തെലുങ്കാന: 5അംഗ സമിതി രൂപീകരിച്ചു

ദില്ലി: തെലുങ്കാന സംസ്ഥാനം രൂപവത്കരിക്കുന്നതു സംബന്ധിച്ച് തീരുമാനമെടുക്കുന്നതിന് അഞ്ചംഗ കമ്മിറ്റിയെ കേന്ദ്രസര്‍ക്കാര്‍ നിയോഗിച്ചു.

സുപ്രീംകോടതി മുന്‍ ജഡ്ജി ബി.എന്‍ ശ്രീകൃഷ്ണയുടെ നേതൃത്വത്തിലാണ് അഞ്ചംഗ സമിതി പ്രവര്‍ത്തിക്കുക.

ദേശീയ നിയമ സര്‍വകലാശാലയുടെ വൈസ് ചാന്‍സലര്‍ രണ്‍ബീര്‍ സിങ്ങ്, ഇന്റര്‍നാഷണല്‍ ഫുഡ് പോളിസി റിസര്‍ച്ച് ഇന്‍സ്റ്റിട്യൂട്ടിലെ അബുസലേഹ് ഷെറീഫ്, മുന്‍ ആഭ്യന്തര സെക്രട്ടറി വിനോദ് ഡുഗ്ഗല്‍, ഐ.ഐ.ടി പ്രൊഫസര്‍ രവീന്ദര്‍ കൗര്‍ എന്നിവരാണ് കമ്മിറ്റിയിലെ മറ്റംഗങ്ങള്‍.

തെലുങ്കാന വിഷയത്തില്‍ രാാഷ്ട്രീയ സാഹചര്യം വിലയിരുത്തുന്നതിനൊപ്പം ഇവര്‍ എല്ലാ രാഷ്ട്രീയപ്പാര്‍ട്ടികളുടെയും സാമൂഹിക സംഘടനകളുടെയും അഭിപ്രായം തേടുകയും ചെയ്യും.

ഇതിനിടെ തെലുങ്കാന സംസ്ഥാനം രൂപവത്കരിക്കുന്നതില്‍ തങ്ങളുടെ വിയോജിപ്പ് പ്രകടിപ്പിക്കാന്‍ അഞ്ചംഗ തെലുങ്കുദേശം പാര്‍ട്ടി (ടിഡിപി.) പ്രതിനിധിസംഘം ചൊവ്വാഴ്ച ആഭ്യന്തര മന്ത്രി പി. ചിദംബരത്തെകണ്ടിരുന്നു.

മുന്‍ കേന്ദ്രമന്ത്രിയും ടിഡിപി പൊളിറ്റ്ബ്യൂറോ അംഗവുമായ കെ. യെരന്‍ നായിഡുവിന്റെ നേതൃത്വത്തിലുള്ള സംഘം ഈ പ്രശ്‌നത്തില്‍ തിടുക്കത്തില്‍ തീരുമാനമെടുക്കരുതെന്ന് ചിദംബരത്തോട് അഭ്യര്‍ഥിച്ചു.

വിദഗ്ധ സമിതിക്ക് രൂപം നല്‍കുന്നതിന് മുമ്പേ എല്ലാ രാഷ്ട്രീയപ്പാര്‍ട്ടികളുടെയും സാമൂഹിക സംഘടനകളുടെയും അഭിപ്രായം തേടണമെന്നും അവര്‍ ആവശ്യപ്പെട്ടിരുന്നു. തെലുങ്കാന സമിതി ഈയാഴ്ച പ്രഖ്യാപിക്കുമെന്ന് ആഭ്യന്തര മന്ത്രി നേരത്തേ പ്രഖ്യാപിച്ചിരുന്നു.