ഖത്തര്‍ സര്‍പ്രൈസ് മൂവ്; ഇറാന് തിരിച്ചടി, ഇത് അപ്രതീക്ഷിത നീക്കം, പ്രവാസികള്‍ക്ക് വന്‍ ഓഫര്‍

Updated: Wednesday, March 4, 2026, 18:18 [IST]

ദോഹ: ഇറാനുമായി സൗഹൃദം നിലനിര്‍ത്തിയിരുന്ന രാജ്യമായിരുന്നു ഖത്തര്‍. സൗദി അറേബ്യയും ഇറാനും കൊമ്പു കോര്‍ത്ത വേളയില്‍ മധ്യസ്ഥതയ്ക്ക് തയ്യാറാണെന്ന് അറിയിച്ച രാജ്യം കൂടിയാണ് ഖത്തര്‍. അതേസമയം, പശ്ചിമേഷ്യയിലെ അമേരിക്കയുടെ ഏറ്റവും വലിയ സൈനിക താവളവും ഇവിടെയാണ്. അതുകൊണ്ടുതന്നെ ഖത്തറിന്റെ നീക്കങ്ങളെ അനുകൂലിക്കുന്നവരും എതിര്‍ക്കുന്നവരുമുണ്ട്.

അമേരിക്കയും ഇസ്രായേലും ചേര്‍ന്ന് ഇറാനില്‍ ആക്രമണം നടത്തിയ പിന്നാലെ ഇറാന്‍ പ്രത്യാക്രമണം നടത്തിയ രാജ്യങ്ങളിലൊന്ന് ഖത്തറായിരുന്നു. ഖത്തറിലെ അമേരിക്കന്‍ സേനാ ക്യാമ്പ്, എംബസി, മറ്റു കാര്യാലയങ്ങള്‍ എന്നിവയായിരുന്നു ഇറാന്റെ ലക്ഷ്യം. ഇറാന്‍ ആക്രമണം കടുപ്പിച്ചതോടെ ഖത്തര്‍ പ്രതിരോധവും കൂട്ടി. എന്നാല്‍ ഇപ്പോള്‍ ഖത്തര്‍ നടത്തിയ നീക്കം ഇറാന് വലിയ തിരിച്ചടിയായി.

ഖത്തര്‍ പോലീസ് 10 പേരെ പിടികൂടിയിരിക്കുകയാണ്. ഇറാന്റെ വിപ്ലവ സേനയുമായി ബന്ധപ്പെട്ട് പ്രവര്‍ത്തിച്ചിരുന്നവരാണ് ഇവര്‍ എന്നാണ് ആരോപണം. രണ്ട് സ്ലീപ്പര്‍ സെല്ലുകള്‍ തകര്‍ത്തുവെന്ന് ഖത്തര്‍ പറയുന്നു. ഇറാന്റെ വിപ്ലവ സേനയ്ക്ക് ഖത്തറിലെ തന്ത്രപ്രധാന സ്ഥലങ്ങള്‍, വിവരങ്ങള്‍ എന്നിവ കൈമാറുകയായിരുന്നുവത്രെ അറസ്റ്റിലായവരുടെ ദൗത്യം.

ഖത്തറിലെ സൈനിക കേന്ദ്രങ്ങളെ കുറിച്ച് വിവരം കൈമാറുകയായിരുന്നു ഏഴ് പേരുടെ ദൗത്യം. രഹസ്യ ഓപറേഷനുകള്‍ നടത്തുക എന്ന ദൗത്യമായിരുന്നു മറ്റു മൂന്ന് പേര്‍ക്കുണ്ടായിരുന്നത് എന്നും ഖത്തര്‍ ന്യൂസ് ഏജന്‍സി റിപ്പോര്‍ട്ട് ചെയ്തു. ഇറാന്‍ സൈന്യവുമായി ചേര്‍ന്ന് പ്രവര്‍ത്തിച്ചു വരികയാണെന്ന് ഇവര്‍ ചോദ്യം ചെയ്യലില്‍ സമ്മതിച്ചുവെന്നും റിപ്പോര്‍ട്ടിലുണ്ട്.

അമേരിക്കയുടെ കേന്ദ്രങ്ങള്‍ ലക്ഷ്യമിട്ടാണ് ആക്രമണം നടത്തുന്നത് എന്നാണ് ഇറാന്‍ പറയുന്നത്. എന്നാല്‍ വിമാനത്താവളങ്ങള്‍, ഹോട്ടലുകള്‍ എന്നിവയെല്ലാം ആക്രമിക്കപ്പെട്ടു. ഇതാണ് ഖത്തര്‍ ഉള്‍പ്പെടെയുള്ള ജിസിസി രാജ്യങ്ങള്‍ ചൂണ്ടിക്കാട്ടുന്നത്. എല്ലാ പരിധിയും വിട്ടാണ് ഇറാന്റെ നീക്കങ്ങള്‍ എന്നും ഖത്തര്‍ മുന്നറിയിപ്പ് നല്‍കി. 101 ബാലസ്റ്റിസ് മിസൈല്‍, മൂന്ന് ക്രൂയിസ് മിസൈല്‍, 39 ഡ്രോണ്‍ എന്നിവയാണ് ഇറാന്‍ ഖത്തറിലേക്ക് അയച്ചത്.

ഖത്തര്‍ വിസാ കാലാവധി നീട്ടിയത് അനുഗ്രഹം

എല്ലാ വിസകളുടെയും കാലാവധി ഒരു മാസത്തേക്ക് നീട്ടാന്‍ ഖത്തര്‍ തീരുമാനിച്ചു. കാലാവധി തീരുന്ന വിസ കൈവശമുള്ളവര്‍ക്ക് ആശങ്ക വേണ്ട. കഴിഞ്ഞ ദിവസങ്ങളില്‍ കാലാവധി തീര്‍ന്ന എന്‍ട്രി വിസ കൈവളമുള്ളവരും പേടിക്കേണ്ട. ഈ മാസം അവസാനം വരെ എല്ലാ വിസകള്‍ക്കും കാലാവധിയുണ്ടാകുമെന്ന് ഖത്തര്‍ ആഭ്യന്തര മന്ത്രാലയം അറിയിച്ചു.

വിസ പുതുക്കുന്നതിന് പ്രത്യേക ഫീസ് നല്‍കേണ്ടതില്ല. വിസ പുതുക്കുന്നതിന് ഖത്തറിലെ സര്‍ക്കാര്‍ ഓഫീസ് സന്ദര്‍ശിക്കേണ്ടതില്ല. അപേക്ഷയും വേണ്ട. ഇലക്ട്രോണിക് സംവിധാനങ്ങളില്‍ ഓട്ടോമാറ്റിക്ക് ആയി വിസയുടെ കാലാവധി പുനക്രമീകരിക്കുകയാണ് ചെയ്യുക. എന്നാല്‍ യുദ്ധം തുടങ്ങുന്നതിന് മുമ്പ് വിസാ കാലാവധി പൂര്‍ത്തിയായവര്‍ ആണെങ്കില്‍ പിഴ ഒടുക്കേണ്ടി വരും.