ഇ ശ്രീധരന്‍

ഇന്ത്യയുടെ മെട്രോമാന്‍ എന്നറിയപ്പെടുന്ന എളാട്ടുവളപ്പില്‍ ശ്രീധരന്‍ ഒരു എഞ്ചിനീയറാണ്. 1932 ജൂണ്‍ 12 ന് കേരളത്തിലെ പാലക്കാട് ജില്ലയിലെ കറുകപുത്തൂരിലാണ് അദ്ദേഹം ജനിച്ചത്. പാലക്കാട് ജില്ലയിലെ പട്ടാമ്പിക്കടുത്തുള്ള ചാത്തന്നൂരിലെ ഗവണ്‍മെന്റ് ലോവര്‍ പ്രൈമറി സ്‌കൂളില്‍ നിന്ന് പ്രാഥമിക വിദ്യാഭ്യാസം നേടിയ അദ്ദേഹം ബാസല്‍ ഇവാഞ്ചലിക്കല്‍ മിഷന്‍ ഹയര്‍ സെക്കന്‍ഡറി സ്‌കൂളില്‍ നിന്ന് സ്‌കൂള്‍ വിദ്യാഭ്യാസം പൂര്‍ത്തിയാക്കി. ആന്ധ്രാപ്രദേശിലെ കാക്കിനാടയിലെ ഗവണ്‍മെന്റ് എഞ്ചിനീയറിംഗ് കോളേജില്‍ നിന്ന് സിവില്‍ എഞ്ചിനീയറിംഗ് ബിരുദം പൂര്‍ത്തിയാക്കി. ഐഇഎസ് നേടിയാണ് പിന്നീട് ഇന്ത്യന്‍ റെയില്‍വേ എഞ്ചിനീയറിംഗ് സര്‍വീസില്‍ പ്രവേശിച്ചത്.

രാമേശ്വരത്ത് ചുഴലിക്കാറ്റില്‍ തകര്‍ന്ന പാമ്പന്‍ പാലത്തിന്റെ പുനര്‍ നിര്‍മാണമാണ് അദ്ദേഹത്തിന് കരിയറിന്റെ തുടക്കത്തില്‍ തന്നെ ലഭിച്ച കടമ്പ. പാമ്പന്‍ പാലം റെക്കോര്‍ഡ് വേഗത്തില്‍ പുനര്‍നിര്‍മിക്കുകയും അതിന് പിന്നാലെ ശ്രീധരന്‍ പ്രശസ്തിയിലേക്ക് ഉയരുകയും ചെയ്തു. പിന്നീട് കൊങ്കണ്‍ റെയില്‍വേ, സൗത്ത് ഈസ്റ്റേണ്‍ റെയില്‍വേ, കൊല്‍ക്കത്ത മെട്രോ, കൊച്ചിന്‍ ഷിപ്പ് യാര്‍ഡ്, ദില്ലി മെട്രോ റെയില്‍, കൊച്ചി മെട്രോ, ലഖ്നൗ മെട്രോ തുടങ്ങിയ നിരവധി എഞ്ചിനീയറിംഗ് പ്രോജക്ടുകള്‍ക്ക് നേതൃത്വം നല്‍കി. നിശ്ചിത സമയപരിധിക്കുള്ളില്‍ തന്റെ എല്ലാ പ്രോജക്റ്റുകളും പൂര്‍ത്തിയാക്കുന്നതില്‍ അദ്ദേഹം പ്രശസ്തനാണ്. ഇന്ത്യയിലെ നഗര ഗതാഗത അടിസ്ഥാന സൗകര്യങ്ങളുടെ മുഖച്ഛായ മാറ്റുന്നതില്‍ ശ്രീധരന്‍ സുപ്രധാന പങ്കുവഹിച്ചിട്ടുണ്ട്.

മൂന്ന് പതിറ്റാണ്ടിലേറെ നീണ്ട തന്റെ വിശിഷ്ട കരിയറില്‍ ഇ ശ്രീധരനെ തേടി ലോകമെമ്പാടുമുള്ള നിരവധി അവാര്‍ഡുകളും അംഗീകാരങ്ങളും ഓണററി ഡോക്ടറേറ്റുകളും തേടിയെത്തി. പദ്മ വിഭൂഷന്‍, പത്മശ്രീ, ഫ്രഞ്ച് സര്‍ക്കാരിന്റെ പരമോന്നത പുരസ്‌കാരമായ 'ഷെവലിയര്‍ ഡി ലാ ലീജിയന്‍ ഡി ഹോനര്‍', 'ഓര്‍ഡര്‍ ഓഫ് ദി റൈസിംഗ് സണ്‍', ജപ്പാനിലെ പരമോന്നത പൗര പുരസ്‌കാരം, ഗോള്‍ഡ് ആന്‍ഡ് സില്‍വര്‍ സ്റ്റാര്‍, ജി-ഫയല്‍സ് അവാര്‍ഡുകള്‍ എന്നിവ അവയില്‍ ചിലതാണ്.

അദ്ദേഹത്തെക്കുറിച്ച് ധാരാളം പുസ്തകങ്ങള്‍ എഴുതപ്പെട്ടിട്ടുണ്ട്. ശാസ്ത്രം, സാങ്കേതികവിദ്യ, വികസനം, ഔ്യോഗിക ധാര്‍മ്മികത എന്നിവയെക്കുറിച്ചുള്ള നിരവധി പുസ്തകങ്ങളും അദ്ദേഹം തന്നെ രചിച്ചിട്ടുണ്ട്. 2021 ഫെബ്രുവരിയില്‍ ബിജെപിയില്‍ ചേരുന്നതുവരെ ജീവിതത്തിലുടനീളം അദ്ദേഹം തികച്ചും രാഷ്ട്രീയേതര സമീപനമാണ് പ്രകടിപ്പിച്ചിട്ടുള്ളത്. ശ്രീധരന്‍ നരേന്ദ്ര മോദിയെ ഗുജറാത്ത് മുഖ്യമന്ത്രിയായിരിക്കെ അഭിനന്ദിക്കുകയും 2014 ലെ പൊതുതെരഞ്ഞെടുപ്പില്‍ പ്രധാനമന്ത്രി സ്ഥാനാര്‍ത്ഥിയായി അദ്ദേഹത്തെ അംഗീകരിക്കുകയും ചെയ്തിരുന്നു.