മാനഭംഗം: പൊലീസ് കോണ്സ്റ്റബിള് അറസ്റ്റില്
സാംഗ്ലി(മഹാരാഷ്ട്ര): ഇരുപത്തിയേഴുകാരിയെ മാനഭംഗപ്പെടുത്തുകയും ഭീഷണിപ്പെടുത്തുകയും ചെയ്ത കേസില് പൊലീസ് കോണ്സ്റ്റബിള് അറസ്റ്റിലായി.
മഹാരാഷ്ട്രയിലെ മാഡി പോലീസ് സ്റ്റേഷനിലെ കോണ്സ്റ്റബിള് സന്ദീപ് കാംബ്ലെയാണ് അറസ്റ്റിലായത്. കാംബ്ലെയുടെ ഒരു സുഹൃത്തിന്റെ അയല്പ്പക്കക്കാരിയായിരുന്ന യുവതിയാണ് പീഡനത്തിന് ഇരയായത്.
സുഹൃത്തിനെ കാണാന് പോകുമ്പോഴൊക്കെ കാംബ്ലെ ഈ യുവതിയെയും കാണുമായിരുന്നു. സൗഹൃദം വളര്ന്നു പ്രണയമായി. ഇതിനിടെ കാംബ്ലെ യുവതിയ്ക്ക് വിവാഹവാഗ്ദാനവും നല്കി. ഇതിന് പിന്നാലെയാണ് ലൈംഗികമായി പീഡിപ്പിച്ചത്.
യുവതിയുടെ ചില നഗ്ന ഫോട്ടോകളും ഇയാള് എടുത്തിരുന്നുവത്രേ. പിന്നീട് യുവതി വിവാഹക്കാര്യം ചോദിക്കുമ്പോള് ഈ ഫോട്ടോകള് കാണിച്ച് ഇയാള് ഭീഷണിപ്പെടുത്തി.
പിന്നീട് യുവതിയുടെ ബന്ധുക്കള് ഫോട്ടോ തിരിച്ചുനല്കി ബന്ധം അവസാനിപ്പിക്കാന് ആവശ്യപ്പെട്ടു. അതിനായി ഇയാള് അഞ്ച് ലക്ഷം രൂപ ആവശ്യപ്പെടുകയായിരുന്നു. തുടര്ന്ന് യുവതിയുടെ ബന്ധുക്കള് പോലീസില് പരാതിപ്പെട്ടു. ജൂലൈ 10ന് ഞായറാഴ്ച രാത്രിയാണ് കാംബ്ലെ അറസ്റ്റിലാകുന്നത്.