സിപിഎം: പി മോഹനന്‍ തന്നെ കോഴിക്കോട് ജില്ലാ സെക്രട്ടറി

By Desk

Updated: Thursday, January 4, 2018, 13:44 [IST]

കൊയിലാണ്ടി: പി മോഹനന്‍ മാസ്റ്റര്‍ സിപിഎം കോഴിക്കോട് ജില്ലാ സെക്രട്ടറിയായി വീണ്ടും തെരഞ്ഞെടുക്കപ്പെട്ടു. കൊയിലാണ്ടിയില്‍ മൂന്നു ദിവസമായി തുടര്‍ന്നു വരുന്ന ജില്ലാ സമ്മേളനമാണ് മോഹനന്‍ മാസ്റ്ററെ വീണ്ടും സെക്രട്ടറിയായി തെരഞ്ഞെടുത്തത്. മുഖ്യമന്ത്രി പിണറായി വിജയനോടും ഔദ്യോഗികപക്ഷത്തോടും എന്നും അടുപ്പം സൂക്ഷിച്ച പി. മോഹനന്‍ വീണ്ടും സെക്രട്ടറിയായി വരുന്ന കാര്യം നേരത്തെത്തന്നെ ഏതാണ്ട് ഉറപ്പായിരുന്നു.

ടി.പി വധത്തിനു ശേഷം ഒരു വര്‍ഷത്തോളം ജയിലില്‍ കിടക്കേണ്ടി വന്ന മോഹനന്‍ മാസ്റ്ററെ കോടതി വെറുതെ വിട്ടതിനെ തുടര്‍ന്ന് തൊട്ടടുത്ത തവണതന്നെ ജില്ലാ സെക്രട്ടറിയായി പാര്‍ട്ടി തെരഞ്ഞെടുത്തിരുന്നു. അത്തരമൊരു സാഹചര്യത്തില്‍ ഇത്തവണയും മറ്റൊരു പേര് ഉയര്‍ന്നു വരുന്നതിനുള്ള സാധ്യതകള്‍ വിരളമായിരുന്നു. മോഹനന്‍ മാസ്റ്റര്‍ സിപിഎം ജില്ലാ സെക്രട്ടറിയായി തെരഞ്ഞെടുക്കപ്പെട്ടതായി പാര്‍ട്ടി നേതൃത്വം രാവിലെ മാധ്യമങ്ങളെ അറിക്കുകയായിരുന്നു.