യുഎഇയിലെ പ്രവാസികൾക്ക് ആശ്വാസവാർത്ത; വിമാന ടിക്കറ്റ് നിരക്ക് കുറയുന്നു, കൂടുതൽ സർവീസുകൾ തുണയായി
ദുബായ്: വേനലവധിക്കാലത്ത് നാട്ടിലേക്ക് മടങ്ങാൻ ഒരുങ്ങുന്ന യുഎഇയിലെ ഇന്ത്യൻ പ്രവാസികൾക്ക് ആശ്വാസവാർത്ത. കഴിഞ്ഞ ഏതാനും ആഴ്ചകളായി കുത്തനെ ഉയർന്നിരുന്ന യുഎഇ-ഇന്ത്യ വിമാന ടിക്കറ്റ് നിരക്കിൽ നേരിയ കുറവ് രേഖപ്പെടുത്തിയിരിക്കുകയാണ് ഇപ്പോൾ. കൂടുതൽ വിമാന സർവീസുകൾ പുനരാരംഭിച്ചതും എയർലൈൻ കമ്പനികൾ അധിക സർവീസുകൾ ആരംഭിച്ചതുമാണ് നിരക്ക് കുറയാൻ പ്രധാന കാരണം.
എങ്കിലും നിരക്ക് ഇപ്പോഴും കഴിഞ്ഞ വർഷത്തെ അപേക്ഷിച്ച് ഉയർന്ന നിലയിലാണ്. ജൂലൈ, ഓഗസ്റ്റ് മാസങ്ങളിലെ യാത്രാ തിരക്ക് ശക്തമാകുന്നതിനനുസരിച്ച് ടിക്കറ്റ് നിരക്ക് വീണ്ടും ഉയരാൻ സാധ്യതയുണ്ടെന്നാണ് വിലയിരുത്തൽ. ഈ മാസം ആദ്യം യുഎഇയിൽ നിന്ന് ഇന്ത്യയിലേക്കുള്ള വിമാന സർവീസുകളിൽ സീറ്റുകളുടെ ലഭ്യത കുറഞ്ഞതും വേനലവധിക്കാലത്തെ വലിയ യാത്രാ ആവശ്യകതയും പശ്ചിമേഷ്യയിലെ സംഘർഷങ്ങളും ചേർന്നതോടെ വിമാന ടിക്കറ്റ് നിരക്ക് റെക്കോർഡ് ഉയരത്തിലെത്തിയിരുന്നു.
ചില റൂട്ടുകളിൽ ഒരു ടിക്കറ്റിന് 3,500 മുതൽ 3,600 ദിർഹം വരെ ഈടാക്കിയിരുന്നു. ജൂലൈയിലെ ചില സർവീസുകളിൽ നിരക്ക് 3,000 ദിർഹത്തിന് മുകളിലെത്തുകയും ചെയ്തു. എന്നാൽ കഴിഞ്ഞ ദിവസങ്ങളിലായി കൂടുതൽ വിമാന സർവീസുകൾ ലഭ്യമായതോടെ കേരളത്തിലേക്കുള്ള ചില റൂട്ടുകളിൽ ടിക്കറ്റ് നിരക്ക് 2,600 ദിർഹം വരെ താഴ്ന്നിട്ടുണ്ട്. ഇന്ത്യൻ എയർലൈൻ കമ്പനികൾ സർവീസുകളുടെ എണ്ണം വർധിപ്പിക്കുകയും സീറ്റുകളുടെ ലഭ്യത മെച്ചപ്പെടുകയും ചെയ്തതാണ് നിരക്കിൽ കുറവുണ്ടാകാൻ കാരണമായത്.
