളുടെ പരിശോധന ഫലത്തിന്റെ അടിസ്ഥാനത്തിലാണ് ചോദ്യം ചെയ്യല്.
സുരാജിനെയും അനൂപിനെയും ചോദ്യംചെയ്ത ശേഷം നടന് ദിലീപിനെയും ഈയാഴ്ച്ച ചോദ്യം ചെയ്യാന് വിളിപ്പിക്കും. ദിലീപിന്റെയും അനൂപിന്റെയും സുരാജിന്റെയും മൊബൈല് ഫോണുകളുടെ ശാസ്ത്രീയ പരിശോധനാഫലം ആലുവ മജിസ്ട്രേറ്റ് കോടതിയില് ഇതിനോടകം ലഭിച്ചിട്ടുണ്ട്. തുടരന്വേഷണം റദ്ദാക്കണമെന്ന ദിലീപിന്റെ ഹര്ജിയില് ഹൈക്കോടതി തീരുമാനമെടുക്കും മുമ്പ് കൂടുതല് തെളിവ് കണ്ടെത്താനാണ് അന്വേഷണ സംഘത്തിന്റെ നീക്കം. സംവിധായകന് ബാലചന്ദ്രകുമാറിന്റെ വെളിപ്പെടുത്തലിന്റെ പശ്ചാത്തലത്തിലാണ് കേസില് തുടരന്വേഷണം നടക്കുന്നത്. മാര്ച്ച് ഒന്നിന് റിപ്പോര്ട്ട് നല്കാന് വിചാരണ കോടതി ആവശ്യപ്പെട്ടിട്ടുണ്ട്.
എന്നാല് ആറ് മാസമെങ്കിലും വിശദമായ അന്വേഷണത്തിന് വേണ്ടി വരുമെന്നാണ് പൊലീസ് ആവശ്യപ്പെട്ടതെങ്കിലും ഇക്കാര്യം വിചാരണ കോടതി അനുവദിച്ചിട്ടില്ല. ദിലീപിനെയും മറ്റ് പ്രതികളെയും 33 മണിക്കൂര് ചോദ്യം ചെയ്തിരുന്നു. എന്നാല് കാര്യമായ തെളിവ് ഹാജരാക്കാന് അന്വേഷണ സംഘത്തിന് സാധിച്ചില്ല. ഇതോടെയാണ് ദിലീപ് ഉള്പ്പെടെയുള്ളവര്ക്ക് ഹൈക്കോടതിയില് നിന്ന് മുന്കൂര് ജാമ്യം ലഭിച്ചത്. ഇതിന് ശേഷം അറസ്റ്റ് സാധ്യത ഇല്ലാതാക്കാന് ദിലീപും മറ്റു പ്രതികളും ആലുവ കോടതിയില് ഹാജരായി ജാമ്യമെടുത്തിട്ടുണ്ട്.
Click it and Unblock the Notifications
Sign in with Google