എവിടെ നോക്കിയാലും സ്വർണം,1586 കിലോ..കോളടിച്ച് ഈ സംസ്ഥാനം..ലേലം ഉടൻ

ലോകത്തിലെ പ്രധാന സ്വർണ ഉപഭോക്തൃ രാജ്യമാണ് ഇന്ത്യ. ക്രൂഡ് ഓയിൽ കഴിഞ്ഞാൽ ഇന്ത്യ ഏറ്റവും കൂടുതൽ ഇറക്കുമതി ചെയ്യുന്നതും സ്വർണമാണ്. ആഭ്യന്തര ഖനനം കാര്യമായി ഇല്ലാത്തതിനാലാണ് രാജ്യം വർഷം തോറും കോടിക്കണക്കിന് ഡോളറിന്റെ സ്വർണം ഇറക്കുമതി ചെയ്യുന്നത്. സമ്പദ്‌വ്യവസ്ഥയെ സ്ഥിരീകരിക്കാൻ ഈ ആശ്രയത്വം കുറച്ച് പ്രാദേശിക ഖനനം വർദ്ധിപ്പിക്കണമെന്ന് സാമ്പത്തിക വിദഗ്ധർ ദീർഘകാലമായി ആവശ്യപ്പെടുന്നുണ്ട്.

ഇത്തരത്തിൽ ഖനനം വർധിപ്പിക്കാനുള്ള ശ്രമങ്ങൾക്കിടെ അനുകൂലമായ വാർത്തയാണ് ഇപ്പോൾ ഒഡീഷയിൽ നിന്ന് വരുന്നത്. ഇവിടെ വലിയ തോതിൽ സ്വർണം നിക്ഷേപം കണ്ടെത്തി എന്നാണ് വാർത്തകൾ. ആയിരം കിലോയ്ക്ക് മുകളിൽ വരുന്ന ഈ സ്വർണനിക്ഷേപങ്ങൾ ഖനനം ചെയ്യാനുള്ള ലേല നടപടികളിലേക്ക് കടക്കാനൊരുങ്ങുകയാണ് സംസ്ഥാനം.

ഒഡീഷയിലെ സ്വർണ്ണ ഖനികൾ ഉടൻ ലീസിന് നൽകാനുള്ള ലേലത്തിന് സർക്കാർ ഒരുങ്ങുന്നതായി സംസ്ഥാന ഖനി മന്ത്രി ബിഭൂതി ഭൂഷൺ ജെന അറിയിച്ചു. 1,586 കിലോഗ്രാം സ്വർണ്ണ ശേഖരം കണക്കാക്കുന്ന മൂന്ന് ഖനികളാണ് ഇത്തരത്തിൽ ലീസിന് നൽകുന്നത്. മൂന്ന് ഖനികളാണ് ഇതിനായി തിരഞ്ഞെടുത്തിരിക്കുന്നത്.

ഗോപ് (ഗാസിപ്പൂർ പ്രദേശം), ദിയോഗർ (ആദേശ് പ്രദേശം), കിയോൻഝർ ജില്ല എന്നിവിടങ്ങളിലെ സ്വർണ്ണ ബ്ലോക്കുകളുടെ തിരിച്ചറിയൽ പ്രക്രിയ ഈ വർഷം ഏപ്രിലിൽ തന്നെ പൂർത്തിയാക്കിയതാണ്. നിലവിൽ, ഖനന നിയമങ്ങൾ പാലിച്ചുകൊണ്ട് പാട്ടത്തിന് നൽകാനുള്ള നടപടിക്രമങ്ങൾ പൂർത്തിയാക്കുകയാണ് ലക്ഷ്യം.

'ഈ സ്ഥലങ്ങളിൽ ഏകദേശം 1,586 കിലോഗ്രാം സ്വർണ്ണശേഖരം ഉണ്ടെന്ന് സ്ഥിരീകരിച്ചിട്ടുണ്ട്. തിരിച്ചറിയൽ ജോലികൾ പൂർത്തിയായി. സ്ഥാപിതമായ മാനദണ്ഡങ്ങൾക്കനുസരിച്ചുള്ള ലേലവും പാട്ടത്തിന് നൽകലുമാണ് അടുത്ത ഘട്ടം, മന്ത്രി പറഞ്ഞു..

ലേല നടപടികളുമായി മുന്നോട്ട് പോകുമ്പോഴും, നിയമപരമായ അനുമതികളും ചട്ടങ്ങളും പാലിച്ച് കൂടുതൽ പര്യവേക്ഷണം തുടരുമെന്ന് മന്ത്രി അറിയിച്ചു. ധാതു ലേല നിയമങ്ങളും പരിസ്ഥിതി മാനദണ്ഡങ്ങളും കർശനമായി പാലിച്ചായിരിക്കും സ്വർണ്ണ ബ്ലോക്കുകൾ പാട്ടത്തിന് നൽകുക. ഇത് ഒഡീഷയുടെ ധാതു സാധ്യതകൾ പ്രയോജനപ്പെടുത്താനുള്ള സുപ്രധാന ചുവടാണ്.

സുന്ദർഗഡ്, നബരംഗ്പൂർ, കിയോൻഝർ, ദിയോഗർ ഉൾപ്പെടെ ഒഡീഷയുടെ വിവിധ ഭാഗങ്ങളിൽ ഏതാനും മാസങ്ങൾക്കുമുമ്പാണ് സ്വർണ്ണ ശേഖരം കണ്ടെത്തിയത്. ഈ ലേലം സംസ്ഥാന സമ്പദ്‌വ്യവസ്ഥയെ ഉത്തേജിപ്പിക്കുകയും സ്വർണ്ണ ഇറക്കുമതിയിലുള്ള ആശ്രയം കുറയ്ക്കുകയും ചെയ്യുമെന്നാണ് പ്രതീക്ഷിക്കപ്പെടുന്നത്.