ഓരോ കൊലപാതകങ്ങള് നടക്കുമ്പോഴും അവസാനത്തേതാകണമെന്ന് ആഗ്രഹിക്കുന്നു: കെകെ രമ
കോഴിക്കോട്: തിരുവല്ലയില് ഇന്നലെ വെട്ടേറ്റ് മരിച്ച സിപിഎം പ്രാദേശിക നേതാവ് പിബി സന്ദീപ് കുമാറിനെ കൊലപ്പെടുത്തിയത് അപലപനീയമാണെന്ന് ആര്എംപി നേതാവും വടകര എംഎല്എയുമായ കെകെ രമ. ഓരോ കൊലപാതകങ്ങളും സൃഷ്ടിക്കുന്നത് ഒരു രക്തസാക്ഷിയെ മാത്രമല്ല, ജീവിതകാലം മുഴുവന് മരിച്ചു ജീവിക്കുന്ന കുടുംബാംഗങ്ങളെയും, സൗഹൃദങ്ങളെയും കൂടെയാണെന്ന് കെ കെ രമ തന്റെ ഫേസ്ബുക്ക് കുറിപ്പില് പറയുന്നു.
രാഷ്ട്രീയ കൊലപാതകങ്ങള് സംസ്ഥാനത്ത് തുടര്ക്കഥയാണെന്നും എന്നാല് കൊലപാതകികളെ സംരക്ഷിക്കുകയും, അവര് മഹാന്മാരാണെന്ന ബോധം സമൂഹത്തില് ഉയര്ത്തിക്കൊണ്ടുവരികയും ചെയ്യുന്ന ഓരോ രാഷ്ട്രീയ പ്രസ്ഥാനങ്ങളും ഈ ഇടപെടലുകള് അവസാനിപ്പിക്കണമെന്നും എങ്കില് മാത്രമേ ഇത്തരം ക്രൂര കൊലപാതകങ്ങള്ക്ക് അറുതി വരുകയുള്ളു എന്നും കെ കെ രമ വ്യക്തമാക്കി. കൊലപാതകത്തിന് പിന്നില് പ്രവര്ത്തിച്ചവരെ നിമയത്തിന്റെ മുന്നില് കൊണ്ടുവരണമെന്നും കെകെ രമ ഫെയ്സ്ബുക്ക് കുറിപ്പില് പറയുന്നു.
സംഘപരിവാറാണ് ഈ കൊലപാതകത്തിന് പിന്നിലെന്നാണ് സി.പി.എം പറയുന്നതെന്നും കൃത്യമായ അന്വേഷണം നടത്തി ഈ അക്രമിസംഘത്തെ നിയമത്തിനു മുന്നില് കൊണ്ടുവരാന് ആഭ്യന്തര വകുപ്പിന് കഴിയണമെന്നും കെകെ രമ പറയുന്നു. ഓരോ കൊലപാതകങ്ങള് നടക്കുമ്പോഴും ഇത് അവസാനത്തേത് ആകണമെന്ന് ആഗ്രഹിക്കുന്നൊരു സമൂഹത്തിന്റെ മുന്നിലേക്കാണ് നരാധമന്മാര് വീണ്ടും വീണ്ടും വാളെടുക്കുന്നതെന്നും കൊലപാതകികളെ സംരക്ഷിക്കുകയും,അവര് മഹാന്മാരാണെന്ന ബോധം സമൂഹത്തില് ഉയര്ത്തിക്കൊണ്ടുവരികയും ചെയ്യുന്ന ഓരോ രാഷ്ട്രീയ പ്രസ്ഥാനങ്ങളും ഇത് അവസാനിപ്പിച്ചാല് മാത്രമേ ഇത്തരം ക്രൂര കൊലപാതകങ്ങള് അവസാനിക്കുകയുള്ളൂവെന്നും രമ തന്റെ ഫെയ്സ് ബുക്ക് കുറിപ്പില് പറയുന്നു.
സന്ദീപിന്റെ വിയോഗത്തില് ആ കുടുംബത്തിനും,സുഹൃത്തുക്കള്ക്കും,നാടിനുമുണ്ടായ തീരാനഷ്ടത്തില് ദുഃഖം രേഖപ്പെടുത്തുന്നുവെന്നും കെകെ രമ തന്റെ ഫേസ്ബുക്ക് കുറിപ്പില് പറയുന്നു. മുഖ്യമന്ത്രി പിണറായി വിജയനും കൊലപാതക്തതെ അപരലപിച്ച് ഫേസ്ബുക്കില് പോസ്റ്റ് ചെയ്തിരുന്നു. പത്തനംതിട്ട ജില്ലയിലെ തിരുവല്ലയ്ക്കടുത്ത് സിപിഎം പെരിങ്ങര ലോക്കല് കമ്മിറ്റി സെക്രട്ടറി പി. ബി. സന്ദീപിന്റെ കൊലപാതകം ഹീനവും അപലപനീയവുമാണെന്ന് മുഖ്യമന്ത്ര പിണറായി വിജയന് പറഞ്ഞു.
