ആദായനികുതി റിട്ടേണ്‍: സമയപരിധി നീട്ടി

ദില്ലി: ആദായനികുതി റിട്ടേണ്‍ സമര്‍പ്പിക്കുന്നതിനുള്ള അവസാന തിയ്യതി ആഗസ്ത് അഞ്ചു വരെ നീട്ടി. ഇത്തവണ ഓണ്‍ലൈനായി അപേക്ഷ സമര്‍പ്പിക്കുന്നവരുടെ എണ്ണത്തില്‍ ക്രമാതീതമായ തിരക്ക് അനുഭവപ്പെട്ട പശ്ചാത്തലത്തിലാണ് ഈ തീരുമാനം.

ഈ വര്‍ഷം ജൂലായ് 30 വരെ ഏകദേശം 92 ലക്ഷം റിട്ടേണുകളാണ് ഇലക്ട്രോണിക് രീതിയില്‍ ഫയല്‍ ചെയ്തിട്ടുള്ളത്. തൊട്ടുമുമ്പത്തെ വര്‍ഷത്തേക്കാളും 46.8 ശതമാനം കൂടുതലാണിത്.

തിരക്കൊഴിവാക്കാന്‍ ആദായ നികുതി വകുപ്പ് ഒട്ടേറെ മുന്‍കരുതലുകള്‍ എടുത്തിരുന്നെങ്കിലും എല്ലാവരും അവസാന ദിവസങ്ങളിലേക്ക് മാറ്റിവെച്ചതാണ് ഈ തിരക്കിന് പ്രധാനകാരണം. കേരളത്തിലെ ഒട്ടുമിക്ക ആദായനികുതി ഓഫീസുകളും വൈകുന്നേരം ആറുമണി വരെ പ്രവര്‍ത്തിക്കുന്നുണ്ട്.

നിലവില്‍ അഞ്ചു ലക്ഷം വരെ നികുതി വിധേയ വരുമാനമുള്ളവരാണ് റിട്ടേണ്‍ കടലാസില്‍ സമര്‍പ്പിക്കേണ്ടത്. അല്ലാത്തവരെല്ലാം നിര്‍ബന്ധമായും ഇ-റിട്ടേണ്‍ സമര്‍പ്പിക്കേണ്ടതുണ്ട്.

English summary

The government on Wednesday extended the last date for filing of income tax returns by five days to August 5. The due date, which was Wednesday, has been extended in wake of "unprecedented surge" in number of I-T returns being filed electronically.