വിഭാഗിയത രൂക്ഷം; കരുനാഗപ്പള്ളിയില്‍ ഏരിയ കമ്മിറ്റി പിരിച്ചുവിട്ട് സിപിഎം

കൊല്ലം: കരുനാ​ഗപ്പള്ളിയിലെ വിഭാ​ഗീയതയിൽ കടുത്ത നടപടിയുമായി സി പി എം. ഏരിയ കമ്മിറ്റി പിരിച്ച് വിട്ട് അഡ്ഹോക് കമ്മിറ്റിക്ക് ചുമതല കൈമാറി. ഉൾ‌പ്പാർട്ടി വിഭാ​ഗീയത പരസ്യ പ്രതിഷേധത്തിലേക്ക് നീങ്ങിയതിന് പിന്നാലെയാണ് നടപടി ഉണ്ടായത്. ലോക്കൽ സമ്മേളനങ്ങൾ അലങ്കോലപ്പെട്ടതിന് പിന്നാലെ നേതൃത്വം കടുത്തനിലപാട് സ്വീകരിക്കുകയായിരുന്നു. സി പി എം സംസ്ഥാന സെക്രട്ടറി എം വി ​ഗോവിന്ദൻ ഇന്ന് കൊല്ലത്ത് എത്തി ജില്ലാ സെക്രട്ടറിയേറ്റ് , ജില്ലാ കമ്മിറ്റി യോ​ഗങ്ങളിൽ പങ്കെടുത്തിരുന്നു. യോ​ഗത്തിന് പിന്നാലെയാണ് ഏരിയ കമ്മിറ്റി പിരിച്ചുവിടാനുള്ള തീരുമാനം ഉണ്ടായത്.

ലോക്കൽ കമ്മിറ്റികളിലിണ്ടായ പ്രശ്നം പാർട്ടിക്ക് ആകെ പ്രയാസമുണ്ടാക്കിയെന്ന് എം വി ​ഗോവിന്ദൻ പറഞ്ഞു. അം​ഗീകരിക്കാനാവാത്ത പ്രശ്നങ്ങളാണെന്നും തെറ്റായ പ്രവണതകൾ‌ക്കെതിരെ ശക്തമായ നടപടി സ്വീകകരിക്കുമെന്നും അദ്ദേഹം പറഞ്ഞു. കരുനാ​ഗപള്ളിയിലേത് പ്രാദേശിക വിഷയമാണെന്നും ജില്ലയിലാകെയുള്ള പ്രശ്നമല്ലെന്നും അദ്ദേഹം പറഞ്ഞു.

കേരളത്തിൽ 207 ഏരിയ സമ്മേളനങ്ങളാണ് നടക്കേണ്ടത്. കൊല്ലത്ത് 17 ഏരിയ സമ്മേളനങ്ങളും വളരെ ആരോ​ഗ്യകരമായാണ് പൂർത്തിയാക്കിയത്. എന്നാൽ ഇവയിൽ നിന്ന് വ്യത്യസ്തമായ ചിത്രമാണ് കരുനാ​ഗപ്പള്ളി ഏരിയയിൽ ഉണ്ടായതെന്നും എം വി ​ഗോവിന്ദൻ പറഞ്ഞു.
കരുനാ​ഗപ്പള്ളിയിലെ തെറ്റായ പ്രവണതയുമാഇ ബന്ധപ്പെട്ട് പാർട്ടി സംസ്ഥാന കമ്മിറ്റിയിലെ സഖാക്കൾ സമ്മേളനത്തിന്റെ ഭാ​ഗമായി ജില്ലാ കമ്മിറ്റിയും ഏരിയ കമ്മിറ്റിയും ചേരുകയും പാർട്ടി സംവിധാനത്തെ യോജിച്ച് കൈകാര്യം ചെയ്യണമെന്ന് നിർദ്ദേശിക്കുകയും ചെയ്തിരുന്നു.

എന്നാൽ സമ്മേളനം ആരംഭിച്ചപ്പോൾ ചില കമ്മിറ്റിക​ളിൽ പ്രശ്നങ്ങൾ ഉയർന്നുവന്നു. അത് കൈകാര്യം ചെയ്യാൻ പാർട്ടി ശ്രമിച്ചപ്പോൾ വളരെ തെറ്റായ നിലയിലാണ് ചില ലോക്കലുകളിൽ സമ്മേളന പൂർത്തീകരണത്തിന്റെ ഭാ​ഗമായി എടുക്കേണ്ട ചില നിലപാടുകൾ പൂർത്തിയാക്കാൻ സാധിക്കാതെ വന്നതെന്ന് എം വി ​ഗോവിന്ദൻ പറഞ്ഞു.

ടി മനോഹരൻ കൺവീനറായാണ് പുതിയ അഡ്ഹോക് കമ്മിറ്റി രൂപീകരിച്ചത്. എസ് എൽ സജികുമാർ, എസ് ആർ അരുൺ ബാബു. പി വി സത്യദേവൻ, എൻ സന്തോഷ്, ജി മുരളീധരൻ, ബി ഇക്ബാൽ എന്നിവർ കമ്മിറ്റിയിൽ അം​ഗങ്ങളാണ്. കരുനാ​ഗപ്പള്ളി ഏരിയ കമ്മിറ്റിക്ക് കീഴിലെ ഭൂരിഭാ​ഗം ലോക്കൽ സമ്മേളനങ്ങളിലും തർക്കിത്തിലെത്തിയിരുന്നു. കഴിഞ്ഞ ദിവസം നടന്ന കുലശേഖരപുരം നോർത്ത് ലോക്കൽ സമ്മേളനത്തിലും പ്രശ്നങ്ങൾ ഉണ്ടായി.

സംസ്ഥാന കമ്മിറ്റി അം​ഗങ്ങളായ കെ രാജ​ഗോപാൽ, കെ സോമപ്രസാദ് എന്നിവരെ അടക്കം തടഞ്ഞുവെച്ചിരുന്നു.. ജില്ലാ കമ്മിറ്റി അം​ഗം പി ആർ വസന്തൻ നേതൃത്വം നൽകുന്ന സംഘം കരുനാ​ഗപ്പള്ളിയിലെ പാർട്ടിയെ തകർത്തതെന്ന് വിമത വിഭാ​ഗം ആരോപിച്ചിരുന്നു. ഇതിനു പിന്നാലെയാണ് ഏരിയ കമ്മിറ്റി പിരിച്ച് വിടുന്ന നടപടിയിലേക്ക് സി പി എം എത്തുന്നത്.

‌

‌