'ദിലീപിന്റെ ആ സിനിമകള്‍ ഷൂട്ടിങ് കണ്ടപ്പഴേ തോന്നി പൊട്ടുമെന്ന്; മഞ്ജു വാര്യരുടെ ചിത്രവും'

മലയാള സിനിമയിലെ പ്രമുഖ സ്റ്റില്‍ ഫോട്ടോഗ്രാഫറാണ് ഷാലു പേയാട്. മരക്കാര്‍, ആന്‍ഡ്രോയിഡ് കുഞ്ഞപ്പന്‍ തുടങ്ങി ഒട്ടേറെ സിനിമകളില്‍ പ്രവര്‍ത്തിച്ചിട്ടുണ്ട്. സോഷ്യല്‍ മീഡിയയിലും സജീവമാണ് അദ്ദേഹം. ചില സിനിമകളുടെ ഷൂട്ടിങ് വേളയില്‍ തന്നെ അതിന്റെ ഭാവി മനസിലാക്കാന്‍ സാധിക്കുമെന്ന് പറയുകയാണ് ഷാലു പേയാട്. പലപ്പോഴും നിര്‍മാതാക്കളോട് താന്‍ ഇക്കാര്യം പറഞ്ഞിട്ടുണ്ടെന്നും അദ്ദേഹം പറയുന്നു.

ആദ്യ ദിനങ്ങളില്‍ നിര്‍മാതാവ് പണം ഇറക്കുന്നതിന് തയ്യാറാകും. ചില സിനിമകള്‍ ഷൂട്ടിങ് തീരുമ്പോഴേക്കും സംവിധായകനും നിര്‍മാതാവും ഉടക്കിയിട്ടുണ്ടാകുമെന്നും ഷാലു പേയാട് തന്റെ അനുഭവം വിശദീകരിക്കുന്നു. മാസ്റ്റര്‍ബിന്‍ എന്ന യുട്യൂബ് ചാനലിന് അദ്ദേഹം നല്‍കിയ അഭിമുഖത്തില്‍ ദിലീപിന്റെയും മഞ്ജുവാര്യരുടെയും കുഞ്ചാക്കോ ബോബന്റെയും സിനിമാ ചിത്രീകരണ വേളയില്‍ തോന്നിയ കാര്യങ്ങള്‍ തുറന്നുപറയുകയാണ്.

കുഞ്ചാക്കോ ബോബന്‍ വ്യത്യസ്തമായ വേഷത്തിലെത്തി ഹിറ്റടിച്ച ചിത്രമാണ് ന്നാ താന്‍ കേസ് കൊട്. കാസര്‍കോടിന്റെ പശ്ചാത്തലത്തില്‍ ഒരുങ്ങിയ കുഞ്ഞുകഥ പറയുന്ന ചിത്രം കേരളക്കരയിലെ തീയേറ്ററുകള്‍ ഇളക്കിമറിച്ചിരുന്നു. മലയാളികളെ കുലുക്കി ചിരിപ്പിച്ച ഈ ചിത്രത്തില്‍ കള്ളന്‍ കഥാപാത്രമാണ് കുഞ്ചാക്കോ ബോബന്. റോഡിലെ കുഴി പൊല്ലാപ്പ് സൃഷ്ടിക്കുന്ന കഥ വളരെ രസകരമായിട്ടാണ് ചിത്രീകരിച്ചിരിക്കുന്നത്.

ഈ സിനിമയുടെ ഷൂട്ടിങ് തുടങ്ങിയ വേളയില്‍ തന്നെ പടം ഹിറ്റാകുമെന്ന് തോന്നിയിരുന്നു എന്ന് ഷാലു പേടാട് പറയുന്നു. കിണറ്റില്‍ കുഞ്ചാക്കോ ബോബന്‍ ഇറങ്ങുന്ന ഫോട്ടോയാണ് ആദ്യം എടുത്തത്. അപ്പോള്‍ തന്നെ തനിക്ക് പടം വലിയ വിജയം നേടുമെന്ന് തോന്നിയിരുന്നു എന്നും ഷാലു പറയുന്നു. ലൊക്കേഷനിലെ വൈബ് കണ്ടാല്‍ സിനിമയുടെ ഭാവി മനസിലാക്കാന്‍ സാധിക്കും. കുഞ്ചാക്കോ ബോബനോട് പടം വിജയിക്കുമെന്ന് ഷാലു പേയാട് പറഞ്ഞിരുന്നു.

ഷെയ്ന്‍ നിഗം കേന്ദ്ര കഥാപാത്രമായി അഭിനയിച്ച ബാള്‍ട്ടി പ്രതീക്ഷിക്കുന്ന വിജയം നേടില്ലെന്ന് തോന്നിയിരുന്നു എന്ന് ഷാലു പേയാട് പറയുന്നു. നിര്‍മാതാവിനോട് ഇക്കാര്യം സൂചിപ്പിച്ചു എന്നും അദ്ദേഹം പറഞ്ഞു. ശ്രമിച്ചാല്‍ മിക്ക സിനിമകളും കുറഞ്ഞ ദിവസത്തില്‍ ഷൂട്ടിങ് പൂര്‍ത്തിയാക്കാന്‍ സാധിക്കും. എന്നാല്‍ കൂടുതല്‍ ടേക്ക് എടുത്ത് സമയം കളയുന്നതും കണ്ടിട്ടിട്ടുണ്ട്.

ദിലീപ് നായകനായ വോയ്‌സ് ഓഫ് സത്യനാഥന്‍, തങ്കമണി എന്നീ സിനികമള്‍ ഷൂട്ടിങ് നടക്കുമ്പോള്‍ തന്നെ തനിക്ക് മനസിലായിരുന്നു പൊട്ടുമെന്ന്. അണിയറ പ്രവര്‍ത്തകര്‍ വേണ്ടപ്പെട്ടവര്‍ ആണെങ്കില്‍ സ്വകാര്യമായി അഭിപ്രായം തുറന്നു പറയും. മഞ്ജുവാര്യരുടെ വെള്ളരിപ്പട്ടണം എന്ന സിനിമയും ചിത്രീകരണ വേളയില്‍ തന്നെ പൊട്ടുമെന്ന് തനിക്ക് തോന്നിയിരുന്നു എന്നും ഷാലു പേയാട് പറയുന്നു.

എല്ലാരും സിനിമ സൂപ്പര്‍ ആണെന്ന് പറയുമ്പോള്‍ ദിലീപും മറ്റുള്ള മുതിര്‍ന്ന നടന്മാരും വിശ്വസിക്കും. ആരും മോശമാണെന്ന് തുറന്നു പറയില്ല. ചില പുതിയ സംവിധായകര്‍ക്ക് മനസില്‍ സിനിമയുണ്ടാകും. അത് ചിത്രീകരിക്കാന്‍ കഴിയില്ല. വാട്‌സാപ്പ് കോമഡിയെല്ലാം കണ്ട് ഉറക്കെ ചിരിക്കും. വോയ്‌സ് ഓഫ് സത്യനാഥനില്‍ ചളി കോമഡിയാണ്. എല്ലാവരും അവിടെ നിന്ന് ചിരിച്ചു കാണിക്കുമെന്നും അത് താരങ്ങള്‍ വിശ്വസിക്കാന്‍ കാരണമാകുമെന്നും ഷാലു പേയാട് സൂചിപ്പിക്കുന്നു.

English summary

Dileep Two Movies and Manju Warrier One Film Seemed Would Not Be Successful; Shalu Peyad Open Up