എ വിജയരാഘവന്‍

കേരളത്തില്‍ നിന്നുള്ള മുന്‍ ലോക്‌സഭാ അംഗവും രാജ്യസഭാംഗവുമായിരുന്നു എ വിജയരാഘവന്‍. ലോക്‌സഭയിലും രാജ്യസഭയിലും ഓരോ കാലയളവ് അദ്ദേഹം പൂര്‍ത്തിയാക്കിയിട്ടുണ്ട്. സിപിഐഎമ്മിന്റെ കേന്ദ്ര കമ്മിറ്റി അംഗമാണ്. ലെഫ്റ്റ് ഡെമോക്രാറ്റിക് ഫ്രണ്ടിന്റെ (എല്‍ഡിഎഫ്) കണ്‍വീനറും കാര്‍ഷിക തൊഴിലാളി യൂണിയന്റെ അഖിലേന്ത്യാ സെക്രട്ടറിയുമാണ്. അസുഖത്തെത്തുടര്‍ന്ന് 2020 ല്‍ സിപിഎം സംസ്ഥാന സെക്രട്ടറി സ്ഥാനത്ത് നിന്ന് കോടിയേരി ബാലകൃഷ്ണന്‍ മാറിയപ്പോള്‍ പകരം ചുമതലയേല്‍പ്പിച്ചത് വിജയരാഘവനെയാണ്. സിപിഎം കേന്ദ്ര സെക്രട്ടേറിയറ്റ് അംഗവും അഖിലേന്ത്യാ കാര്‍ഷിക തൊഴിലാളി യൂണിയന്‍ ജനറല്‍ സെക്രട്ടറിയുമാണ്.

മലപ്പുറത്ത് ജനിച്ച അദ്ദേഹം മലപ്പുറത്തെ ഗവണ്‍മെന്റ് കോളേജില്‍ നിന്ന് ബിഎ ഇസ്ലാമിക് ഹിസ്റ്ററിയില്‍ യൂണിവേഴ്‌സിറ്റി റാങ്ക് ഹോള്‍ഡറായിരുന്നു. കോഴിക്കോട് ഗവണ്‍മെന്റ് ലോ കോളേജില്‍ നിന്ന് നിയമ ബിരുദവും നേടിയിട്ടുണ്ട്. സ്റ്റുഡന്റ്‌സ് ഫെഡറേഷന്‍ ഓഫ് ഇന്ത്യയുടെ പ്രസിഡന്റായും പ്രവര്‍ത്തിച്ചിട്ടുണ്ട്.