പശുക്കടത്ത് ആരോപിച്ച് രാജസ്ഥാനില്‍ ഒരാളെ ആള്‍ക്കൂട്ടം തല്ലിക്കൊന്നു, ഒരാള്‍ പരിക്കേറ്റ് ആശുപത്രിയില്‍

ജയ്പൂര്‍: രാജസ്ഥാനിലെ ചിറ്റോര്‍ഗ്രാമില്‍ പശുക്കളെ കടത്തിയെന്നാരോപിച്ച് ഒരാളെ ആള്‍ക്കൂട്ടം മര്‍ദ്ദിച്ചു കൊന്നു. മധ്യപ്രദേശിലെ അച്ചാല്‍പൂര്‍ സ്വദേശിയായ യുവാവാണ് കൊല്ലപ്പെട്ടത്. ബാബു ലാല്‍ ഭില്‍ എന്നയാളാണ് കൊല്ലപ്പെട്ടതെന്ന് തിരിച്ചറിഞ്ഞിട്ടുണ്ട്. ഇയാളും മറ്റൊരു സുഹൃത്തും സഞ്ചരിച്ച വാഹനം തടഞ്ഞുനിര്‍ത്തി ജനക്കൂട്ടം ആക്രമിക്കുകയായിരുന്നു. പരിക്കേറ്റ സുഹൃത്തിനെ ആശുപത്രിയില്‍ പ്രവേശിപ്പിച്ചിരിക്കുകയാണ്.

രാജസ്ഥാനിലെ ബേഗു ടൗണിന് സമീപത്താണ് സംഭവം. സംഭവവുമായി ബന്ധപ്പെട്ട് ചിലരെ പൊലീസ് കസ്റ്റഡിയില്‍ എടുത്തിട്ടുണ്ട്. പശുക്കളുമായി പോകുന്ന വാഹനത്തിലുള്ളവരെ ഒരു സംഘം ആക്രമിക്കുകയാണെന്ന് പൊലീസിന് വിവരം ലഭിക്കുകയായിരുന്നു. പൊലീസ് സ്ഥലത്തെത്തിയതിന് ശേഷമാണ് ഇവരെ ആശുപത്രിയില്‍ എത്തിച്ചത്. എന്നാല്‍ ബാബു എന്നയാളുടെ ജീവന്‍ രക്ഷിക്കാനായില്ല. ഇയാളോടൊപ്പമുണ്ടായിരുന്ന പിന്റു എന്നയാള്‍ ആശുപത്രിയില്‍ ചികിത്സയിലാണെന്ന് ഐജി സത്യവീര്‍ സിംഗ് പറഞ്ഞു.

ആക്രമണകാരികള്‍ അവരുടെ ഫോണുകളും മറ്റ് രേഖകളും കവര്‍ന്നിട്ടുണ്ട്. ക്രൂരമായ മര്‍ദ്ദനത്തിനാണ് ഇവര്‍ ഇരയായത്. പിന്നാലെ പൊലീസ് സ്ഥലത്തെത്തിയപ്പോള്‍ ആക്രമകാരികള്‍ ഓടു രക്ഷപ്പെടുകയായിരുന്നു. സംഭവം നടന്ന സ്ഥലത്ത് ഐജി സന്ദര്‍ശിച്ചു. കേസില്‍ അന്വേഷണം ശക്തമായി നടക്കുകയാണെന്ന് ഐജി അറിയിച്ചു.

English summary

A Man was beaten to death by a mob for Cow Smuggling Suspicions In Rajasthan