മഴക്കെടുതി: സംസ്ഥാനത്ത് ആറ് മരണം, മുന്കരുതല് ശക്തമാക്കിയെന്ന് മുഖ്യമന്ത്രി
തിരുവനന്തപുരം: കനത്ത മഴയെ തുടര്ന്ന് സംസ്ഥാനത്ത് മുന്കരുതല് ശക്തമാക്കിയെന്ന് മുഖ്യമന്ത്രി പിണറായി വിജയന് അറിയിച്ചു. മഴക്കെടുതിയില് സംസ്ഥാനത്ത് ആറ് പേര് മരിച്ചു, ഒരാളെ കാണാതായെന്നും അഞ്ച് വീടുകള് പൂര്ണമായി തകര്ന്നെന്നും മുഖ്യമന്ത്രി വാര്ത്താസമ്മേളനത്തില് അറിയിച്ചു. മുന്നൊരുക്കങ്ങള്ക്കായി എല്ലാ ജില്ലകള്ക്കും ഒരു കോടി രൂപം വീതം നല്കിയെന്നും മുഖ്യമന്ത്രി അറിയിച്ചു.
ഇന്ന് ദുരന്തനിവാരണ അതോറിറ്റിയുടെ ഓഫീസ് സന്ദര്ശിച്ച് സ്ഥിതിഗതികള് വിലയിരുത്തി. വൈകീട്ട് ജില്ലാ കളക്ടര്മാരുടെ യോഗം വിളിച്ചിരുന്നു. ചീഫ് സെക്രട്ടറി അടക്കമുള്ള ഉന്നത ഉദ്യോഗസ്ഥരുടെ യോഗത്തില് വിവിധ സേന വിഭാഗങ്ങളിലെ ആളുകളും പങ്കെടുത്തു. തെക്കന് കേരളത്തില് വ്യാപകമായി മഴ ലഭിക്കാനുള്ള സാഹചര്യമാണുള്ളത്. നാളെ വരെ അതിതീവ്ര മഴ പ്രധാനമായും തെക്കന്, മാധ്യ കേരളത്തില് കേന്ദ്രീകരിക്കും. നാളെ കഴിയുന്നതോടെ അത് വടക്കന് കേരളത്തിലേക്ക് വ്യാപിക്കുമെന്നാണ് കാലാവസ്ഥ വകുപ്പ് അറിയിക്കുന്നത്.
കുഞ്ഞിക്ക അന്നും ഇന്നും മാസാണ് മോനെ; ഞെട്ടിച്ച ഫോട്ടോസ്, വൈറലോട് വൈറല്
അതിതീവ്രമഴ പ്രതീക്ഷിക്കുന്ന തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ, എറണാകുളം, ഇടുക്കി എന്നീ ജില്ലകളില് ഇന്നും നാളെയും റെഡ് അലേര്ട്ട് പ്രഖ്യാപിച്ചിട്ടുണ്ട്. 24 മണിക്കൂറില് 200 മില്ലിമീറ്ററില് കൂടുതല് മഴയാണ് പ്രതീക്ഷിക്കുന്നത്. തുടര്ച്ചയായ 4 ദിവസം ഇത്തരത്തിലുള്ള മഴ ലഭിക്കുകയാണെങ്കില് അത് പ്രതിസന്ധി സൃഷ്ടിക്കാന് സാധ്യതയുണ്ട്.
ഉരുള്പൊട്ടല്, മലവെള്ളപ്പാച്ചില്, മിന്നല് പ്രളയം, നഗരങ്ങളിലും താഴ്ന്ന പ്രദേശങ്ങളിലുമുണ്ടാകുന്ന വെള്ളക്കെട്ടുകള് തുടങ്ങിയ ദുരന്ത സാദ്ധ്യതകള് മുന്നില് കണ്ടുകൊണ്ടുള്ള ജാഗ്രതയും തയ്യാറെടുപ്പുമാണ് നടത്തുന്നത്. റെഡ് അലേര്ട്ട് പ്രഖ്യാപിക്കപ്പെട്ട ജില്ലകളില് മാത്രമല്ല സമീപ ജില്ലകളിലും അതീവ ജാഗ്രതയും തയ്യാറെടുപ്പുകളും ആവശ്യമാണ്.
