തവള തിന്നെന്ന് ഫേസ്ബുക്കില്‍; യുവാവ് കുടുങ്ങി

പനാജി (ഗോവ): തവളയെ പൊരിച്ച് ശാപ്പിട്ട വിശേഷം ഫേസ്ബുക്കിലൂടെ കൂട്ടുകാരെ അറിയിച്ച യുവാവ് കുടുക്കിലായി. 1972ലെ വന്യജീവി സംരക്ഷണചട്ടപ്രകാരം സംരക്ഷിത വിഭാഗത്തില്‍പ്പെടുത്തിയിട്ടുള്ള 'ഇന്ത്യന്‍ ബുള്‍ഫ്രോഗ്' എന്നയിനം തവളകളെ കൊന്നുതിന്നിട്ടുണ്ടെന്ന് വെളിപ്പെടുത്തിയതാണ് ഗോവയിലെ റിബാന്ദര്‍ ഗ്രാമവാസിയായ യോകോ ഗോമസിനെ കുഴിയില്‍ച്ചാടിച്ചത്. 1985 മുതല്‍ തവളപിടുത്തം രാജ്യത്ത് കര്‍ശനമായി നിരോധിച്ചിട്ടുണ്ട്.

വ്യാഴാഴ്ച രാത്രി ഫേസ്ബുക്കിലൂടെയാണ് തവളക്കറിയുടെ വിശേഷങ്ങള്‍ ഗോമസ് കൂട്ടുകാരുമായി പങ്കുവെച്ചത്. സംഭവം പൊങ്ങച്ചമല്ലെന്ന് വിശേഷിപ്പിയ്ക്കാന്‍ ചത്ത തവളയെ കൈയില്‍ വെച്ചുകൊണ്ടുള്ള പടവും ഗോമസ് പോസ്റ്റ് ചെയ്തിരുന്നു.

ഫേസ്ബുക്കിലൂടെയുള്ള വെളിപ്പെടുത്തല്‍ 'വൈല്‍ഡ് ഗോവ നെറ്റ്‌വര്‍ക്' എന്ന പരിസ്ഥിതി സംഘടനയാണ് വനംവകുപ്പിന്റെ ശ്രദ്ധയില്‍പ്പെടുത്തിയത്. ഉടന്‍ തന്നെ ഇയാളുടെ വീട്ടില്‍ വനംവകുപ്പുദ്യോഗസ്ഥര്‍ വെള്ളിയാഴ്ച റെയ്ഡ് നടത്തി. ഈ സമയം ഗോമസ് വീട്ടിലുണ്ടായിരുന്നില്ല. തവളയിറച്ചി പാകം ചെയ്തതിന്റെ തെളിവുകള്‍ വീട്ടില്‍നിന്നും ലഭിച്ചതായി ഉദ്യോഗസ്ഥര്‍ വെളിപ്പെടുത്തി.

മഴക്കാലത്ത് ഗോവന്‍ മേഖലയില്‍ തവളപിടിത്തം സജീവമാണ്. കഴിഞ്ഞകൊല്ലം മര്‍മഗോവയില്‍ 60 തവളകളുമായി ഒരാള്‍ ഉദ്യോഗസ്ഥരുടെ പിടിയിലായിരുന്നു.

English summary

Goa forest officials raided the house of a youth in the Ribandar village on Thursday night after his bragging posts on social networking site Facebook of relishing eating and killing of Indian Bull frogs tipped off a network of wildlife NGOs.