ബിന്ദുവിനും ഓട്ടിസം ബാധിച്ച മകൾക്കും സഹായപ്രവാഹം.. പിന്നാലെ ഞരമ്പ് രോഗിയുടെ നഗ്നതാ പ്രദർശനവും!

By Desk

Updated: Monday, August 6, 2018, 19:18 [IST]

ദുരിതത്തിൽ അമ്മയും മക്കളും

കഴിഞ്ഞ ദിവസമാണ് ബിന്ദുവിന്റെയും മകളുടേയും വീഡിയോ സഹിതമുള്ള ദുരന്ത ജീവിതം ഫേസ്ബുക്കിലൂടെ പുറത്ത് വന്നത്. ജന്മനാ ഓട്ടിസം ബാധിച്ച കുട്ടിയാണ് ശ്രീലക്ഷ്മി. അവള്‍ക്ക് പലപ്പോഴും അമ്മയെ തന്നെ തിരിച്ചറിയാന്‍ സാധിക്കാറില്ല. ഇടയ്ക്കിടെ അക്രമാസക്തയാവുകയും കണ്ണ് തെറ്റിയാല്‍ വീട്ടില്‍ നിന്ന് ഇറങ്ങി ഓടുകയും ചെയ്യും ഈ കുഞ്ഞ്.

മകളെ കെട്ടിയിട്ട് അമ്മ

അതോടെ നിവൃത്തി ഇല്ലാതെയാണ് ബിന്ദു മകളെ കെട്ടിയിടാന്‍ തുടങ്ങിയത്. ബിന്ദുവിന് ജോലിക്ക് പോകണമെങ്കില്‍ മകളെ കെട്ടിയിടുകയല്ലാതെ മറ്റൊരു വഴി ഇല്ലായിരുന്നു. ഭര്‍ത്താവ് ഉപേക്ഷിച്ച് പോയ ബിന്ദുവിന് ശ്രീലക്ഷ്മിയെ കൂടാതെ ഏഴാം ക്ലാസ്സില്‍ പഠിക്കുന്ന ഒരു മകള്‍ കൂടിയുണ്ട്.

സ്ഥിര വരുമാനമില്ല

അപകടങ്ങളില്‍ മരണപ്പെടുന്നവരുടെ മൃതദേഹങ്ങളുടെ ഫോട്ടോ എടുക്കലാണ് ബിന്ദുവിന്റെ ജോലി. അതാകട്ടെ ഒരു സ്ഥിരവരുമാനമല്ല താനും. വീട്ടുവാടകയും ജീവിതച്ചെലവും കിട്ടുന്ന വരുമാനത്തേയും ഒന്നിച്ച് കൊണ്ടുപോകാനാവാതെ പെടാപ്പാട് പെടുന്നതിനിടെയാണ് ബിന്ദുവിന്റെയും മക്കളുടേയും ജീവിതം സോഷ്യല്‍ മീഡിയ വഴി പുറത്ത് അറിയുന്നത്.

സഹായവുമായി നിരവധി പേർ

ഇതോടെ നാട്ടിലും വിദേശത്തുമുള്ള മലയാളികള്‍ സഹായഹസ്തവുമായി മുന്നോട്ട് വന്നു. സഹായം തേടിയുള്ള വീഡിയോയില്‍ ബിന്ദുവിന്റെ ഫോണ്‍ നമ്പര്‍ കൊടുത്തിട്ടുണ്ടായിരുന്നു. ഇതുപയോഗിച്ച് ബിന്ദുവിന് നേര്‍ക്ക് നഗ്നതാ പ്രദര്‍ശനം നടത്തിയിരിക്കുകയാണ് ഒരു പ്രവാസി മലയാളി എന്നാണ് ആരോപണം. ബിന്ദു ആ സംഭവത്തിന്റെ ഞെട്ടലിലാണ് ഇപ്പോഴും.

ഫോണിൽ നഗ്നതാ പ്രദർശനം

ബിന്ദുവിനും മക്കള്‍ക്കും സഹായം നല്‍കാം എന്ന വാഗ്ദാനത്തോടെയാണ് ഇയാള്‍ ആദ്യം ഫോണില്‍ ബന്ധപ്പെട്ടത്. തുടര്‍ന്ന് ഓട്ടിസം ബാധിച്ച കുട്ടിയെ നേരിട്ട് കാണണമെന്നും വീഡിയോ കോളില്‍ വരണമെന്നും ആവശ്യപ്പെട്ടു. ഇതനുസരിച്ച് വീഡിയോ കോള്‍ ചെയ്തപ്പോഴാണ് ഇയാള്‍ നീചമായി പെരുമാറിയത്. ഫോണെടുത്ത മകളുടെ മുന്നിലാണ് ഇയാള്‍ നഗ്നതാ പ്രദര്‍ശനം നടത്തിയത്.

അശ്ലീല മെസ്സേജുകള്‍

ഇതോടെ ബിന്ദു കോള്‍ കട്ട് ചെയ്തു. തുടര്‍ന്ന് ഫോണ്‍ പരിശോധിച്ചപ്പോഴാണ് വാട്‌സ്ആപ്പില്‍ ഇയാള്‍ നിരവധി അശ്ലീല മെസ്സേജുകള്‍ അയച്ചിരിക്കുന്നതായി ശ്രദ്ധയില്‍പ്പെട്ടത്. എത്ര പണം വെണമെങ്കിലും തരാമെന്നും കണ്ടാല്‍ മതിയെന്നുമടക്കമുള്ള വൃത്തികെട്ട തരത്തിലുള്ള മെസ്സേജുകളാണ് ഇയാള്‍ വാട്‌സ്ആപ്പില്‍ അയച്ചിരിക്കുന്നത്.

പോലീസിന് പരാതി

ഇതോടെയാണ് ബിന്ദു ഇയാളുടെ കോള്‍ വന്ന നമ്പര്‍ സഹിതം സോഷ്യല്‍ മീഡിയ വഴി തനിക്കുണ്ടായ ദുരനുഭവം പുറത്ത് വിട്ടത്. ഇയാളെ കണ്ടെത്തുന്നതിന് വേണ്ടി സോഷ്യല്‍ മീഡിയ ഈ നമ്പര്‍ വ്യാപകമായി പ്രചരിപ്പിക്കുന്നുമുണ്ട്. അതിനിടെ ഇത്രയും വൃത്തികെട്ട രീതിയില്‍ പെരുമാറിയതിന് ബിന്ദു ഇയാള്‍ക്കെതിരെ പോലീസില്‍ പരാതി നല്‍കിയിട്ടുമുണ്ട്.