മഴക്കാല കെടുതികളെ നേരിടുന്നതിനായി വളരെ മുന്കൂട്ടി തന്നെ അവശ്യമായ മുന്നൊരുക്കം ആരംഭിച്ചിരുന്നു. മാര്ച്ച് 14, 16 തീയതികളിലായി എല്ലാ ജില്ലകളേയും പങ്കെടുപ്പിച്ച് തദ്ദേശസ്ഥാപനതലത്തില് മോക്ക് ഡ്രില്ലുകള് നടത്തി. മെയ് 14ന് ചീഫ് സെക്രട്ടറിയുടെ നേതൃത്വത്തില് വിവിധ വകുപ്പുകളുടെ യോഗം ചേര്ന്നു. മെയ് 16 നു തദ്ദേശ വകുപ്പിലെ ജില്ലാ തലം വരെ ഉള്ള ഉദ്യോഗസ്ഥരുടെ യോഗം ചേര്ന്ന് മൂന്നോരുക്കം സംബന്ധിച്ച് വിലയിരുത്തി.
അതിനു ശേഷം മഴക്കാലം മുന്നില് കണ്ട് ജില്ലാ ദുരന്ത നിവാരണ അതോറിറ്റികള് യോഗം ചേര്ന്നു. മെയ് 18നു മുഖ്യമന്ത്രി എന്ന നിലയില് കാലവര്ഷതുലാവര്ഷ മുന്നൊരുക്ക യോഗം വിളിച്ചുചേര്ത്തു ചേര്ന്നു. മെയ് 25നു ഓറഞ്ച് ബുക്ക് പുതുക്കി പ്രസിദ്ധീകരിക്കുകയും അതു കണിശമായി പാലിക്കാന് ആവശ്യമായ നിര്ദ്ദേശങ്ങള് നല്കുകയും ചെയ്തു. തുടര്ന്ന് എല്ലാ ജില്ലകളിലും ഓറഞ്ച് ബുക്ക്, ഐ ആര് എസ് എന്നിവയില് ബന്ധപ്പെട്ട ഉദ്യോഗസ്ഥര്ക്ക് പരിശീലനം നല്കി.
ജൂലൈ 8നു കാലവര്ഷതുലാവര്ഷ മുന്നൊരുക്കം വീണ്ടും വിലയിരുത്തി. അണക്കെട്ടുകളിലെ റൂള് കര്വ്വ് നിരീക്ഷണ യോഗം രണ്ടുവട്ടം നടത്തി. ഇന്ന് (ആഗസ്റ്റ് 1) റവന്യൂ മന്ത്രി അടിയന്തിര സാഹചര്യം വിലയിരുത്തി ജില്ലകള്ക്ക് ആവശ്യമായ നിര്ദേശം നല്കിയിട്ടുണ്ട്.
ദേശീയ ദുരന്ത നിവാരണ സേനയുടെയും സംസ്ഥാന രക്ഷാസേനകളുടേയും മറ്റ് ബന്ധപ്പെട്ട വകുപ്പുകളുടേയും പ്രതിനിധികളെ ഉള്പ്പെടുത്തി ദുരന്ത നിവാരണ അതോറിറ്റിയുടെ സ്റ്റേറ്റ് എമെര്ജന്സി ഓപ്പറേഷന്സ് സെന്റര് സംസ്ഥാനതല കണ്ട്രോള് റൂമായി പ്രവര്ത്തിക്കാന് സജ്ജമാക്കി. ഇതുനുപുറമെ എല്ലാ ജില്ലകളിലും താലൂക്കുകളിലും കണ്ട്രോള് റൂമുകള് തുറക്കും.
