അജിത് ജോഗി

ഛത്തീസ് ഗഢ് സംസ്ഥാനത്തിന്റെ ആദ്യത്തെ മുഖ്യമന്ത്രിയാണ് അജിത് കുമാർ ജോഗി. നവംബർ 2000 മുതൽ ഡിസംബർ 2003 വരെ അദ്ദേഹം സംസ്ഥാനത്തിന്റെ മുഖ്യമന്ത്രിയായി സേവനമനുഷ്ഠിച്ചു. സംസ്ഥാന നിയമസഭയിലേയ്ക്ക് തിരഞ്ഞെടുക്കപ്പെട്ടതിനു പുറമേ അദ്ദേഹം രണ്ട് പാർലമെന്റ് ഹൗസിലെയും അംഗമായിരുന്നിട്ടുണ്ട്. 2016-ൽ, അജിത് ജോഗിയും മകൻ അമിത് ജോഗിയും പാർട്ടി വിരുദ്ധ പ്രവർത്തനങ്ങൾക്കും ഛത്തീസ്ഗഢ് അന്താഗഢ് തിരഞ്ഞെടുപ്പിൽ അട്ടിമറി കാണിച്ചതിനും ഐ എൻ സിയിൽ നിന്നും പുറത്താക്കപ്പെട്ടിരുന്നു. അദ്ദേഹത്തിന്റെ മകൻ അമിത് കോൺഗ്രസ്സ് പാർട്ടിയിൽ നിന്നും 6 വർഷത്തേയ്ക്ക് ബഹിഷ്ക്കരിക്കപ്പെട്ടു. 2004 ലുണ്ടായ ഒരു വാഹനാപകടത്തിൽ ജോഗിക്ക് സാരമായി പരിക്കേൽക്കുകയും ശരീരം ഭാഗികമായി തളർന്ന് പോവുകയും ചെയ്തു. പിന്നിട് അങ്ങോട്ടുള്ള​ ജീവിതം വീൽചെയറിലായിരുന്നുവെങ്കിലും ഒരിക്കലും തന്റെ പോരാട്ടം അവസാനിപ്പിക്കാൻ അദ്ദേഹം തയ്യാറായിരുന്നില്ല. 2020 മെയ് 9 ന് ഹൃദയാഘാതത്തെ തുടർന്ന് ജോഗിയെ​ റായ്പൂരിലെ ശ്രീ നാരായണ ആശുപത്രിയിൽ പ്രവേശിപ്പിച്ചു. പിന്നീട് കോമാവസ്ഥയിൽ ആയിരുന്നു. 20 ദിവസത്തെ ആശുപത്രി വാസത്തിനിടെ അദ്ദേഹത്തിന് പല തവണയായി ഹൃദയാഘാതം ഉണ്ടായി. ഒടുവിൽ മെയ് 29 ന് തന്റെ 74ാം വയസിൽ ജോഗി മരണത്തിന് കീഴടങ്ങി.