സൗദി അറേബ്യ നിര്‍ത്തിയാലും പ്രശ്‌നമില്ല; എണ്ണ ഒഴുക്കാന്‍ പാശ്ചാത്യ രാജ്യങ്ങള്‍, സുപ്രധാന നീക്കം ഇങ്ങനെ

ഇസ്രായേൽ-ഇറാൻ യുദ്ധം രൂക്ഷമായതോടെ ആഗോളതലത്തിൽ അസംസ്കൃത എണ്ണവില കുതിച്ചുയരുകയാണ്. ഈ സാഹചര്യത്തിൽ, വിലക്കയറ്റം തടയുന്നതിനായി എണ്ണ ശേഖരം പുറത്തിറക്കാൻ ഇന്റർനാഷണൽ എനർജി ഏജൻസി (IEA) നിർദ്ദേശം സമർപ്പിച്ചു. ഇത് ചരിത്രത്തിലെ ഏറ്റവും വലിയ കരുതൽ എണ്ണ വിതരണ നിർദ്ദേശമാണ്. സൗദി അറേബ്യയും ഇറാഖും കുവൈത്തും ഉള്‍പ്പെടെയുള്ള പശ്ചിമേഷ്യയിലെ എണ്ണ രാജ്യങ്ങള്‍ ഉല്‍പ്പാദനം കുറയ്ക്കുകയും ഹോര്‍മുസ് വഴി കയറ്റുമതി നിര്‍ത്തുകയും ചെയ്ത സാഹച്യത്തിലാണിത്.

2022-ൽ റഷ്യ യുക്രൈനെ ആക്രമിച്ചപ്പോൾ, ഐഇഎ അംഗരാജ്യങ്ങൾ രണ്ടു ഘട്ടങ്ങളിലായി 182 ദശലക്ഷം ബാരൽ എണ്ണ വിപണിയിലെത്തിച്ചിരുന്നു. ഇത്തവണ ഇതിലും വലിയ അളവിലുള്ള എണ്ണ പുറത്തിറക്കാനാണ് സാധ്യതയെന്ന് റിപ്പോർട്ടുകൾ പറയുന്നു.

വാൾ സ്ട്രീറ്റ് ജേർണൽ റിപ്പോർട്ട് അനുസരിച്ച്, ഐഇഎയിലെ 32 അംഗരാജ്യങ്ങളിലെ ഊർജ്ജ ഉദ്യോഗസ്ഥരുടെ അടിയന്തര യോഗത്തിലാണ് ഈ നിർദേശം ചർച്ച ചെയ്തത്. വൈകാതെ രാജ്യങ്ങൾ അന്തിമ തീരുമാനമെടുത്തേക്കുമെന്നും ഉദ്യോഗസ്ഥർ സൂചിപ്പിച്ചു. ഏതെങ്കിലും ഒരംഗം എതിർപ്പ് പ്രകടിപ്പിച്ചില്ലെങ്കിൽ ഈ പദ്ധതി അംഗീകരിക്കും. എന്നാൽ ഏതെങ്കിലും ഒരു രാജ്യം എതിർപ്പ് അറിയിച്ചാൽ പദ്ധതി വൈകാൻ സാധ്യതയുണ്ട്.

ഹോർമുസ് കടലിടുക്കിന്റെ ഭാഗികമായ അടച്ചുപൂട്ടൽ കാരണം ആഗോള എണ്ണ വിപണികളിലുണ്ടായ തടസ്സങ്ങൾ പരിഹരിക്കുകയാണ് ഐഇഎയുടെ പുതിയ നിർദ്ദേശം കൊണ്ട് ലക്ഷ്യമിടുന്നത്. പേർഷ്യൻ ഗൾഫിനെയും ഒമാൻ ഉൾക്കടലിനെയും ബന്ധിപ്പിക്കുന്ന ഹോർമുസ് പാതയിലൂടെയാണ് മേഖലയിലെ എണ്ണ ആഗോള വിപണിയിലെത്തുന്നത്.

