പി ശ്രീരാമകൃഷ്ണൻ

പതിനാലാം കേരള നിയമസഭയുടെ സ്പീക്കറായ പി ശ്രീരാമകൃഷ്ണന്‍ പൊന്നാനി നിയമസസഭാ മണ്ഡലത്തില്‍ നിന്നുള്ള അംഗമാണ്. ബാലസംഘത്തിലൂടെ തുടങ്ങി എസ്എഫ്ഐയിലൂടെയും ഡിവൈഎഫ്ഐയിലൂടെയും വളര്‍ന്നു വന്ന രാഷ്ട്രീയ പാരമ്പര്യമാണ് പി ശ്രീരാമകൃഷ്ണന്‍റേത്. പട്ടിക്കാട് ഗവൺമെന്റ് ഹൈസ്കൂളിലെ പഠനകാലത്ത് എസ്എഫ്ഐ യൂണിറ്റ് സെക്രട്ടറി ആയി പ്രവര്‍ത്തിച്ച ശ്രീരാമകൃഷ്ണന്‍ ഒറ്റപ്പാലം എൻ.എസ്.എസ്. കോളേജിലും രാഷ്ട്രീയ പ്രവര്‍ത്തനം തുടര്‍ന്നു. കോളേജ് പഠകാലത്ത് എസ്എഫ്ഐ യൂണിറ്റ് സെക്രട്ടറിയായും കോളേജ് യൂണിയൻ ഭാരവാഹിയായും തുടര്‍ന്ന് എസ്എഫ് ഐയുടെ പാലക്കാട് ജില്ലാ പ്രസിഡന്‍റായും പ്രവര്‍ത്തിച്ചിരുന്നു. കാലിക്കറ്റ് യൂണിവേഴ്സിറ്റി യൂണിയൻ ചെയർമാന്‍, സെനറ്റ് അംഗം, സിന്‍ഡിക്കേറ്റ് അംഗം എന്നീ പദവികളിലേക്കും തിരഞ്ഞെടുക്കപ്പെട്ടിട്ടുണ്ട്.
ഡിവൈഎഫ്ഐയുടെ ബ്ലോക്ക് ജില്ലാ പദവികളില്‍ ഏകദേശം പത്ത് വര്‍ഷത്തോളം പ്രവര്‍ത്തിച്ച ശ്രീരാമകൃഷ്ണന്‍ ഡിവൈഎഫ്ഐയുടെ സംസ്ഥാന പ്രസിഡന്റായി 2005 ല്‍ തിരഞ്ഞെടുക്കപ്പെട്ടു. തുടര്‍ന്ന് 2007 ല്‍ ഡി.വൈ.എഫ്.ഐ-യുടെ അഖിലേന്ത്യാ പ്രസിഡന്‍റായും പ്രവര്‍ത്തിച്ചിരുന്നു. സിപിഎം സംസ്ഥാന കമ്മിറ്റി അംഗമായും പ്രവര്‍ത്തിച്ചിട്ടുണ്ട്. 2011 ല്‍ പൊന്നാനി നിയമസഭാ മണ്ഡലത്തില്‍ നിന്നുമാണ് ആദ്യമായി നിയമസഭയിലെത്തുന്നത്. 2016 ലെ തിരഞ്ഞെടുപ്പിലും വിജയം ആവര്‍ത്തിച്ച പി ശ്രീരാമകൃഷ്ണന്‍ പതിനാലാം നിയമസഭയുടെ സ്പീക്കറായും തിരഞ്ഞെടുക്കപ്പെട്ടു.
ഇന്ത്യൻ സ്റ്റുഡന്റ് പാർലമെന്റിന്റെ രാജ്യത്തെ നിയമസഭകളിലെ സ്പീക്കർമാരിൽ ഏറ്റവും മികച്ച സ്പീക്കറായി പി ശ്രീരാമകൃഷ്ണനെ തിരഞ്ഞെടുത്തിരുന്നു.