കൊലപാതകത്തിനു പിന്നില് പ്രവര്ത്തിച്ച എല്ലാവരേയും നിയമത്തിനു മുന്നില് എത്തിക്കാന് പോലീസിനു നിര്ദ്ദേശം നല്കിയിട്ടുണ്ടെന്നും നിഷ്ഠുരമായ കൊലപാതകത്തിന്റെ കാരണങ്ങളും അന്വേഷിച്ച് പുറത്തു കൊണ്ടുവരുമെന്നും അദ്ദേഹം പറഞ്ഞു. പ്രദേശത്തെ അംഗീകാരമുള്ള രാഷ്ട്രീയ നേതാവാണ് കൊല്ലപ്പെട്ടതെന്നും പൊതുപ്രവര്ത്തകന് എന്ന നിലയിലും ജനപ്രതിനിധി എന്ന നിലയിലും ജനങ്ങളുമായി അടുത്ത് ഇടപഴകുകയും അംഗീകാരം നേടുകയും ചെയ്ത സഖാവായിരുന്നു സന്ദീപെന്നും സന്ദീപിന്റെ വേര്പാട് കാരണം തീരാനഷ്ടം അനുഭവിക്കുന്ന കുടുംബത്തിന്റെ ദു:ഖത്തില് പങ്കു ചേരുന്നുവെന്നും മുഖ്യമന്ത്രി തന്റെ ഫേസ്ബുക്ക് കുറിപ്പില് വ്യക്തമാക്കി.
ഇന്നലെ രാത്രി എട്ട് മണിയോടെയാണ് തിരുവല്ല ചാത്തങ്കരിയിലെ മേപ്രാലില് വയലില് വച്ച് സന്ദീപിനെ ഒരു സംഘമാളുകള് ബൈക്കിലെത്തി വെട്ടിക്കൊലപ്പെടുത്തിയത്. സന്ദീപിന്റെ നെഞ്ചില് ഒമ്പത് വെട്ടേറ്റിട്ടുണ്ടെന്നാണ് ആശുപ്ത്രിയില് നിന്ന്് ലഭിച്ച വിവരം. ആശുപത്രിയിലെത്തും മുമ്പ് തന്നെ സന്ദീപ് മരിച്ചു. അക്രമികള് ഉടന് തന്നെ സ്ഥലത്ത് നിന്ന് രക്ഷപ്പെട്ടെങ്കിലും രാത്രിയോടെ നാല് പേര് പിടിയിലാവുകയായിരുന്നു. ആലപ്പുഴ ജില്ലയിലെ കരുവാറ്റയില് നിന്നാണ് പ്രതികളെ പിടികൂടിയത്. ഇന്ന് അഞ്ചാമനെയും പിടികൂടിയോടെ കേസിലെ എല്ലാ പ്രതികളും അറസ്റ്റിലായി. ജിഷ്ണു രഘു, നന്ദു, പ്രമോദ്, മുഹമ്മദ് ഫൈസല്, അഭി എന്നിവരാണ് കേസിലെ പ്രതികള്.
Recommended Video
മൊബൈല് ഫോണ് കേന്ദ്രീകരിച്ച് നടത്തിയ അന്വേഷണത്തിലാണ് ഇവരില് മൂന്ന് പേരെ ആലപ്പുഴ കരുവാറ്റയില് നിന്ന് പിടികൂടിയത്. കണ്ണൂര് സ്വദേശിയായ മറ്റൊരു പ്രതി മുഹമ്മദ് ഫൈസലിനെ കുറ്റൂരിലെ വാടക മുറിയില് നിന്നുമാണ് പൊലീസ് പിടികൂടിയത്. എടത്വായില് നിന്നാണ് അബിയെ പിടികൂടിയത്. യുവമോര്ച്ച പെരിങ്ങര പഞ്ചായത്ത് കമ്മിറ്റിയുടെ മുന് പ്രസിഡന്റാണ് മുഖ്യപ്രതി ജിഷ്ണു രഘു.
വ്യക്തിവൈരാഗ്യമാണ് കൊലപാതകത്തിലേക്ക് നയിച്ചതെന്നാണ് പൊലീസ് പറയുന്നത്. എന്നാല് പൊലീസ് വാദങ്ങളെ തള്ളുകയാണ് സിപിഎം. രാഷ്ട്രീയ കൊലപാതകമെണെന്നാണ് സിപിഎം പറയുന്നത്. പിന്നില് ആര്എസ്എസ് ആണെന്നും സിപിഎം ആരോപിച്ചിരുന്നു. അതേ സമയം സിപിഎമ്മിന്റെ ആരോപണങ്ങളെ ബിജെപി തള്ളുകയായിരുന്നു. കൊലക്കേസില് പൊലീസിന്റെ പിടിയിലായ പ്രതികളില് രണ്ട് പേര് ഡിവൈഎഫ്ഐ പ്രവര്ത്തകരാണെന്ന് ബിജെപിയുടെ ആരോപണം. സംഘപരിവാറിന് കൊലപാതകവുമായി ബന്ധമില്ലെന്നും ബിജെപി നേതാക്കള് പറഞ്ഞു.
Click it and Unblock the Notifications
Sign in with Google