അടുത്ത അധ്യയന വര്‍ഷം ഓപ്പണ്‍ ബുക്ക് പരീക്ഷ

തിരുവനന്തപുരം: തിരഞ്ഞെടുക്കപ്പെട്ട വിഷയങ്ങളില്‍ ആഴത്തിലുള്ള അറിവ് നേടാനുതകുന്ന ഓപ്പണ്‍ ബുക്ക് പരീക്ഷ സമ്പ്രദായം അടുത്ത അധ്യയന വര്‍ഷം(2014-15) മുതല്‍ നടപ്പാക്കാന്‍ സിബിഎസ്ഇ തീരുമാനിച്ചു. 9, 10, പ്ലസ് വണ്‍ ക്ലാസുകളിലാണ് ഓപ്പണ്‍ ബുക്ക് പരീക്ഷ നടപ്പിലാക്കുക.

കുട്ടികളുടെ ഓര്‍മ്മശക്തിമാത്രം പരീക്ഷിക്കുന്ന നിലവിലെ പരീക്ഷാ രീതിയില്‍ നിന്ന് മാറി പ്രായോഗിക തലത്തിലുള്ള പഠനമാണ് ഓപ്പണ്‍ ബുക്ക് പരീക്ഷയുടെ പ്രത്യേക. രാജ്യത്ത് വിദ്യാഭ്യാസ വിപ്ലവത്തിന് പ്രതീക്ഷയിലാണ് ഈ നവീന സമ്പ്രദായം വഴിയൊരുക്കുമെന്നാണ് സിബിഎസ്ഇ പ്രതീക്ഷിയ്ക്കുന്നത്.

ഒന്‍പത്, പത്ത് ക്ലാസുകളില്‍ എല്ലാ വിഷയങ്ങള്‍ക്കും സിബിഎസ്ഇ ഈ സന്പ്രദായം നടപ്പാക്കും. എന്നാല്‍ പ്‌ളസ് ടു തലത്തില്‍ ബയോളജി, ഇക്കണോമിക്‌സ്, ജിയോഗ്രഫി, ഇംഗ്‌ളീഷ് വിഷയങ്ങള്‍ക്ക് മാത്രമേ ഓപ്പണ്‍ ബുക്ക് പരീക്ഷ അനുവദിയ്ക്കുകയുള്ളു.

പരീക്ഷയ്ക്ക് നാലു മാസം മുന്‍പേ എല്ലാ വിഷയങ്ങളുടേയും വിശദാംശങ്ങള്‍ കുട്ടികള്‍ക്ക് നല്‍കും. ഇതില്‍ നിന്നാവും എല്ലാ ചോദ്യങ്ങളും തയ്യാറാക്കുക. തിയറിക്ക് പകരമായി പ്രായോഗികതയിലൂന്നിയാവും ചോദ്യങ്ങള്‍. കാര്യങ്ങള്‍ മനസിലാക്കുക, സന്ദര്‍ഭത്തിനനുസരിച്ച് പ്രവര്‍ത്തിക്കുക, ചിന്താശക്തി വര്‍ദ്ധിപ്പിക്കുക, കാര്യങ്ങള്‍ വിശകലനം നടത്തുക, അറിവ് പ്രയോഗത്തില്‍ വരുത്തുക എന്നിവയെല്ലാം ഓപ്പണ്‍ ബുക്ക് പരീക്ഷയില്‍ പരിശോധിക്കപ്പെടും.

കാര്യക്ഷമതയുള്ള നിരന്തര മൂല്യനിര്‍ണയം, അദ്ധ്യാപകര്‍ക്ക് തുടര്‍ച്ചയായ പരിശീലനം, വിദ്യാര്‍ത്ഥികള്‍ക്ക് പരീക്ഷാഭീതി അകറ്റാന്‍ കൗണ്‍സലിംഗ് എന്നിവയും ഇതിന്റെ ഭാഗമായി ഏര്‍പ്പെടുത്തും.

English summary

Central Board of Secondary Education will introduce an 'open book' section in the final exams for classes 9, 10 and 11 from the current academic year and for class 12 boards from next year.