പ്ലസ് വണ് പ്രവേശനം: നിയമസഭകക്ഷി യോഗത്തില് വിദ്യാഭ്യാസ വകുപ്പിന് സിപിഎമ്മിന്റെ കുറ്റപ്പെടുത്തല്
തിരുവനന്തപുരം : വിദ്യാഭ്യാസ വകുപ്പിനെതിരെ വിമര്ശനവുമായി സി പി എം എം എല് എമാര്. പ്ലസ് വണ് പ്രവേശനവുമായി ബന്ധപ്പെട്ട് ഉടലെടുത്ത പ്രതിസന്ധിയുടെ പശ്ചാത്തലത്തിലാണ് വിമര്ശനം ഉയര്ന്നിരിക്കുന്നത്. ചൊവ്വാഴ്ച ചേര്ന്ന നിയമസഭ കക്ഷി യോഗത്തിലാണ് വിമര്ശനം ഉയര്ന്നതെന്ന് ഏഷ്യാനെറ്റ് റിപ്പോര്ട്ട് ചെയ്യുന്നു. എ പ്ലസ് കണക്കനുസരിച്ച് സീറ്റുണ്ടോയെന്ന് പരിശോധിച്ചില്ലെന്ന് അംഗങ്ങള് കുറ്റപ്പെടുത്തി. സംസ്ഥാനമാകെ ഒരു യൂണിറ്റായി എടുത്തതിലും വിമര്ശനമുണ്ടായി. പ്രതിസന്ധിയുള്ള ജില്ലകളില് കൂടുതല് സീറ്റ് അനുവദിക്കണമെന്ന ആവശ്യമാണ് ഉയര്ന്നത്.
കഴിഞ്ഞ വര്ഷത്തേക്കാള് ഇരട്ടിയിലേറെ പേര്ക്ക് മുഴുവന് എ പ്ലസ് ലഭിച്ചതാണ് ഇപ്പോഴത്തെ പ്രതിസന്ധിക്ക് കാരണമായത് . എ പ്ലസിന്റെ കണക്ക് അറിയാതെ ആണോ സീറ്റുകളുടെ താരതമ്യം വകുപ്പ് നടത്തിയതെന്ന ചോദ്യം യോഗത്തില് ഉയര്ന്നു. സി പി എം അംഗങ്ങളില് ഭൂരിഭാഗം പേരും വിദ്യാഭ്യാസ വകുപ്പിനെതിരെ വിമര്ശനം ഉന്നയിച്ചു. ജില്ലകളുടെ ആവശ്യാനസരണം സീറ്റ് ക്രമീകരണം വരുത്തണമെന്ന ആവശ്യം യോഗത്തില് ഉയര്ന്നിട്ടുണ്ട്.
85000 ത്തോളം വരുന്ന വിദ്യാര്ത്ഥികള്ക്ക് ഇപ്പോഴും പ്ലസ് വണ് സീറ്റില്ലെന്ന് നേരത്തെ വിദ്യാഭ്യാസ മന്ത്രി വി ശിവന്കുട്ടി അറിയിച്ചിരുന്നു. താലൂക്ക് അടിസ്ഥാനത്തില് കണക്കെടുത്ത് സീറ്റ് ക്ഷാമം പരിഹരിക്കുമെന്ന് നിയമസഭയില് മന്ത്രി ഉറപ്പ് നല്കിയിരുന്നു. എന്നാല് പ്ലസ് വണ് പ്രവേശനവുമായി ബന്ധപ്പെട്ട് നേരത്തെ പ്രതിപക്ഷവും രംഗത്തെത്തിയിരുന്നു. പുതിയ ബാച്ച് അനുവദിക്കാതെ സര്ക്കാര് വിദ്യാര്ത്ഥികളുടെ നീറുന്ന പ്രശ്നത്തോട് മുഖംതിരിക്കുകയാണെന്ന് പ്രതിപക്ഷം കുറ്റപ്പെടുത്തിയിരുന്നു.
