കെ.എം ഷാജി

കണ്ണൂരിലെ അഴീക്കോട് മണ്ഡലത്തെ പ്രതിനിധീകരിക്കുന്ന രാഷ്ട്രീയ നേതാവും എംഎല്‍എയുമാണ് കെഎം ഷാജി. ഇന്ത്യന്‍ യൂണിയന്‍ മുസ്ലീം ലീഗിലെ പ്രമുഖ നേതാക്കളില്‍ ഒരാളാണ് അദ്ദേഹം. പഠന കാലത്ത് അദ്ദേഹം സ്‌കൂള്‍ ലീഡറായി ചുമതലയേറ്റിരുന്നു. കണിയാംമ്പറ്റ പഞ്ചായത്തിന്റെ വൈസ് പ്രസിഡന്റായും പ്രസിഡന്റായും അദ്ദേഹം തിരഞ്ഞെടുക്കപ്പെട്ടിട്ടുണ്ട്. അതിനുശേഷമാണ് മുസ്ലീം ലീഗിന്റെയും യൂത്ത് ലീഗിന്റെയും സജീവ പ്രവര്‍ത്തകനായി മാറുന്നത്. കൊല്ലം മണ്ഡലത്തിലെ ഇരവിപുരത്തുനിന്ന് ആര്‍എസ്പി നേതാവ് എഎ അസീസിനെതിരെ മത്സരിച്ചതോടെയാണ് ഷാജി കേരള രാഷ്ട്രീയത്തില്‍ അറിയപ്പെട്ട് തുടങ്ങിയത്. ഇരവിപുരത്ത് തോറ്റെങ്കിലും അഴീക്കോട്ടാണ് ജയിച്ച് തുടങ്ങിയത്. 2011 ല്‍ അദ്ദേഹം ഇരവിപുരത്തിന് പകരം അഴിക്കോട് നിന്ന് മത്സരിക്കുകയും വിജയിക്കുകയും ചെയ്തു. 2016 ലും സിപിഎം സ്ഥാനാര്‍ത്ഥി എംവി നികേഷ് കുമാറിനെ വീഴ്ത്തി ഷാജി ജയം ആവര്‍ത്തിച്ചു.