ജീവിതം ക്യാമറയ്ക്കും ഫോട്ടോകള്‍ക്കുമായി സമര്‍പ്പിച്ച അഭിലാഷ് ഉയരങ്ങള്‍ താണ്ടുന്നു

By Desk

Updated: Monday, January 22, 2018, 11:17 [IST]

മലപ്പുറം: ജീവിതം മുഴുവന്‍ ക്യാമറയ്ക്കും ഫോട്ടോകള്‍ക്കുമായി സമര്‍പ്പിച്ച് ഫോട്ടോഗ്രാഫിയില്‍ ഉയരങ്ങള്‍ കീഴടക്കുകയാണ് പൊന്നാനി സ്വദേശിയായ അഭിലാഷ് ഷാറോണ്‍ എന്ന യുവാവ്. കുട്ടിക്കാലം മുതല്‍ക്കെ ഫോട്ടോഗ്രാഫിയെ പ്രണയിച്ചിരുന്ന അഭിലാഷിന് ജീവിതനിയോഗംപോലെ വലിയ അംഗീകാരങ്ങളാണ് ഫോട്ടോഗ്രാഫിയിലൂടെ നേടിക്കൊടുത്തത് .

ഓള്‍ കേരള ഫോട്ടോഗ്രാഫേഴ്‌സ് അസോസിയേഷന്‍ തിരുവനന്തപുരം ജില്ലാ കമ്മിറ്റി നടത്തിയ സംസ്ഥാനതല ഫോട്ടോഗ്രാഫി മത്സരത്തില്‍ തുടര്‍ച്ചയായി രണ്ടാംവര്‍ഷവും ഒന്നാം സ്ഥാനം അഭിലാഷിനാണ് ലഭിച്ചത് .ജീവിതം മുഴുവന്‍ ക്യാമറയ്ക്കും ഫോട്ടോകള്‍ക്കും മാത്രമായി സമര്‍പ്പിച്ച അഭിലാഷിന് അര്‍ഹിക്കുന്ന അംഗീകാരമായിരുന്നു കഴിഞ്ഞ ദിവസം ലഭിച്ച ഈ പുരസ്‌കാരം .

കഴിഞ്ഞ വര്‍ഷവും എ.കെ.പി.എ സംഘടിപ്പിച്ച സംസ്ഥാനതല ഫോട്ടോഗ്രാഫി മത്സരത്തില്‍ അഭിലാഷിന് തന്നെയായിരുന്നു ഒന്നാംസ്ഥാനം.2015 ല്‍ എ.കെ.പി. എ നടത്തിയ മലപ്പുറം ജില്ലാതല മത്സരത്തില്‍ മികച്ച ഫോട്ടോഗ്രാഫര്‍ക്കുള്ള പ്രോത്സാഹന സമ്മാനവും അഭിലാഷിന് ലഭിച്ചിരുന്നു .

അഭിലാഷ്‌

യാത്രയും ഫോട്ടോഗ്രാഫിയും ഏറെ സ്‌നേഹിക്കുന്ന അഭിലാഷിന്റെ പല ചിത്രങ്ങളും ഏറെ ശ്രദ്ധിക്കപ്പെട്ടിട്ടുണ്ട് .പൊന്നാനിയിലെ ഗ്രാമീണകാഴ്ചകള്‍ ഫ്രെയിമിലൊതുക്കിയാണ് ഈ രംഗത്തേക്ക് അഭിലാഷ് വരുന്നത് .ഇത്തരം ഗ്രാമീണ കാഴ്ചകളാണ് അഭിലാഷിന് ആദ്യ പ്രോത്സാഹന സമ്മാനം നേടിക്കൊടുത്തത് .ഡല്‍ഹിയിലെ തെരുവുകാഴ്ചകളുടെ ചിത്രമാണ് 2016ല്‍ സംസ്ഥാനതലത്തില്‍ ഒന്നാംസ്ഥാനം നേടിക്കൊടുത്തതെങ്കില്‍ ഈ വര്‍ഷം ഉത്തരാഖണ്ഡ് ജിം കോര്‍ബെറ്റ് വൈല്‍ഡ്‌ലൈഫ് പ്രദേശത്തുനിന്നും എടുത്ത ആനകള്‍ പുഴ മുറിച്ച് കടക്കുന്ന ചിത്രമാണ് ഒന്നാം സ്ഥാനം നേടിയത് .

പൊന്നാനി സ്‌കോളര്‍ കോളേജില്‍ നിന്ന് ഡിഗ്രി പഠനം പൂര്‍ത്തിയാക്കിയ അഭിലാഷ് കഴിഞ്ഞ മൂന്ന് വര്‍ഷമായി പ്രൊഫഷണല്‍ ഫോട്ടോഗ്രാഫി രംഗത്ത് സജീവമാണ് .പൊന്നാനി ബിയ്യം സ്വദേശിയാണ് അഭിലാഷ്

തുറമുഖ വകുപ്പ് മന്ത്രി കടന്നപ്പള്ളി രാമചന്ദ്രന്‍ വര്‍ക്കലയില്‍ വച്ച് നടന്ന 33 ആമത് തിരുവന്തപുരം എ കെ പി എ സമ്മേളനത്തില്‍ വച്ച് അഭിലാഷിന് അവാര്‍ഡ് നല്‍കിയിരുന്നു .പതിനായിരം രൂപയും പ്രശസ്തിപത്രവും അടങ്ങുന്നതായിരുന്നു പുരസ്‌കാരം. നേരത്തേയും പരിസ്ഥിതി സംബന്ധമായ അഭിലാഷിന്റെ ചിത്രങ്ങള്‍ക്ക് ബഹുമതികള്‍ ലഭിച്ചിരുന്നു. അച്ചന്‍ വിശ്വനാഥനും അമ്മ അംബികയും നല്‍കുന്ന പൂര്‍ണ പിന്തുണയാണ് അഭിലാഷിന്റെ വിജയമന്ത്രം. ഫോട്ടോഗ്രാഫിയോടുള്ള അടങ്ങാത്ത ആവേശമാണ് അഭിലാഷിനെ ഈ രംഗത്ത് പിടിച്ചുനിര്‍ത്തുന്നത് .