മുഖ്യമന്ത്രിയെ അധിക്ഷേപിച്ചത് ടെറിട്ടോറിയല്‍ ആര്‍മി ഉദ്യോഗസ്ഥന്‍....സൈബര്‍ പോലീസ് കേസെടുത്തു

തിരുവനന്തപുരം: െൈസനിക വേഷം ധരിച്ച് മുഖ്യമന്ത്രി പിണറായി വിജയനെയും കേരളത്തിലെ ദുരിതാശ്വാസ പ്രവര്‍ത്തനങ്ങളെയും അധിക്ഷേപിച്ച യുവാവിനെ കുറിച്ചുള്ള വിവരങ്ങള്‍ പുറത്ത്. ഇയാള്‍ ടെറിട്ടോറിയല്‍ ആര്‍മി ഉദ്യോസ്ഥനാണെന്ന് സൈബര്‍ ഉദ്യോഗസ്ഥര്‍ കണ്ടെത്തി. ഇയാള്‍ സൈനിക ഉദ്യോഗസ്ഥനല്ലെന്ന് നേരത്തെ സൈന്യം വ്യക്തമാക്കിയിരുന്നു. എന്നാല്‍ സൈനിക വൃത്തങ്ങളുമായി ഇയാള്‍ക്ക് ബന്ധമുണ്ടെന്നാണ് ഇപ്പോഴത്തെ റിപ്പോര്‍ട്ട്. പത്തനംതിട്ട സ്വദേശിയായ കെഎസ് ഉണ്ണിയാണ് വീഡിയോ പോസ്റ്റ് ചെയ്തതെന്ന് അന്വേഷണത്തില്‍ നിന്ന് കണ്ടെത്തുകയായിരുന്നു. യുവാവിനെ കുറിച്ചുള്ള വിവരങ്ങള്‍ പോലീസ് ശേഖരിച്ചിട്ടുണ്ട്.

അതേസമയം ഇയാള്‍ക്കെതിരെ പോലീസ് കേസെടുത്തിട്ടുണ്ട്. ആള്‍മാറാട്ടം, പൊതുജനശല്യം, എന്നീ വകുപ്പുകള്‍ പ്രകാരമാണ് കേസ്. കര്‍ശന നടപടിയുണ്ടാവുമെന്ന് ഡിജിപി ലോക്‌നാഥ് ബെഹ്‌റയും പറഞ്ഞിട്ടുണ്ട്. കേരളത്തിലെ ദുരിതാശ്വാസ പ്രവര്‍ത്തനങ്ങള്‍ സൈന്യത്തെ ഏല്‍പ്പിക്കണമെന്നും എന്നാല്‍ ഭരണം നഷ്ടമാകുമെന്ന് ഭയന്ന് പിണറായി സൈന്യത്തെ വിളിക്കാത്തതെന്നുമായിരുന്നു ഇയാള്‍ വീഡിയോയിലൂടെ പറഞ്ഞത്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനെതിരെയും ഇയാള്‍ പരാമര്‍ശങ്ങള്‍ നടത്തിയിരുന്നു. തുടര്‍ന്ന് ഇയാള്‍ സൈനികനല്ലെന്ന് കരസേന അറിയിക്കുകയായിരുന്നു. ഇത്തരം വ്യാജ പ്രചാരണങ്ങളില്‍ വീഴരുതെന്നും സൈന്യം അറിയിച്ചിരുന്നു.

മുഖ്യമന്ത്രിയുടെ ദുരിതാശ്വാസ നിധിയിലേക്ക് നിങ്ങള്‍ക്കും സംഭാവന നല്‍കാം. ഇതാണ് സംഭാവനകള്‍ അയക്കാനുള്ള വിവരം.

Name of Donee: CMDRF
Account number : 67319948232
Bank: State Bank of India
Branch: City branch, Thiruvananthapuram
IFSC Code: SBIN0070028
Swift Code: SBININBBT08

keralacmdrf@sbi എന്ന യുപിഐ ഐഡി വഴിയും സംഭാവനകള്‍ നല്‍കാവുന്നതാണ്.

English summary

kerala flood 2018 case against territorial army jawan