സ്വർണം വാങ്ങുമ്പോൾ ക്യാഷ് ബാക്ക് ഓഫർ, വജ്രം ഫ്രീ..അക്ഷയ തൃതീയക്ക് കണ്ണ് തള്ളിക്കും ഓഫറുകൾ

സ്വർണ വില കുതിച്ച് നിൽക്കുന്ന ഈ സാഹചര്യത്തിൽ അക്ഷയ തൃതീയ ദിനത്തിൽ സ്വർണം വാങ്ങാൻ ആളുകൾ തയ്യാറാകുമോയെന്ന ആശങ്കയിലാണ് വ്യാപാരികൾ. ഈ സാഹചര്യത്തിൽ ആളുകളെ ജ്വല്ലറികളിലേക്ക് എത്തിക്കാനായി വമ്പൻ ഓഫറുകളാണ് അവർ പ്രഖ്യാപിച്ചിരിക്കുന്നത്. സ്വർണ വില ഒരു ലക്ഷത്തിന് മുകളിലാണെങ്കിലും അടുത്ത ദിവസങ്ങളിൽ വിലയിൽ വലിയ ഇടിവ് രേഖപ്പെടുത്തുന്നത് പ്രതീക്ഷയോടെയാണ് വ്യാപാരികൾ ഉറ്റുനോക്കുന്നത്. ഇതിനൊപ്പം ഓഫറുകൾ കൂടി പ്രഖ്യാപിക്കുമ്പോൾ സ്വാഭാവികമായും ആളുകൾ സ്വർണം വാങ്ങാൻ എത്തുമെന്നാണ് വ്യാപാരികളുടെ വിലയിരുത്തൽ.

മലബാർ ഗോൾഡ് ആൻഡ് ഡയമണ്ട്സ്, സ്വർണ്ണം, അൺകട്ട് വജ്രം, രത്നാഭരണങ്ങൾ എന്നിവയുടെ പണിക്കൂലിയിലും വജ്രവിലയിലും 30% വരെ കിഴിവാണ് പ്രഖ്യാപിച്ചത്. എസ്ബിഐ കാർഡ് ഇടപാടുകൾക്ക് 4,000 വരെ ക്യാഷ്ബാക്കും ലഭിക്കും. ആദിത്യ ബിർള ജ്വല്ലറി (ഇന്ദ്രിയ) പണിക്കൂലിയിലും വജ്രവിലയിലും 35% വരെ കുറച്ചു. 25% മുൻകൂർ നൽകി നേരത്തേ തന്നെ സ്വർണം ബുക്ക് ചെയ്യാനുള്ള അവസരവും ഉപഭോക്താക്കൾക്ക് ലഭിക്കും.

കിസ്ന ഡയമണ്ട് ആൻഡ് ഗോൾഡ് ജ്വല്ലറി ഗോൾഡ് റേറ്റ് പ്രൊട്ടക്ഷൻ പ്ലാനാണ് അവതരിപ്പിച്ചിരിക്കുന്നത്. അതായത് മുൻകൂറായി പകുതി പണം നൽകി വിലയുറപ്പിക്കുക. അക്ഷയ തൃതീയ സമയത്ത് 15 മുതൽ 18 ശതമാനം വരെ അധിക വിൽപ്പന നടക്കുമെന്നതിനാൽ ഓഫറുകൾ പ്രഖ്യാപിക്കുന്നത് ലാഭത്തിലേക്ക് നയിക്കുമെന്നതാണ് വ്യാപാരികളുടെ പ്രതീക്ഷ.

ഇൻസ്റ്റാമാർട്ട് കല്യാൺ ജ്വല്ലേഴ്സുമായി സഹകരിച്ച് മുൻകൂർ ബുക്കിംഗ് വാഗ്ദാനം ചെയ്യുന്നുണ്ട്. ഉത്സവ ദിവസം കുറഞ്ഞ നിരക്കിൽ വാങ്ങൽ പൂർത്തിയാക്കാനും സൗജന്യ വെള്ളി നാണയങ്ങൾ നേടാനും ഇത് ഉപഭോക്താക്കളെ സഹായിക്കും. ഭീമ ഗോൾഡ് പ്രത്യേക നാണയ ശേഖരങ്ങളും പ്രീ-ബുക്കിംഗ് പദ്ധതികളും അവതരിപ്പിച്ചിട്ടുണ്ട്. കുറഞ്ഞ മുൻകൂർ പേയ്മെന്റ് നൽകിക്കൊണ്ട് ഉപഭോക്താക്കൾക്ക് വിലകൾ ഉറപ്പിക്കാൻ ഈ പദ്ധതികളിലൂടെ സാധിക്കും.

സോളിറ്റാരിയോ വജ്രാഭരണങ്ങൾക്കാണ് പ്രധാന്യം നൽകുന്നത്. പരമ്പരാഗത സ്വർണ്ണ വാങ്ങലിൽ നിന്ന് വജ്രങ്ങളിലേക്ക് മാറാനാണ് ബ്രാൻഡ് പ്രോത്സാഹിപ്പിക്കുന്നത്. ഓരോ സ്റ്റോറിലെയും ആദ്യത്തെ 101 ഉപഭോക്താക്കൾക്ക് സൗജന്യ വജ്രവും നൽകുന്നുണ്ട്. വെർമെയിൽ സ്വർണ്ണത്തിലും സ്റ്റെർലിംഗ് വെള്ളയിലും പതിച്ച ലാബ്-ഒറിജിനേറ്റഡ് വജ്രങ്ങളിലും ബ്രാൻഡ് ശ്രദ്ധ കേന്ദ്രീകരിക്കുന്നുണ്ട്.

അതേസമയം, പരമ്പരാഗത സ്വർണ്ണ വാങ്ങലിന് പകരമുള്ള മാർഗ്ഗങ്ങൾക്കും ഇപ്പോൾ സ്വീകാര്യത ഏറുന്നുണ്ട്.വർദ്ധിച്ചുവരുന്ന സ്വർണ്ണവില കൂടുതൽ മൂല്യാധിഷ്ഠിത ഓപ്ഷനുകൾ തേടാൻ ഉപഭോക്താക്കളെ പ്രേരിപ്പിക്കുകയാണെന്ന് ലൈംലൈറ്റ് ലാബ് ഗ്രോൺ ഡയമണ്ട്സിന്റെ സ്ഥാപകയും എംഡിയുമായ പൂജ മാധവൻ പറഞ്ഞു.

ബ്രാൻഡ് വജ്രവിലയിൽ 30% വരെയും പണിക്കൂലിയിൽ 50% വരെയും കിഴിവ് വാഗ്ദാനം ചെയ്യുന്നുണ്ട്. നിശ്ചിത തുകയുടെ വാങ്ങലിന് സൗജന്യ സ്വർണ്ണനാണയവും ലഭിക്കും. ഈ പരിമിതകാല ഓഫർ ഏപ്രിൽ 30 വരെയാണ്. പിഎൻജിഎസ്സിന്റെ റെവ ഡയമണ്ട്സ്, സർട്ടിഫൈഡ് പ്രകൃതിദത്ത വജ്ര ആഭരണങ്ങൾക്ക് പണിക്കൂലിയിൽ 100% വരെ കിഴിവും പ്രഖ്യാപിച്ചിട്ടുണ്ട്.