'പീഡിപ്പിച്ചുവെന്നതിന് ഗെയ്ല്‍ തെളിവ് ഹാജരാക്കണം'

കൊല്ലം: താന്‍ ബലാത്സംഗം ചെയ്യപ്പെട്ടു എന്ന ഗെയ്ല്‍ ട്രെഡ്വലിന്റെ വെളിപ്പെടുത്തലിനെ കുറിച്ച് അന്വേഷിക്കണമെങ്കില്‍ തെളിവ് ഹാജരാക്കണം എന്ന് കേരള പോലീസ്. ഇക്കാര്യം ഉന്നയിച്ച് ഗെയ്ല്‍ ട്രെഡ്വലിന് ഇമെയില്‍ സന്ദേശം അയച്ചു.

മഠത്തില്‍ വച്ച് ബലാത്സംഗം ചെയ്യപ്പെട്ടിട്ടുണ്ടെങ്കില്‍ തെളിവുകളുമായി നേരിട്ട് ഹാജരാകണം എന്നാണ് ആവശ്യം. അല്ലാത്തപക്ഷം കേസ് പിന്‍വലിച്ചതായി മറുപടി നല്‍കണം എന്നും പോലീസ് ആവശ്യപ്പട്ടിട്ടുണ്ട്.

നേരത്തെ സുപ്രീം കോടതി അഭിഭാഷകനായ ദീപക് പ്രകാശ് ഗെയ്ല്‍ ട്രെഡ്വലിന്റെ വെളിപ്പെടുത്തലിന്റെ അടിസ്ഥാനത്തില്‍ കേസെടുക്കണം എന്നാവശ്യപ്പെട്ട് കരുനാഗപ്പള്ളി പോലീസ് സ്‌റ്റേഷനില്‍ പരാതി നല്‍കിയിരുന്നു. തുടക്കത്തില്‍ കേസ് രജിസ്റ്റര്‍ ചെയ്ത് അന്വേഷണം തുടങ്ങും എന്നറിയിച്ച പോലീസ് പിന്നീട് നിലപാട് മാറ്റി.

പരാതില്‍ എഫ്‌ഐആര്‍ രജിസ്റ്റര്‍ ചെയ്യേണ്ടതിലെന്നും പ്രാഥമിക അന്വേഷണം നടത്തിയാല്‍ മതി എന്നും ആയിരുന്നു പോലീസിന് കി്ട്ടിയ നിയമോപദേശം. ഈ സമയം തന്നെ പരാതിയില്‍ ഉന്നയിച്ച ആരോപണങ്ങള്‍ക്കുള്ള തെളിവുകള്‍ ഉണ്ടെങ്കില്‍ ഹാജരാക്കണം എന്ന് പരാതിക്കാരനോടും പോലീസ് ആവശ്യപ്പെട്ടിരുന്നു.

ഗെയ്ല്‍ തന്റെ പുസ്തകത്തിലൂടെ ഇത്രയും വലി വെളിപ്പെടുത്തല്‍ നടത്തിയിട്ടും പോലീസ് സ്വമേധയാ കേസെടുക്കാത്തത് സുപ്രീം കോടതി വിധിയുടെ ലംഘനമാണെന്നാണ് അഭിഭാഷകന്‍ ആരോപിക്കുന്നത്. വിഷയം ഉന്നയിച്ച് സുപ്രീം കോടതിയില്‍ കോടതിയലക്ഷ്യ ഹര്‍ജി സമര്‍പ്പിക്കാനുള്ള ഒരുക്കത്തിലാണ് ദീപക് പ്രകാശ്.

ഇതിനിടെയാണ് തെളിവുകള്‍ നേരിട്ട് ഹാജരാക്കണം എന്നാവശ്യപ്പെട്ട് കരുനാഗപ്പള്ളി പോലീസ് ഗെയ്ല്‍ ട്രെഡ്വലിന് ഇമെയില്‍ അയച്ചിരിക്കുന്നത്.

English summary

Gail should come and produce evidence for rape: Police