കേരളത്തിലേക്കുള്ള റൂട്ടുകളിൽ മറ്റ് സംസ്ഥാനങ്ങളെ അപേക്ഷിച്ച് ചെറിയ ആശ്വാസമാണ് ഇപ്പോൾ അനുഭവപ്പെടുന്നത്. ചില വിമാനങ്ങളിൽ സീറ്റുകൾ പൂർണമായി ബുക്ക് ചെയ്യപ്പെടാത്തതിനാൽ എയർലൈൻ കമ്പനികൾ നിരക്കിൽ ചെറിയ ഇളവ് നൽകുന്നുണ്ട്. അടുത്തിടെ കൊച്ചിയിലേക്കുള്ള ടിക്കറ്റ് നിരക്ക് ഏകദേശം 25,000 രൂപ വരെ എത്തിയിരുന്നെങ്കിലും ഇപ്പോൾ അതിൽ നേരിയ കുറവ് രേഖപ്പെടുത്തിയിട്ടുണ്ട്. കോഴിക്കോട്ടേക്കുള്ള ടിക്കറ്റ് നിരക്കിലും കുറവുണ്ടായിട്ടുണ്ട്.
ലോകത്തിലെ ഏറ്റവും തിരക്കേറിയ അന്താരാഷ്ട്ര വ്യോമപാതകളിലൊന്നാണ് യുഎഇ-ഇന്ത്യ റൂട്ട്. തൊഴിൽ, വ്യാപാരം, വിനോദസഞ്ചാരം, കുടുംബസന്ദർശനം എന്നിവയ്ക്കായി പ്രതിവർഷം ലക്ഷക്കണക്കിന് യാത്രക്കാരാണ് ഈ റൂട്ടിലൂടെ സഞ്ചരിക്കുന്നത്. പ്രത്യേകിച്ച് ജൂൺ മുതൽ ഓഗസ്റ്റ് വരെ സ്കൂൾ അവധിയും വേനൽക്കാല യാത്രകളും കാരണം യാത്രക്കാരുടെ എണ്ണം കുത്തനെ വർധിക്കുന്ന പതിവുണ്ട്. അതിനാൽ എയർലൈൻ കമ്പനികൾ കുറഞ്ഞ നിരക്കിലുള്ള ടിക്കറ്റുകൾ ആദ്യം വിറ്റഴിച്ച ശേഷം ശേഷിക്കുന്ന സീറ്റുകൾക്ക് ഉയർന്ന നിരക്കാണ് ഈടാക്കുന്നത്.
പശ്ചിമേഷ്യയിലെ സംഘർഷങ്ങളെ തുടർന്ന് കഴിഞ്ഞ ആഴ്ചകളിൽ ചില വിമാനങ്ങൾ റദ്ദാക്കുകയും ചില സർവീസുകൾ ദൈർഘ്യമേറിയ വ്യോമപാതകളിലൂടെ സർവീസ് നടത്തുകയും ചെയ്തിരുന്നു. ഇതും ടിക്കറ്റ് നിരക്ക് ഉയരാൻ കാരണമായിരുന്നു. എന്നാൽ നിലവിൽ സാഹചര്യം ക്രമേണ സാധാരണ നിലയിലേക്ക് മടങ്ങുന്നതിനാൽ വിമാന സർവീസുകളുടെ എണ്ണവും വർധിക്കുകയാണ്.
അടുത്ത ഏതാനും ആഴ്ചകൾക്കുള്ളിൽ കേരളത്തിലെ വിമാനത്താവളങ്ങളായ കൊച്ചി, കോഴിക്കോട്, കണ്ണൂർ, തിരുവനന്തപുരം എന്നിവിടങ്ങളിലേക്ക് കൂടുതൽ സർവീസുകൾ ആരംഭിക്കുമെന്നാണ് പ്രതീക്ഷ. ഇതോടെ സീറ്റുകളുടെ ലഭ്യത വീണ്ടും മെച്ചപ്പെടുകയും ടിക്കറ്റ് നിരക്ക് കൂടുതൽ സാധാരണ നിലയിലേക്ക് എത്തുകയും ചെയ്യുമെന്നാണ് പ്രവാസികളുടെ പ്രതീക്ഷ.
Click it and Unblock the Notifications
Sign in with Google