കോൺറാഡ് കൊംഗ്കൽ സംഗ്മ

കോൺറാഡ് കോംഗ്കൽ സംഗ്മ മേഘാലയയുടെ മുൻ മുഖ്യമന്ത്രിയായ ശ്രീ. പി എ സംഗ്മയുടെ മകനാണ്. പഠനം പൂർത്തിയാക്കിയ ഉടൻ തന്നെ അദ്ദേഹം രാഷ്ട്രീയത്തിൽ സജീവമായി. അദ്ദേഹം പെൻസിൽവാനിയ സർവ്വകലാശാലയുടെ വാർട്ടൻ സ്ക്കൂളിൽ നിന്നും എന്റർപ്രണേറിയൽ മാനേജ്മെന്റിൽ ബിസിനസ് അഡ്മിനിസ്ട്രേഷനിൽ ബിരുദം പൂർത്തിയാക്കി. ലണ്ടനിലെ ഇമ്പീരിയൽ കോളേജിൽ നിന്നും അദ്ദേഹം ധനകാര്യത്തിൽ എം ബി എ പൂർത്തിയാക്കി. 2004-ലെ അസംബ്ലി തിരഞ്ഞെടുപ്പിൽ മത്സരിച്ചുകൊണ്ട് തന്റെ രാഷ്ട്രീയജീവിതം ആരംഭിച്ച അദ്ദേഹം പക്ഷേ 182 വോട്ടുകൾക്ക് പരാജയപ്പെട്ടു. 2008-ൽ നടത്തിയ അസംബ്ലി തിരഞ്ഞെടുപ്പിൽ അദ്ദേഹം തന്റെ സഹോദരനൊപ്പം അസംബ്ലിയിലേയ്ക്ക് തിരഞ്ഞെടുക്കപ്പെട്ടു. 2016-ൽ അദ്ദേഹത്തിന്റെ പിതാവിന്റെ മരണത്തിനു ശേഷം, അദ്ദേഹം നാഷണൽസ് പ്യൂപ്പിൾസ് പാർട്ടിയുടെ (എൻ പി പി) പ്രസിഡന്റായി. പിന്നീട് അദ്ദേഹം ടുര നിയോജകമണ്ഡലത്തിൽ നിന്നും 16-മത് ലോകസഭയിലേയ്ക്ക് തിരഞ്ഞെടുക്കപ്പെട്ടു. 2018 അസംബ്ലി തിരഞ്ഞെടുപ്പിൽ, അദ്ദേഹത്തിന്റെ പാർട്ടി 19 സീറ്റുകൾ നേടുകയും മറ്റ് ചെറിയ പാർട്ടികളുമായി സഖ്യ സർക്കാർ രൂപീകരിച്ച് അദ്ദേഹം മേഘാലയയുടെ മുഖ്യമന്ത്രിയാവുകയും ചെയ്തു. ഇപ്പോഴത്തെ സർക്കാരിൽ അദ്ദേഹം ധനകാര്യവകുപ്പും വഹിക്കുന്നു. അദ്ദേഹത്തിന് ഒരു സഹോദരനും രണ്ട് സഹോദരിമാരും ഉണ്ട്. അദ്ദേഹത്തിന്റെ സഹോദരൻ ജെയിംസും സഹോദരി അഗതയും രാഷ്ട്രീയപ്രവർത്തകരാണ്.