മുളന്തുരുത്തിയിൽ യുവാവിനെ വെട്ടിക്കൊലപ്പെടുത്തി: ആക്രമിച്ചത് ബൈക്കിലെത്തിയ സംഘം

Updated: Monday, July 26, 2021, 22:35 [IST]

മുളന്തുരുത്തി: കൊച്ചിയിൽ യുവാവിനെ പെരുമ്പിള്ളിയിൽ വടിവാൾ ആക്രമണത്തിൽ യുവാവ് മരിച്ചു. മുളന്തുരുത്തി പെരുമ്പിള്ളി കളിക്കളം റോഡിൽ മലേക്കുരിശിന് സമീപത്ത് ഇച്ചിരവേലിൽ ജോജി മത്തായി(24)യാണ് മരിച്ചത്. തിങ്കളാഴ്ച വൈകിട്ട് അഞ്ച് മണിയോടെയാണ് സംഭവം. വൈകിട്ട് രണ്ട് ബൈക്കുകളിലായെത്തിയ സംഘമാണ് വീട്ടിനുള്ളിൽ കയറി ജോജിയെ വെട്ടിപ്പരിക്കേൽപ്പിച്ചത്. ആക്രമണം തടയാൻ ശ്രമിക്കുന്നതിനിടെ പിതാവിനും പരിക്കേറ്റിരുന്നു. കാലിനാണ് വെട്ടേറ്റിട്ടുള്ളത്.

സംഭവം നടന്ന് ഉടനെ തന്നെ അച്ഛനെയും മകനെയും ആശുപത്രിയിലെത്തിച്ചെങ്കിലും ജോജിയെ രക്ഷിക്കാൻ കഴിഞ്ഞില്ല. നെഞ്ചിനേറ്റ വെട്ടാണ് മരണകാരണമെന്നാണ് സൂചന. ആക്രമണത്തിന് തൊട്ടുപിന്നാലെ അക്രമികൾ വടിവാൾ അടക്കമുള്ള ആയുധങ്ങളും എത്തിയ ബൈക്കും ഉപേക്ഷിച്ച് ഓടി രക്ഷപ്പെടുകയായിരുന്നുവെന്നാണ് ദൃക്സാക്ഷികൾ നൽകുന്ന വിവരം. എന്നാൽ ആക്രമണത്തിന് പിന്നിലുള്ള കാരണം വ്യക്തമല്ല. സംഭത്തിൽ പോലീസ് പ്രതികൾക്ക് വേണ്ടി അന്വേഷണം ആരംഭിച്ചിട്ടുണ്ട്. മുളന്തുരുത്തി പോലീസിനാണ് അന്വേഷണച്ചുമതല.