നാട്ടില്‍ പോകുന്നവര്‍ക്ക് സന്തോഷവാര്‍ത്ത; വഡോദര-കോട്ടയം സ്‌പെഷ്യല്‍ ട്രെയിന്‍: കേരളത്തില്‍ 9 സ്‌റ്റോപ്പുകള്‍

കൊച്ചി: ക്രിസ്മസ്-പുതുവത്സര അവധിക്കാലത്ത് നാട്ടിലേക്കു പോകുന്ന യാത്രക്കാര്‍ക്ക് സന്തോഷ വാര്‍ത്ത. അവധിക്കാലത്തെ യാത്രക്കാരുടെ തിരക്ക് നിയന്ത്രിക്കുന്നതിനായി പശ്ചിമ റെയില്‍വേ മംഗളൂരു ജംഗ്ഷന്‍ വഴി വഡോദരയ്ക്കും കോട്ടയത്തിനും ഇടയില്‍ പ്രത്യേക പ്രതിവാര ട്രെയിന്‍ സര്‍വീസ് നടത്തും. നാല് ആഴ്ചകളിലാണ് ഈ പ്രത്യേക ട്രെയിന്‍ സര്‍വീസ് നടത്തുന്നത്.

ട്രെയിന്‍ നമ്പര്‍ 09193 (വഡോദര ജംഗ്ഷന്‍ - കോട്ടയം) ശനിയാഴ്ചകളില്‍ (ഡിസംബര്‍ 20, 27, ജനുവരി 3, 10 എന്നീ തീയതികളില്‍) വഡോദര ജംഗ്ഷനില്‍ നിന്ന് രാവിലെ 6.05 ന് ട്രെയിന്‍ പുറപ്പെടും. അടുത്ത ദിവസം വൈകുന്നേരം 7.50 നാണ് ട്രെയിന്‍ കോട്ടയത്ത് എത്തിച്ചേരുന്നത്.

തിരിച്ചുള്ള ട്രിപ്പ് ട്രെയിന്‍ നമ്പര്‍ 09194 (കോട്ടയം - വഡോദര ജംഗ്ഷന്‍) ഞായറാഴ്ചകളില്‍ (ഡിസംബര്‍ 21, 28, ജനുവരി 4, 11) കോട്ടയത്ത് നിന്ന് രാത്രി ഒന്‍പത് മണിക്ക് പുറപ്പെടും. മൂന്നാം ദിവസം രാവിലെ ആറ് മണിക്കാണ് വഡോദരയില്‍ എത്തിച്ചേരുന്നത്.

21 എല്‍എച്ച്ബി കോച്ചുകളോടു കൂടിയ ഈ ട്രെയിനില്‍ ഒരു ഫസ്റ്റ് എസി, രണ്ട് ടു ടയര്‍ എസി, ആറ് ത്രീ ടയര്‍ എസി, ആറ് സ്ലീപ്പര്‍ കോച്ചുകള്‍, നാല് ജനറല്‍ കോച്ചുകള്‍, ഒരു ലഗേജ് കം ബ്രേക്ക് വാന്‍, ഒരു ജനറേറ്റര്‍ കാര്‍ കോച്ച് എന്നിവ ഉണ്ടാകും.

സൂറത്ത്, വാപി, വസായ് റോഡ്, പന്‍വേല്‍, മഡ്ഗാവ്, ഉഡുപ്പി, സൂറത്ത്കല്‍, മംഗലാപുരം ജങ്ഷന്‍, കാസര്‍കോട്, കണ്ണൂര്‍, തെല്ലിച്ചേരി, കോഴിക്കോട്, തിരൂര്‍, ഷൊര്‍ണൂര്‍ ജങ്ഷന്‍, തൃശൂര്‍, ആലുവ, എറണാകുളം ടൗണ്‍ സ്റ്റേഷനുകള്‍ എന്നിവിടങ്ങളില്‍ ട്രെയിനിന് സ്റ്റോപ്പുകള്‍ ഉണ്ടായിരിക്കും.

യാത്രക്കാരുടെ സൗകര്യാര്‍ത്ഥം റെയില്‍വേ ഒരു വണ്‍വേ സ്‌പെഷ്യല്‍ സര്‍വീസും പ്രഖ്യാപിച്ചിട്ടുണ്ട്. ട്രെയിന്‍ നമ്പര്‍ 06159 (തിരുവനന്തപുരം സെന്‍ട്രല്‍ - ഹസ്രത്ത് നിസാമുദ്ദീന്‍) ഡിസംബര്‍ 13 ന് തിരുവനന്തപുരം സെന്‍ട്രലില്‍ നിന്ന് രാവിലെ 7.45 ന് പുറപ്പെടും. ഡിസംബര്‍ 15 ന് വൈകുന്നേരം ഏഴു മണിക്ക് നിസാമുദ്ദീനില്‍ എത്തിച്ചേരും.

ട്രെയിനില്‍ ഒരു ഫസ്റ്റ് ക്ലാസ് എസി, അഞ്ച് ടു-ടയര്‍ എസി, 12 ത്രീ-ടയര്‍ എസി, ഒരു ഹോട്ട് ബഫെ, രണ്ട് ജനറേറ്റര്‍ കാര്‍ കോച്ചുകള്‍ എന്നിവ ഉള്‍പ്പെടുന്നു. ഈ ട്രെയിനിന് മംഗളൂരു ജംഗ്ഷന്‍, ഉഡുപ്പി, കുന്ദാപുര, മൂകാംബിക റോഡ് ബൈന്ദൂര്‍, കാര്‍വാര്‍ എന്നിവിടങ്ങളില്‍ സ്റ്റോപ്പുകള്‍ അനുവദിച്ചിട്ടുണ്ട്.