കറി പൗഡറുകളില് മായം: സംസ്ഥാനത്ത് പരിശോധന വ്യാപകമാക്കാന് ആരോഗ്യവകുപ്പ്
തിരുവനന്തപുരം: 'നല്ല ഭക്ഷണം നാടിന്റെ അവകാശം' എന്ന കാമ്പയിന്റെ ഭാഗമായി കറി പൗഡറുകളില് മായമുണ്ടോ എന്നറിയാനുള്ള പരിശോധന വ്യാപകമാക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ്. ഭക്ഷ്യസുരക്ഷാ വകുപ്പിന്റെ പ്രത്യേക സ്ക്വാഡുകളായിരിക്കും ജില്ലകളില് പരിശോധന നടത്തുക.
ഏതെങ്കിലും ബാച്ചുകളില് ഭക്ഷ്യയോഗ്യമല്ലാത്ത സാമ്പിളുകള് കണ്ടെത്തിയാല് ലഭ്യമായ ആ ബാച്ചിലെ കറിപൗഡറുകള് പൂര്ണമായും വിപണിയില് നിന്നു പിന്വലിക്കാന് കര്ശന നടപടി സ്വീകരിക്കും. വില്പ്പനക്കാരനും കമ്പനിയ്ക്കും നോട്ടീസ് നല്കുന്നതാണ്. മായം കലര്ത്തുന്നവര്ക്കെതിരെ നിയമാനുസൃതമായ കര്ശന നടപടി സ്വീകരിക്കുമെന്നും മന്ത്രി വ്യക്തമാക്കി.
കറി പൗഡറുകളിലെ മായം കണ്ടെത്താന് പരിശോധന കര്ശനമാക്കുന്നതാണ്. കറി പൗഡറുകള് പരിശോധന നടത്താന് മൊബൈല് ലാബുകളും ഉപയോഗിക്കും. എഫ്.എസ്.എസ്.എ.ഐ. പറയുന്ന സ്റ്റാന്ഡേര്ഡില് വ്യത്യാസം കണ്ടെത്തിയാല് നടപടി സ്വീകരിക്കുന്നതാണ്.
സര്ക്കാരിന്റെ നിര്ദേശത്തെ തുടര്ന്ന് ഭക്ഷ്യസുരക്ഷ വകുപ്പ് പരിശോധനകള് ശക്തമായി തുടരുകയാണ്. സംസ്ഥാന വ്യാപകമായി ഇന്നലെവരെ 9,005 പരിശോധനകളാണ് നടത്തിയത്. 382 കടകള്ക്കെതിരെ നടപടി സ്വീകരിച്ചു. 1230 സ്ഥാപനങ്ങള്ക്ക് നോട്ടീസ് നല്കി. ഓപ്പറേഷന് മത്സ്യയുടെ ഭാഗമായി 6278 പരിശോധനകള് നടത്തി. 28,692 കിലോഗ്രാം കേടായ മത്സ്യം നശിപ്പിച്ചു. 181 പേര്ക്ക് നോട്ടീസ് നല്കി. ഓപ്പറേഷന് ജാഗറിയുടെ ഭാഗമായി 1539 പരിശോധനകള് നടത്തി. പഴകിയ എണ്ണ കണ്ടെത്താനായി 665 പരിശോധനകള് നടത്തി. 1558 ജൂസ് കടകള് പരിശോധിച്ചു.
ഉഫ്...ഒന്നും പറയാനില്ല, ഇത് ഒരു ഒന്നൊന്നര ലുക്ക്; ദീപ്തിയുടെ വൈറല് ചിത്രങ്ങള്
അതേസമയം, സംസ്ഥാനത്തെ ഹോട്ടലുകള്ക്ക് ഭക്ഷ്യസുരക്ഷാ വകുപ്പ് ഹൈജീന് സ്റ്റാര് സര്ട്ടിഫിക്കറ്റ് ലഭ്യമാക്കി തുടങ്ങിയിരുന്നു. ആകെ 673 സ്ഥാപനങ്ങളാണ് ഹൈജീന് സര്ട്ടിഫിക്കറ്റിനായി ഭക്ഷ്യ സുരക്ഷാ വകുപ്പ് തെരഞ്ഞടുത്തത്. അതില് ഇതുവരെ 519 ഹോട്ടലുകള്ക്കാണ് ഹൈജീന് സ്റ്റാര് സര്ട്ടിഫിക്കറ്റ് നല്കിയത്.