ലോകത്തെ മൊത്തം എണ്ണ വിതരണത്തിന്റെ അഞ്ചിലൊന്ന് ദിവസേന ഈ കടലിടുക്കിലൂടെയാണ് കടന്നുപോകുന്നത്. ഇറാൻ ആക്രമണ ഭീഷണി ഉയർത്തിയതോടെ ഈ പാതയിലൂടെയുള്ള കപ്പൽ ഗതാഗതം നിലച്ചിരിക്കുകയാണ്. ഫെബ്രുവരി 28-ന് അമേരിക്കയും ഇസ്രായേലും ഇറാനെ ലക്ഷ്യമിട്ട് ആക്രമണം ആരംഭിച്ചതിന് ശേഷം അസംസ്കൃത എണ്ണവില ഏകദേശം 40% വർദ്ധിച്ചു. ബാരലിന് 115 ഡോളർ വരെ എത്തി. പിന്നീട് വില കുറഞ്ഞ് 88 ലെത്തി.

അംഗരാജ്യങ്ങൾക്ക് പൊതുമേഖലയിൽ ഏകദേശം 1.2 ബില്യൺ ബാരലും വാണിജ്യപരമായി 600 ദശലക്ഷം ബാരലും ഉൾപ്പെടെ ആകെ 1.8 ബില്യൺ ബാരൽ എണ്ണ കരുതൽ ശേഖരമായി ഉണ്ടെന്നാണ് ഐഇഎ എക്സിക്യൂട്ടീവ് ഡയറക്ടർ ഫാതിഹ് ബിറോൾ പറഞ്ഞത്, ഈ സംയുക്ത ശേഖരം ഗൾഫ് മേഖലയിൽ നിന്നുള്ള ഏകദേശം 124 ദിവസത്തെ വിതരണ നഷ്ടം നികത്താൻ പര്യാപ്തമാണെന്നും അദ്ദേഹം കൂട്ടിച്ചേർത്തു.

ഐഇഎ രൂപീകരിച്ചത് 1974ല്‍

1991-ൽ അന്നത്തെ യുഎസ് പ്രസിഡന്റ് ജോർജ്ജ് ബുഷ് ഇറാഖിനെതിരെ അധിനിവേശം ആരംഭിച്ചപ്പോഴാണ് അമേരിക്കയുടെ സ്ട്രാറ്റജിക് പെട്രോളിയം റിസർവിൽ നിന്ന് ആദ്യമായി എണ്ണ പുറത്തിറക്കാൻ ഉത്തരവിട്ടത്. അധിനിവേശത്തിന് മുന്നോടിയായി തയ്യാറാക്കിയ ഏകോപിത പദ്ധതിപ്രകാരം ഐഇഎ അംഗരാജ്യങ്ങളും തങ്ങളുടെ ശേഖരത്തിൽ നിന്ന് എണ്ണ പുറത്തുവിട്ടു. ഇതോടെ ആക്രമണത്തിന്റെ ആദ്യ ദിവസം എണ്ണവില 20 ശതമാനം കുറഞ്ഞു.ഫെബ്രുവരിയിൽ സഖ്യസേന ഇറാഖിലും കുവൈറ്റിലും പ്രവേശിച്ചപ്പോഴേക്കും സ്ട്രാറ്റജിക് പെട്രോളിയം റിസർവിൽ നിന്നുള്ള എണ്ണ വിപണിയിൽ എത്തിയിരുന്നു.

1974-ൽ അറബ് എണ്ണ ഉപരോധത്തെ തുടർന്നാണ് ഐഇഎ സ്ഥാപിതമായത്. എണ്ണ ടാങ്കറുകൾക്ക് നേരെയുണ്ടായ ഇറാനിയൻ ആക്രമണങ്ങൾ വർദ്ധിച്ചതിനെ തുടർന്നാണ് പാശ്ചാത്യ രാജ്യങ്ങൾ ഈ സംഘടന രൂപീകരിച്ചത്. വിപണി തടസ്സങ്ങൾക്കിടയിലും എണ്ണ വിതരണ സുരക്ഷ ഉറപ്പാക്കുകയാണ് ഇതിന്റെ ലക്ഷ്യം. അംഗരാജ്യങ്ങൾ നിലനിർത്തേണ്ട അസംസ്കൃത എണ്ണ കരുതൽ ശേഖരത്തിന്റെ മാനദണ്ഡങ്ങൾ നിശ്ചയിക്കുന്നതും വിതരണങ്ങൾ ഏകോപിപ്പിക്കുന്നതും ഈ ഏജൻസിയാണ്.

English summary

Even If Saudi Arabia Is Gone No Problem; Western Countries To Release Crude Oil, Important Move