അതേ സമയം, പ്ലസ് വണ് പ്രവേശനവുമായി ബന്ധപ്പെട്ട് ആശങ്ക വേണ്ടെന്നാണ് മന്ത്രി നേരത്തെ അറിയിച്ചത്. മുഖ്യ ഘട്ടത്തിലെ രണ്ടാം അലോട്ട്മെന്റ് പ്രസിദ്ധീകരിച്ചപ്പോള് ഉള്ള സ്ഥിതിവിവര കണക്ക് അനുസരിച്ച് സംസ്ഥാനത്ത് ഏകജാലക രീതിയില് പ്രവേശനം നടത്തുന്ന 2, 70,188 സീറ്റുകളിലേയ്ക്ക് 4,65,219 വിദ്യാര്ത്ഥികള് അപേക്ഷിക്കുകയുണ്ടായി . ഇതില് മാതൃജില്ലയ്ക്ക് പുറമേ മറ്റ് ജില്ലകളിലും അപേക്ഷിച്ച 39, 489 പേരുണ്ടായിരുന്നു . ആയതിനാല് പ്രവേശനം നല്കേണ്ട യഥാര്ത്ഥ അപേക്ഷകര് 4, 25,730 മാത്രമാണ്.
വീണ്ടും ഹോട്ട് ലുക്കില് പ്രത്യക്ഷപ്പെട്ട് ഷാലിന് സോയ; കിടിലം ഫോട്ടോഷൂട്ടെന്ന് ആരാധകര്
Recommended Video
ഒന്നാം അലോട്ട്മെന്റില് 2,01,489 പേര് പ്രവേശനം നേടുകയുണ്ടായി. ഒന്നാം അലോട്ട്മെന്റില് 17,065 വിദ്യാര്ത്ഥികള് പ്രവേശനം തേടിയിട്ടില്ല . രണ്ടാമത്തെ അലോട്ട്മെന്റില് 68,048 അപേക്ഷകര്ക്ക് പുതിയതായി അലോട്ട്മെന്റ് ലഭിക്കുകയുണ്ടായി . കഴിഞ്ഞ അഞ്ച് വര്ഷത്തെ പ്രവേശന തോതനുസരിച്ചാകെ 3,85,530 അപേക്ഷകര് മാത്രമേ പ്ലസ് വണ് പ്രവേശനം തേടാന് സാധ്യതയുള്ളൂ. കഴിഞ്ഞ 5 വര്ഷത്തെ പ്രവേശന തോതനുസരിച്ചാണെങ്കില് പ്രവേശനം ലഭിക്കുന്നതിനായി ഇനി സംസ്ഥാനത്ത് ആകെ 91,796 അപേക്ഷകര് ബാക്കിയുണ്ട് .
അപേക്ഷിച്ച എല്ലാപേരും പ്ലസ് വണ് പ്രവേശനം തേടുകയാണെങ്കില് ആകെ 1,31,996 അപേക്ഷകര്ക്കാണ് പ്രവേശനം ഉറപ്പാക്കേണ്ടി വരുന്നത് . എയിഡഡ് സ്കൂളുകളിലെ കമ്മ്യൂണിറ്റി ക്വാട്ട സീറ്റുകളിലെ അലോട്ട്മെന്റ്,എയിഡഡ് സ്കൂളുകളിലെ മാനേജ്മെന്റ് ക്വാട്ട പ്രവേശനം , അണ് എയിഡഡ് സ്കൂളുകളിലെ പ്രവേശനം എന്നിവയൊക്കെ 2021 ഒക്ടോബര് 7 മുതല് ആരംഭിക്കുകയുള്ളു. ഇത്തരത്തില് ലഭ്യമായ സീറ്റുകളും ഒഴിവ് വരുന്ന സ്പോര്ട്സ് ക്വാട്ട സീറ്റുകള് പൊതു മെറിറ്റ് ക്വാട്ട സീറ്റുകളായി പരിവര്ത്തനം ചെയ്യുമ്പോള് ഉണ്ടാകുന്ന സീറ്റുകളും കൂടി കൂട്ടുമ്പോള് സംസ്ഥാനത്ത് ആകെ 1,22,384 സീറ്റുകള് ലഭ്യമാണ് . ഇതിനു പുറമെ വെക്കേഷണല് ഹയര് സെക്കന്ഡറി , പോളിടെക്നിക് , ഐടിഐ മേഖലകളിലായി 97,283 സീറ്റുകളും ലഭ്യമാണെന്നും മന്ത്രി അറിയിച്ചിരുന്നു .