പ്രവാസികൾക്ക് ആശ്വാസം: കുടുങ്ങിക്കിടക്കുന്നവരെ എത്തിക്കാൻ 58 പ്രേത്യേക വിമാനങ്ങൾ!

പശ്ചിമേഷ്യയിൽ യുഎസ്, ഇസ്രായേൽ, ഇറാൻ എന്നീ രാജ്യങ്ങൾ തമ്മിലുള്ള സംഘർഷം രൂക്ഷമായി തുടരുന്ന പശ്ചാത്തലത്തിൽ വിമാന സർവീസുകളിൽ വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നത്. മിക്ക രാജ്യങ്ങളും തങ്ങളുടെ വ്യോമപാതകൾ ഭാഗികമായോ പൂർണ്ണമായോ അടച്ചിട്ടിരിക്കുകയാണ്. എങ്കിലും കുടുങ്ങിക്കിടക്കുന്ന യാത്രക്കാരെ നാട്ടിലെത്തിക്കുന്നതിനായി ഇന്ത്യൻ വിമാനക്കമ്പനികൾ ഇന്ന് (മാർച്ച് 4) 58 പ്രത്യേക സർവീസുകൾ നടത്തുമെന്ന് കേന്ദ്ര സിവിൽ ഏവിയേഷൻ മന്ത്രാലയം അറിയിച്ചു.

ഇന്നത്തെ വിമാന സർവീസുകളുടെ കണക്ക്

ഇന്ന് ആകെ നിശ്ചയിച്ചിട്ടുള്ള 58 സർവീസുകളിൽ പ്രധാനമായും പങ്കുചേരുന്നത് ഇൻഡിഗോയും എയർ ഇന്ത്യയുമാണ്.

ഇൻഡിഗോ: 30 പ്രത്യേക സർവീസുകൾ.

എയർ ഇന്ത്യ & എയർ ഇന്ത്യ എക്സ്പ്രസ്: 23 സർവീസുകൾ.

മറ്റ് കമ്പനികൾ: സ്പൈസ് ജെറ്റ്, അകാശ എയർ എന്നിവയും പരിമിതമായ രീതിയിൽ സർവീസുകൾ നടത്തുന്നുണ്ട്. ദുബായ്, ഫുജൈറ തുടങ്ങിയ ഗൾഫ് നഗരങ്ങളിൽ നിന്നാണ് ഈ വിമാനങ്ങൾ പ്രധാനമായും പുറപ്പെടുന്നത്. ഇവ ഡൽഹി, മുംബൈ, കൊച്ചി, ബംഗളൂരു, അഹമ്മദാബാദ്, തിരുവനന്തപുരം എന്നീ വിമാനത്താവളങ്ങളിലേക്ക് യാത്രക്കാരെ എത്തിക്കും.

പ്രധാന വിമാനത്താവളങ്ങളിലെ നിലവിലെ സ്ഥിതി

ദുബായ് (DXB & DWC): ദുബായ് അന്താരാഷ്ട്ര വിമാനത്താവളവും അൽ മക്തൂം വിമാനത്താവളവും പരിമിതമായ തോതിൽ പ്രവർത്തനം പുനരാരംഭിച്ചിട്ടുണ്ട്. എന്നാൽ വിമാനക്കമ്പനിയിൽ നിന്ന് നേരിട്ട് കൺഫർമേഷൻ ലഭിക്കാതെ ആരും വിമാനത്താവളത്തിലേക്ക് പോകരുതെന്ന് കർശന നിർദ്ദേശമുണ്ട്.

അബുദാബി (Zayed International): ഇവിടെനിന്നും നിയന്ത്രിതമായ രീതിയിൽ സർവീസുകൾ നടക്കുന്നുണ്ട്. എത്തിഹാദ് എയർവേയ്‌സ് മുംബൈ, ലണ്ടൻ, പാരിസ് എന്നിവിടങ്ങളിലേക്ക് പ്രത്യേക സർവീസുകൾ നടത്തുന്നു.

ദോഹ & ബഹ്‌റൈൻ: ഖത്തർ വ്യോമപാത ഇപ്പോഴും പൂർണ്ണമായും അടച്ചിട്ടിരിക്കുകയാണ്. ഖത്തർ എയർവേയ്‌സ് തങ്ങളുടെ സർവീസുകൾ താൽക്കാലികമായി നിർത്തിവെച്ചിരിക്കുന്നു.

പ്രതിസന്ധി കണക്കിലെടുത്ത് മിക്ക വിമാനക്കമ്പനികളും യാത്രക്കാർക്ക് ഇളവുകൾ പ്രഖ്യാപിച്ചിട്ടുണ്ട്. എമിറേറ്റ്സ് കമ്പനി മാർച്ച് 5-നോ അതിനുമുമ്പോ ടിക്കറ്റ് എടുത്തവർക്ക് 20 ദിവസത്തിനുള്ളിൽ മറ്റൊരു തീയതിയിലേക്ക് സൗജന്യമായി ടിക്കറ്റ് മാറ്റുകയോ അല്ലെങ്കിൽ മുഴുവൻ തുകയും റീഫണ്ട് വാങ്ങുകയോ ചെയ്യാം.

എയർ ഇന്ത്യ മാർച്ച് 5 വരെയുള്ള യാത്രകൾക്ക് അധിക ചാർജ് ഈടാക്കാതെ തീയതി മാറ്റാൻ അനുവദിക്കുന്നുണ്ട്.

ഇൻഡിഗോ: ഫെബ്രുവരി 28-നോ അതിനുമുമ്പോ ടിക്കറ്റ് എടുത്തവർക്ക് മാർച്ച് 7 വരെയുള്ള യാത്രകൾ മാറ്റാനോ റീഫണ്ട് നേടാനോ സൗകര്യമുണ്ട്.

യാത്രികർ ശ്രദ്ധിക്കാൻ

നിലവിലെ യുദ്ധസാഹചര്യം കാരണം വിമാനങ്ങൾ പലപ്പോഴും വഴിതിരിച്ചുവിടുന്നതിനാൽ യാത്രാസമയം കൂടും. ടിക്കറ്റ് ബുക്ക് ചെയ്തവർ വിമാനക്കമ്പനികളുടെ വെബ്സൈറ്റോ സോഷ്യൽ മീഡിയ പേജുകളോ വഴി വിമാനത്തിന്റെ കൃത്യമായ സമയം പരിശോധിക്കേണ്ടതാണ്. സ്വകാര്യ വിമാനങ്ങളുടെ നിരക്ക് പലയിടത്തും ഇരട്ടിയായി വർദ്ധിച്ചതായും റിപ്പോർട്ടുകളുണ്ട്. കേന്ദ്ര സർക്കാർ സ്ഥിതിഗതികൾ സൂക്ഷ്മമായി നിരീക്ഷിക്കുകയാണെന്നും ആശങ്കപ്പെടേണ്ടതില്ലെന്നും അധികൃതർ അറിയിച്ചു.