തമിഴ്‌നാട്ടില്‍ വിമാനം റോഡിലിറക്കി; ചെങ്കോട്ട സ്‌ഫോടനം; പ്രതികള്‍ ആസൂത്രണം ചെയ്തത് തുടര്‍ സ്‌ഫോടനങ്ങള്‍

തമിഴ്‌നാട്ടിലെ പുതുക്കോട്ടയില്‍ ചെറു വിമാനം റോഡിലിറക്കി. സാങ്കേതിക തകരാറിനെ തുടര്‍ന്നാണ് ദേശീയ പാതയിലിറക്കിയത്. വ്യോമസേനയുടെ പരിശീലനപ്പറക്കലിനിടെയാണു സംഭവം. പൈലറ്റുമാര്‍ക്ക് നേരിയ പരുക്കേറ്റു.

ചെങ്കോട്ട കാര്‍ സ്ഫോടനവുമായി ബന്ധപ്പെട്ട് വലിയ ഭീകരാക്രമണ പദ്ധതികളാണ് രഹസ്യാന്വേഷണ ഏജന്‍സികള്‍ ചുരുളഴിക്കുന്നത്. നിരവധി സ്ഥലങ്ങളില്‍ ആക്രമണം നടത്താന്‍ പ്രതികള്‍ പദ്ധതിയിട്ടിരുന്നു. 32 ഓളം പഴയ വാഹനങ്ങള്‍ സ്‌ഫോടകവസ്തുക്കള്‍ ഉപയോഗിച്ച് തയ്യാറാക്കിയിരുന്നു.

ചെങ്കോട്ടയ്ക്ക് സമീപമുണ്ടായ സ്ഫോടനത്തിൽ കൊല്ലപ്പെട്ടത് കശ്മീരിലെ ഡോ. ഉമർ ഉൻ നബി തന്നെയാണെന്ന് ഡിഎൻഎ പരിശോധനയിൽ സ്ഥിരീകരിച്ചു. സ്ഫോടനത്തിൽ ഇദ്ദേഹത്തിന്റെ ശരീരം ചിന്നിച്ചിതറിയ നിലയിലായിരുന്നു. അതിനാൽ ഇയാളെ തിരിച്ചറിയാൻ അന്വേഷണ ഉദ്യോഗസ്ഥർക്ക് കഴിഞ്ഞിരുന്നില്ല.

സ്ഫോടനത്തിൽ ഉപയോഗിച്ച വെള്ള ഹ്യുണ്ടായ് i20 കാർ 11 ദിവസം മുൻപ് വാങ്ങിയത് ഡോ. ഉമർ ആണെന്ന് അന്വേഷണ ഉദ്യോഗസ്ഥർക്ക് ആദ്യമേ സംശയമുണ്ടായിരുന്നു. പുൽവാമ ജില്ലയിലുള്ള അദ്ദേഹത്തിന്റെ കുടുംബാംഗങ്ങളിൽ നിന്ന് ശേഖരിച്ച സാമ്പിളുകൾ, കാറിൽ നിന്ന് ലഭിച്ച മൃതദേഹാവശിഷ്ടങ്ങളുമായി പിന്നീട് ഒത്തുനോക്കി. സ്ഫോടനം നടന്ന സമയത്ത് കാർ ഓടിച്ചിരുന്നത് ഡോ. ഉമർ തന്നെയാണെന്ന് ഇതോടെയാണ് സ്ഥിരീകരിച്ചതെന്ന് വൃത്തങ്ങളെ ഉദ്ധരിച്ച് എൻഐഎ റിപ്പോർട്ട് ചെയ്തു. ഡൽഹിയിൽ നടന്നത് ഭീകരാക്രമണം തന്നെയാണെന്ന് കേന്ദ്രസർക്കാരും സ്ഥിരീകരിച്ചിട്ടുണ്ട്. തീവ്രവാദികൾക്കെതിരെ കർശന നിലപാട് തുടരുമെന്നും കേന്ദ്രം വ്യക്തമാക്കി.

ഇന്നത്തെ മറ്റ് പ്രധാനവാർത്തകൾ അറിയാം