ജ്യോതികുമാർ ചാമക്കാല

കേരളത്തിലെ ശക്തരായ കോൺഗ്രസ് നേതാക്കളില്‍ ഒരാളാണ് ജ്യോതികുമാര്‍ ചാമക്കാല. കോൺഗ്രസ് വക്താവും കെപിസിസി ജനറല്‍ സെക്രട്ടറിയുമായ ചാമക്കാല പുതുതലമുറ രാഷ്ട്രീയക്കാരിലെ മികച്ച സംവാദകനും ചാനല്‍ ചര്‍ച്ചകളില്‍ കോണ്‍ഗ്രസിന്‍റെ ഒഴിച്ചുകൂടാനാകത്ത മുഖവുമാണ്.

സ്കൂള്‍ വിദ്യാഭ്യാസ കാലത്തു തന്നെ രാഷ്ട്രീയ രംഗത്ത് ഇറങ്ങിയ ചാമക്കാല അഞ്ചാം ക്ലാസില്‍ പഠിക്കുമ്പോഴാണ് കെ എസ് യുവിൽ അംഗമാകുന്നത് .1987-89 കാലത്ത് അഞ്ചല്‍ സെന്‍റ് ജോണ്‍സ് കോളേജിൽ പ്രീ ഡിഗ്രിക്ക് പഠിക്കുമ്പോൾ കെ എസ് യു ഭാരവാഹി ആയി. പിന്നീട് തുടര്‍ പഠനത്തിനായി തിരുവനന്തപുരം എംജി കോളേജിലെത്തിപ്പോഴും പഠനത്തിനൊപ്പം തന്നെ കെ എസ് യു പ്രവര്‍ത്തനങ്ങളിലും ചാമക്കാല സജീവമായിരുന്നു.

2002 ലാണ് ചാമക്കാല അഞ്ചല്‍ ബ്ലോക്ക് കോണ്‍ഗ്രസ് കമ്മിറ്റിയുടെ ജനറല്‍ സെക്രട്ടറിയാകുന്നത്. പിന്നീട് 2004 മുതല്‍ 2007 വരെ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറിയായിരുന്നു. കൊല്ലം ജില്ലാ കോണ്‍ഗ്രസ് കമ്മിറ്റിയുടെ ജനറല്‍ സെക്രട്ടറിയായി 2007 മുതല്‍ 2012 വരെയും അദ്ദേഹം പ്രവര്‍ത്തിച്ചു. 2012 ല്‍ ആണ് കെപിസിസിയുടെ നേതൃസ്ഥാനത്തേയ്ക്ക് വരുന്നത് . 2012 മുതല്‍ 2020 വരെ കെപിസിസി സെക്രട്ടറിയായിരുന്നു അദ്ദേഹം. 2020 മുതല്‍ കെപിസിസി ജനറല്‍ സെക്രട്ടറിയാണ്. കെപിസിസി സെക്രട്ടറിയായിരുന്ന സമയത്തു തന്നെ കേരളാ സര്‍വ്വകലാശാല സെനറ്റ് അംഗമായും (2010 മുതല്‍) അതിനു ശേഷം 2011 മുതല്‍ 2018 വരെ കേരളാ സര്‍വ്വകലാശാല സിന്‍ഡിക്കേറ്റ് അംഗമായും പ്രവര്‍ത്തിച്ചു. കേരള സര്‍വ്വകലാശാല പ്ലാറ്റിനം ജൂബിലി ആഘോഷങ്ങളു‌‌ടെ റിക്രിയേഷണല്‍ കമ്മിറ്റി കണ്‍വീനറായും 2011 മുതല്‍ 2014 വരെ സിന്‍ഡിക്കേറ്റ് ഫിനാന്‍സ് കമ്മിറ്റിയുടെ കണ്‍വീനറായും പ്രവർത്തിച്ചിരുന്നു.

കൊല്ലം അഞ്ചല്‍ പഞ്ചായത്തില്‍ ജി ഭാസ്കര കുറുപ്പിന്‍റെയും ബി സരസ്വതിയമ്മയുടെയും മകനായി 1972 മേയ് മൂന്നിനാണ് ജ്യോതികുമാര്‍ ചാമക്കാല ജനിച്ചത്. ഭാര്യ: ഗായത്രി നായര്‍ ജി.മക്കൾ; സൗപർണിക, അനാമിക.