ഉരുള്പൊട്ടല് സാധ്യതയുള്ള ഇടങ്ങളിലും വെള്ളം കയറാന് സാധ്യതയുള്ള പ്രദേശങ്ങളിലും താമസിക്കുന്ന ജനങ്ങളെ മുന്കരുതലിന്റെ ഭാഗമായി സുരക്ഷിതമായ ഇടങ്ങളിലേക്ക് മാറ്റുന്ന പ്രവര്ത്തനം ഉടനെ പൂര്ത്തീകരിക്കുന്നതിനുള്ള നടപടി സ്വീകരിച്ചിട്ടുണ്ട്.
ദേശീയ ദുരന്ത നിവാരണ സേനയുടെ 4 സംഘങ്ങള് മുന്കൂറായി ഇടുക്കി, കോഴിക്കോട്, വയനാട്, തൃശൂര് ജില്ലകളില് നിലയുറപ്പിച്ചിട്ടുണ്ട്. എന് ഡി ആര് എഫിന്റ 4 അധിക സംഘങ്ങളെ കൂടി സംസ്ഥാനത്ത് എത്തിക്കും. ഇവരെ എറണാകുളം, കോട്ടയം, കൊല്ലം, മലപ്പുറം ജില്ലകളില് വിന്യസിക്കും.
ജലസേചന വകുപ്പിനു കീഴിലുള്ള 17 ഓളം അണക്കെട്ടുകളില് നിന്നും വെള്ളം പുറത്തു വിടുന്നുണ്ട്. കെ.എസ്.ഇ.ബി യുടെ വലിയ അണക്കെട്ടുകളില് വെള്ളം പുറത്തുവിടേണ്ട സാഹചര്യം നിലവിലില്ല. ചെറിയ ഡാമുകളായ കല്ലാര്കുട്ടി, പൊന്മുടി, ലോവര്പെരിയാര്, മൂഴിയാര്, പെരിങ്ങല്ക്കുത്ത് എന്നീ ഡാമുകളില് നിന്നും ജലം തുറന്നുവിട്ടിട്ടുണ്ട്.
Recommended Video
അണക്കെട്ടുകളിലെ ജലനിരപ്പ് സംബന്ധിച്ച് അഡീഷണല് ചീഫ് സെക്രട്ടറിയുടെ അധ്യക്ഷതയില് ഡാം മാനേജ്മന്റ് കമ്മിറ്റി യോഗം ചേര്ന്ന് സ്ഥിതിഗതികള് വിലയിരുത്തിയിട്ടുള്ളതാണ്. ആശങ്കപ്പെടേണ്ട സാഹചര്യം നിലവിലില്ല.
ജില്ലാ ദുരന്ത നിവാരണ അതോറിറ്റി ചെയര്മാന്റെ അനുമതിയോടെ റൂള് കര്വ് അനുസരിച്ച് ചെറിയ അണക്കെട്ടുകളില് നിന്ന് നിയന്ത്രിത അളവില് വെള്ളം പുറത്തേക്കൊഴുക്കും.
അടിയന്തര സാഹചര്യം നേരിടുന്നതിനായി എല്ലാ ജില്ലയിലും പോലീസിന്റെ പ്രത്യേക കണ്ട്രോള് റൂമും ആരംഭിക്കാന് നിര്ദേശിച്ചിട്ടുണ്ട്. അടിയന്തര സാഹചര്യം നേരിടാന് തയ്യാറായിരിക്കാന് എല്ലാ പോലീസ് സ്റ്റേഷനുകളിലെയും ദുരന്തനിവാരണ സംഘങ്ങള്ക്ക് നിര്ദ്ദേശം നല്കി. ജില്ലാ പോലീസ് മേധാവിമാര് ജില്ലാ കളക്ടര്മാരുമായും ജില്ലാതല ദുരന്തനിവാരണ സമിതിയുമായി നിരന്തരം സമ്പര്ക്കം പുലര്ത്തും. ജെ സി ബി, ബോട്ടുകള്, മറ്റു ജീവന്രക്ഷാ ഉപകരണങ്ങള് എന്നിവ എല്ലാ പോലീസ് സ്റ്റേഷനുകളിലും തയ്യാറാക്കി വെയ്ക്കുമെന്നും മുഖ്യമന്ത്രി അറിയിച്ചു.
Click it and Unblock the Notifications
Sign in with Google