ഹൈജീന് സ്റ്റാര് സര്ട്ടിഫിക്കറ്റ് ലഭിച്ച സ്ഥാപനങ്ങളുടെ വിശദാംശങ്ങള് ഭക്ഷ്യ സുരക്ഷാ വകുപ്പിന്റെ വെബ് സൈറ്റില് ലഭ്യമാക്കുന്നതാണ്. ഇതോടൊപ്പം ഭക്ഷ്യ സുരക്ഷാ വകുപ്പ് പുതുതായി സജ്ജമാക്കുന്ന ആപ്പിലൂടെയും തൊട്ടടുത്ത് സര്ട്ടിഫിക്കറ്റുകളുള്ള ഹോട്ടലുകളറിയാന് സാധിക്കും. ഇതിലൂടെ പ്രദേശത്തെ ഏറ്റവും വൃത്തിയുള്ള സ്ഥാപനങ്ങളേതെന്ന് കണ്ടെത്താന് കഴിയുന്നതാണ്.
പരിശോധനകള്ക്കും നടപടിക്രമങ്ങള്ക്കും ശേഷം ത്രീ സ്റ്റാര് മുതല് ഫൈവ് സ്റ്റാര് വരെയുള്ള റേറ്റിംഗാണ് നല്കുന്നത്. കടകള് വലുതോ ചെറുതോ എന്നതല്ല സുരക്ഷിതമായ ഭക്ഷണവും വൃത്തിയുള്ള സാഹചര്യവുമാണ് വളരെ പ്രധാനം. വൃത്തിയോടൊപ്പം നാല്പ്പതോളം ഭക്ഷ്യ സുരക്ഷാ മാനദണ്ഡങ്ങള് പാലിച്ചാണ് റേറ്റിംഗ് നല്കുന്നത്. ഫൈവ് സ്റ്റാര് റേറ്റിംഗുള്ള സ്ഥാപനങ്ങള് ഗ്രീന് കാറ്ററിയിലും ഫോര് സ്റ്റാര് റേറ്റിംഗുള്ള സ്ഥാപനങ്ങള് ബ്ലൂ കാറ്റഗറിയിലും ത്രീ സ്റ്റാര് റേറ്റിംഗുള്ള സ്ഥാപനങ്ങള് യെല്ലോ കാറ്റഗറിയിലുമാണ് വരിക. ത്രീ സ്റ്റാറിന് താഴെയുള്ളവര്ക്ക് റേറ്റിംഗ് നല്കുന്നതല്ല. അവര് ഈ മാനദണ്ഡങ്ങളൊന്നും പാലിക്കുന്നില്ലെന്നാണ് അര്ത്ഥമാക്കുന്നത്.
രണ്ട് വര്ഷത്തേയ്ക്കുള്ള സ്റ്റാര് റേറ്റിംഗാണ് നല്കുന്നത്. രണ്ട് വര്ഷത്തിന് ശേഷം മാനദണ്ഡങ്ങള് പാലിച്ച് വീണ്ടും റേറ്റിംഗ് നിലനിര്ത്താവുന്നതാണ്. റേറ്റിംഗ് ലഭ്യമായ സ്ഥാപനങ്ങള് സര്ട്ടിഫിക്കറ്റ്, ഭക്ഷ്യ സുരക്ഷാ വകുപ്പിന്റെ ഫോണ് നമ്പര് ഉള്പ്പെടെ പ്രദര്ശിപ്പിക്കണം. ഈ സ്ഥാപനങ്ങളെ ഭക്ഷ്യ സുരക്ഷാ വകുപ്പ് നിരീക്ഷിക്കുന്നതാണ്. ഓരോ ഹോട്ടലിലും മാനദണ്ഡങ്ങള് കൃത്യമായി പാലിച്ച് റേറ്റിംഗ് ഉയര്ത്താവുന്നതാണ്. ഇതിലൂടെ ഹോട്ടലുകള് തമ്മിലുള്ള ആരോഗ്യകരമായ മത്സരം ഉണ്ടാക്കാനും അവരുടെ കച്ചവടം ഉയര്ത്താനും പൊതുജനങ്ങള്ക്ക് സുരക്ഷിതമായ ഭക്ഷണം ഉറപ്പാക്കാനും സാധിക്കും
Click it and Unblock the Notifications
Sign in with Google